!...Payanam...!

எம்.ஜி.ஆர் நூற்றாண்டு விழா கொண்டாட்டத்தின் மூலம், அ.தி.மு.கவில் வலிமையான தலைவராக உருவெடுக்கும் வேலைகளில் இறங்கிவிட்டார் முதலமைச்சர் பழனிசாமி. ‘மதுரையைவிட மூன்று மடங்கு கூட்டத்தை திருப்பூரில் கூட்ட இருக்கிறார். சசிகலா குடும்பத்துக்கு எதிரான நடவடிக்கைகளையும் தீவிரப்படுத்த இருக்கிறார்" என்கின்றனர் கொங்கு மண்டல அ.தி.மு.கவினர்.

‘அ.தி.மு.கவில் தினகரனின் தலைமையை ஏற்க வேண்டும். எம்.ஜி.ஆர் நூற்றாண்டு விழாவில் அவரை முன்னிறுத்த வேண்டும்' என்ற கோரிக்கைகளை, முதல்வர் பழனிசாமி ஒரு பொருட்டாகவே எடுத்துக் கொள்ளவில்லை. இஃப்தார் விருந்து உள்பட அனைத்து விழாக்களிலும் தன்னை முன்னிலைப்படுத்தியே செயல்பட்டு வருகிறார். தினகரன் ஆதரவு எம்எல்ஏ-க்களிடம் பேசும்போதும், ‘உங்களுக்கு அமைச்சர் பதவி வேண்டும் என்றால், நான் நினைத்தால்தான் முடியும். அந்தக் குடும்பம் சொல்வதால் எதுவும் நடந்துவிடாது. இப்போதைக்கு அமைச்சரவையை மாற்றும் எண்ணத்தில் நான் இல்லை' எனக் கண்டிப்புடன் கூறிவிட்டார். இதன்பின்னர், தினகரனை சந்திக்கச் செல்லும் எம்எல்ஏ-க்களின் எண்ணிக்கையும் குறைந்தது. ‘தினகரன் சொல்வதைக் கேட்டு ஆட்சியைக் கவிழ்த்துவிட்டால், மீண்டும் எம்எல்ஏ ஆக முடியுமா?’ என்ற அச்சத்தில் அதிருப்தி எம்எல்ஏ-க்களும் ஒதுங்கிவிட்டனர். இருப்பினும், ‘கட்சியின் பிடி தனது கட்டுக்குள் வர வேண்டும் என்பதற்காக ஆகஸ்ட் 5-ம் தேதிக்குப் பிறகு அதிரடி நடவடிக்கையில் இறங்கப் போவதாகப் பேசியிருக்கிறார் தினகரன்.

தினகரன்இதற்குப் பதில் கொடுக்கும் கொங்கு மண்டல அ.தி.மு.க நிர்வாகி ஒருவர், “ஆகஸ்ட் மாதம் மட்டுமல்ல. இன்னும் எத்தனை மாதங்கள் எடுத்துக் கொண்டாலும் எடப்பாடி பழனிசாமிக்கு எதிராக தினகரனால் எந்த முடிவையும் செயல்படுத்த முடியாது. எம்எல்ஏ-க்களில் ஒரு சிலரைத் தவிர, அனைவரும் முதல்வர் கட்டுப்பாட்டுக்குள் வந்துவிட்டனர். நேற்று மதுரை விழாவில் முதல்வர் காட்டிய பிரமாண்டம் தினகரனுக்கு மட்டுமல்ல, பன்னீர்செல்வத்துக்கும் சேர்த்தே அதிர்ச்சியைக் கொடுத்திருக்கிறது.

வழி நெடுக கொடுக்கப்பட்ட வரவேற்புகளும் சிறு தெய்வ கோவிலுக்கு அவர் வருகை தந்ததும் அ.தி.மு.க தொண்டர்களிடையே உற்சாகத்தை ஏற்படுத்தியிருக்கிறது. ‘நான் மட்டும்தான் அரசாங்கம்' என்பதை செயல் வடிவில் காட்டிவிட்டார் பழனிசாமி. பொதுவாக, முதல்வராக இருப்பவர்கள் மதுரை மாவட்டத்துக்கு வரும்போது, பெரும் தெய்வ கோவிலுக்குச் செல்வதுதான் வாடிக்கை. இதற்கு மாறாக, பிற்படுத்தப்பட்ட சமூக மக்கள் வழிபடும் சிறு தெய்வ கோவிலுக்கு அவர் வருகை தந்தது யாரும் எதிர்பாராதது. சாதாரண விவசாயக் குடிமக்களோடு தன்னை அடையாளப்படுத்தும் முயற்சிதான் இது.

அரசு விழாவில் பங்கேற்க ஜெயலலிதா செல்லும்போது கொடுக்கப்படும் அதே முளைப்பாரி வரவேற்பை பழனிசாமிக்கும் கொடுத்துள்ளனர். இதனை சசிகலா குடும்பத்தினர் ரசிக்கவில்லை" என்றவர், "நேற்று முதல்வர் பேசும்போது, ‘பேச்சைக் குறைத்துவிட்டு நாம் செயலில் இறங்க வேண்டும். நம்மை வெல்வதற்கு இன்னொரு இயக்கம் தமிழகத்தில் இல்லை. அண்ணாவின் பேச்சு, எம்.ஜி.ஆரின் வசீகரம், ஜெயலலிதாவின் உழைப்பு ஆகியவற்றைக் கட்சியின் மூவர்ணக் கொடியாகக் கருத வேண்டும். ஒருவருக்கொருவர் விட்டுக்கொடுத்து சகிப்புத் தன்மையுடன் கட்சிப் பணியாற்ற வேண்டும்' என அறிவுறுத்தினார். 'அ.தி.மு.கவின் கொள்கைளை அடுத்து எடுத்துச் செல்லப்போவது நான்தான்' எனக் குறிப்பால் சுட்டிக் காட்டிவிட்டார். கூடவே, 'மாட்டுத் தாவணி பேருந்து நிலையத்துக்கு எம்.ஜி.ஆர் பெயர், 60 ஆண்டு தண்ணீர் பிரச்னைக்குத் தீர்வு' என மதுரை பன்னீர்செல்வம்மாவட்டத்துக்குக் கூடுதல் திட்டங்களையும் அறிவித்துவிட்டே சென்றார். 'முதல்வராக மக்கள் மனதில் நீடித்து நிற்க வேண்டும்' என நினைக்கிறார் பழனிசாமி. அதற்குக் கிடைத்த வாய்ப்பாகத்தான் எம்.ஜி.ஆர் நூற்றாண்டு விழாவைப் பார்க்கிறார்" என்றார் விரிவாக.

“எடப்பாடி பழனிசாமிக்கும் தினகரன் தரப்பினருக்கும் நடந்து வரும் வார்த்தைப் போர்களை உன்னிப்பாக கவனித்து வருகிறார் பன்னீர்செல்வம். 'இந்த ஆட்டத்தில் சசிகலாவுக்கு எதிராக பழனிசாமி பலம் பெற்றுவிடக் கூடாது' எனவும் அச்சப்படுகிறார். அதன் ஒருபகுதியாகத்தான், ‘பழனிசாமியும் ஸ்டாலினும் கூட்டு சேர்ந்துள்ளனர்' என்ற குற்றச்சாட்டை சுமத்தினார். முன்பு இதே குற்றச்சாட்டைத்தான் பன்னீர்செல்வம் மீது சசிகலா சுமத்தினார். இந்த ஆயுதத்தை எடுப்பதன் மூலம், அ.தி.மு.க தொண்டர்கள் மத்தியில் மீண்டும் தனக்கான செல்வாக்கு உயரும் என நம்புகிறார். சசிகலா எதிர்ப்பையே மூலதனமாகக் கொண்டு பன்னீர்செல்வம் சென்ற பாதையில், புது உத்வேகத்தோடு பயணத்தைச் செலுத்தத் தொடங்கிவிட்டார் பழனிசாமி. முதல்வரைப் பொறுத்தவரையில், சசிகலா அளவுக்குப் பன்னீர்செல்வத்தையும் எதிரியாகத்தான் பார்க்கிறார்.

இந்தநேரத்தில், தினகரன் விதித்துள்ள கெடு பற்றிக் கொங்கு மண்டல நிர்வாகிகள், முதல்வர் பழனிசாமியுடன் பேசியுள்ளனர். அப்போது நடந்த விவாதத்தில், ‘அந்த குடும்பத்துக்கு எதிராக எம்எல்ஏ-க்கள்தான் பேசுகின்றனர். நாம் எதுவும் பேசுவதில்லை. செயல் ஒன்றுதான் நம்மை நிலைநிறுத்தும். ஜெயலலிதா மரணத்துக்கு விசாரணைக் கமிஷன் அமைக்க வேண்டும் என்பது தொண்டர்களின் நீண்டநாள் கோரிக்கை. அந்தக் கோரிக்கை அப்படியே நிலுவையில் இருக்கிறது. நமக்கு எதிராக சசிகலாவோ தினகரனோ சென்றால், எந்தவிதத் தயக்கமும் இல்லாமல் விசாரணைக் கமிஷன் அமைப்போம். அப்போலோ மருத்துவமனையில் அப்போது இருந்த ஒட்டுமொத்த சசிகலா குடும்பத்தையும் விசாரிக்கச் சொல்வோம். இதன்பிறகு, நம்மை எதிர்க்க ஒருவரும் இருக்க மாட்டார்கள்' எனப் பேசியுள்ளனர். ஆகஸ்ட் 5-ம் தேதிக்குப் பிறகு தினகரனின் நடவடிக்கையைப் பொறுத்தே, எடப்பாடி பழனிசாமியின் வேகம் இருக்கும்" என்கிறார் அ.தி.மு.க தலைமைக் கழக நிர்வாகி ஒருவர்

மக்களுக்கு சேவை வழங்கும் மத்திய அரசின் மிகப்பெரிய துறைகளில் ஒன்று ரயில்வே. இந்தியா முழுக்க மக்களை ஒருங்கிணைத்தாலும்

இந்நிலையில் நாட்டில் முதன்முறையாக ரயில்வே டிக்கெட்டில் தமிழ் இடம்பெறும் என்ற இனிப்பான தகவல் வெளியாகி உள்ளது. அதற்கு காரணம் ஒரு தமிழர்; இந்திய ரயில்வேத்துறையின் முன்னாள் அதிகாரியும், அகில இந்திய ரயில்வே பயணிகள் மேம்பாட்டுவசதிகள் குழுவின் உறுப்பினருமான ஆசிர்வாதம் ஆச்சாரி.

டில்லியில் கடந்த 28ந்தேதி நடந்த அகில இந்திய ரயில் பயணிகள் வசதிகள் மேம்பாட்டு கமிட்டியின் கூட்டத்தில்தான் இந்த தமிழர்களுக்கு மகிழ்ச்சி தரும் இந்த முடிவு எடுக்கப்பட்டிருக்கிறது. ரயில்வே வாரிய அதிகாரிகள் மற்றும் இக்குழுவின் உறுப்பினர்கள் ஆகியோர் கலந்துகொண்ட இக்கூட்டத்தில், ரயில் பயணிகளின் பல்வேறு வசதிகள் குறித்த பல்வேறு கருத்துகள் பரிமாறப்பட்டன. அப்போது குழுவின் உறுப்பினர்களில் ஒருவரான ஆசிர்வாதம் ஆச்சாரி, தான் நீண்டகாலமாக வலியுறுத்திவந்த ரயில்வே டிக்கெட்டுகளில் தமிழ் மொழியை இடம்பெறச் செய்யும் கோரிக்கை மீது எடுக்கப்பட்ட நடவடிக்கை குறித்து கேள்வி எழுப்பினார். அதற்கு 'அதை செயல்படுத்த முடியாது என்றும் அதில் பல சிக்கல்கள் இருப்பதாகவும் அதிகாரிகள் தரப்பு மறுத்துள்ளது. அடுத்த ஒரு மணிநேரம் அதிகாரிகள் தரப்புக்கும் ஆசிர்வாதம் ஆச்சாரிக்கும் இடையே கடும் வாக்குவாதம் நிகழ்ந்ததாகச் சொல்லப்படுகிறது. ஆனால் இறுதியில் வென்றது தமிழ்தான்.

ஆம் விவாதத்தின் முடிவில் ரயில்வே டிக்கெட்டில் தமிழ் வாசகங்கள் இடம்பெறச்செய்ய அதிகாரிகள் ஒப்புக்கொண்டனர். இதன் முதற்கட்டமாக ரயில்வேத்துறையில் டிக்கெட் அச்சடிக்கப்பயன்படுத்திவந்த பழமையான சாஃப்ட்வேர் தொழில்நுட்பத்தைத் துார எறியும் முடிவுக்கு வந்துள்ளது ரயில்வேத்துறை.

ஆசிர்வாதம் ஆச்சாரிகுழுவின் உறுப்பினர்களில் ஒருவரும் இந்தக் கோரிக்கையை வலியுறுத்தியவருமான ஆசிர்வாதம் ஆச்சாரியிடம் பேசினோம். “மகிழ்ச்சியாக உள்ளது ரயில்வேத்துறையின் இந்த முடிவு. இந்தியா முழுவதிலுமிருந்தும் தமிழர்கள் கடந்த 2 நாள்களாக செல்போனில் பாராட்டுகளைத் தெரிவித்துவருகிறார்கள்”  என்றவரிடம் ரயில்வேத்துறையில் தமிழைப் புகுத்தியதன் பின்னணியில் நடந்தது என்ன, என்றோம்.

“அகில இந்திய ரயில்வே பயணிகள் வசதிகள் மேம்பாட்டுக் கமிட்டியின் உறுப்பினராக கடந்த ஆண்டு நியமிக்கப்பட்டேன். ரயில்களில் முன்பதிவு செய்யப்படாத பெட்டியின் எண்ணிக்கையை இரண்டாக உயர்த்தியது, கோவையில் பதினைந்து ஆண்டுகளாக பயணிகளிடம் பார்க்கிங் என்ற பெயரில் கொள்ளையடித்துவந்த ஒரு அரசியல் பின்னணி கொண்ட நபரின் அட்டூழியத்தை ஒழித்தது என பயணிகள் வசதிக்காக இந்த ஓராண்டில் பல பல விஷயங்களை நான் முன்னெடுத்து வெற்றிகண்டிருக்கிறேன். ஆனாலும் என் தாய் மொழிக்கு அங்கீகாரம் கிடைக்கச்செய்த இந்த பணியையே பெருமிதமாக கருதுகிறேன்” என்றார்.

தொடர்ந்து பேசிய ஆசிர்வாதம் ஆச்சாரி, “ரயில் டிக்கெட்டில் தமிழை இடம்பெறச் செய்த என் முயற்சிக்கு வயது 1. ரயில்வேத்துறையில் பணியாற்றிய காலத்திலேயே என் மனதில் பூத்த ஆசை இது. பின்னர் ரயில்வே பயணிகள் வசதிகள் மேம்பாட்டுக் கமிட்டியில் உறுப்பினராக ஆனபின் அதை செயல்பாட்டுக்குக் கொண்டுவரும் சரியான இடம் இது என முடிவெடுத்தேன். தொடர்ச்சியாக ஒவ்வொரு கூட்டத்திலும் இதைத் தொடர்ந்து வலியுறுத்திவந்தேன். ஆனாலும் ஒவ்வொரு முறையும் வாதபிரதிவாதங்களுடன் அது நின்றுபோகும். கடந்த 28ந்தேதி டில்லியில் ரயில்வே போர்டு அலுவலகத்தில் நடந்த அகில இந்திய ரயில் பயணிகள் வசதிகள் மேம்பாட்டு கமிட்டியின் கூட்டத்தில் மீண்டும் இதை வலியுறுத்தினேன். இம்முறை ஒரு முடிவாகவே என் வாதங்களை முன்வைத்தேன்.

' ரயில்வே என்பது ஏழை எளிய நடுத்தர மக்களுக்கான வாகனம். இதில் பயணம் செய்பவர்களில் பெரும்பாலானோர் படிக்காத பாமர மக்கள். ரயில்வேயின் வளர்ச்சிக்குக் காரணமான அந்த எளிய மனிதர்கள் தங்களின் மொழியில் ஒரு தகவல் இருந்தால் பெரிதும் மகிழ்வார்கள். மொழிவழி வசதி செய்து தருவது பயணிகளுக்கு நாம் செய்துதரும் அடிப்படை வசதிதானே தவிர அது பெரிய சலுகை அல்ல என்றதோடு, அதைக் கூட செய்துதரமுடியவில்லை என்றால் சேவை நிறுவனம் என்று சொல்வதில் அர்த்தம் இல்லை' என்றேன்  அதிகாரிகளிடம்.

அதற்கு அதிகாரிகள் தரப்பில் யாரும் ஒத்துக்கொள்ளவில்லை. உங்களின் ஒரு கோரிக்கைக்காக பெரிய சாஃப்ட்வேர் தொழில்நுட்பத்தை மாற்றமுடியாது. அதற்கான செலவு அதிகம் என உறுதியாக மறுத்தனர்.  ரயில்வேயில் டிக்கெட் அடிக்கப் பயன்படுத்தப்படும் கோபோல் எனப்படும் சாப்ட்வேர் தொழில்நுட்பம் 80 களில் அறிமுகமானது. நான் கல்லுாரியில் படித்த காலத்தில் உருவாக்கப்பட்ட சாப்ஃட்வேரையே ரயில்வேத்துறை கடந்த 30 ஆண்டுகளுக்கு மேலாக பயன்படுத்திவந்திருக்கிறது. இன்னும் சொல்லப்போனால் உலகில் வேறு எங்கும் இந்த சாஃப்ட்வேர் புழக்கத்தில் இல்லை. இவர்கள் பயன்படுத்தும் டாட்மேட்ரிக்ஸ் பிரின்டரும் இன்று வழக்கொழிந்துவிட்ட மாடல். தொழில்நுட்பத்தில் மிகவும் பின்தங்கியுள்ள ஆப்ரிக்காவில் கூட இன்றைய நவீன சாஃப்ட்வேர் பயன்படுத்தப்படுகிறது. டிஜிட்டல் இந்தியா என எங்கும் எதிலும் மோடி இந்தியாவை நவீனமயமாக்கும் முயற்சியில் தீவிரம் காட்டிவரும்வேளையில் இன்னும் அரதப்பழசான சாஃப்ட்வேரை பயன்படுத்துவது முரணான விஷயம். அதனால் அதை மாற்றி புதிய சாஃப்ட்வேரை உருவாக்குங்கள்' என்றேன் கோபமாக.

“உங்களால் முடியாது என்றால் சொல்லுங்கள். நானே ஒரு மேனேஜ்மென்ட் கன்ஸல்டன்ட்தான். என் சொந்தச் செலவில் மென்பொறியாளர்கள் குழுவை அமைத்து  புதிய சாஃப்ட்வேரைத் தயாரித்து ரயில்வேத்துறைக்கு வழங்குகிறேன்” என்றேன். இந்த வார்த்தை அதிகாரிகளுக்குச் சங்கடமாகிவிட்டது. பின்னர்தான் அதிகாரிகள் இதற்கு முக்கியத்துவம் அளித்தனர். பின்னர்தான் புதிய சாஃப்ட்வேரைப் பயன்படுத்தி சென்னையைத் தலைமையிடமாகக் கொண்டு ஓடும் ரயில்களில் வழங்கப்படும் டிக்கெட்டுகளில் இந்தி, ஆங்கிலம் இவற்றுடன் தமிழையும் இடம்பெறச்செய்வதாக உறுதியளித்தனர். அதேசமயம், 'தமிழுக்கு மட்டும் அளிக்கப்படும் இந்த முக்கியத்துவம் மற்ற மாநிலங்களில் சர்ச்சையை ஏற்படுத்தும்' என்றனர். 'அப்படியானால் பாரபட்சமின்றி இந்தியா முழுக்க இந்திய அரசியலமைப்பு சட்டத்தில் அங்கீகரிக்கப்பட்ட 20 மொழிகளுக்கும் அதை நீட்டித்தால் இன்னும் மகிழ்ச்சி' என்றேன். அதற்கு அதிகாரிகள் தரப்பு ஒப்புக்கொண்டது.

இதே துறையில் பணியாற்றியவன் என்பதும், இந்த முயற்சி வெற்றிபெற்றதற்கு ஒரு முக்கியக் காரணம். அந்த வகையில் ரயில்வேத்துறையில் சாதக, பாதகங்கள் அனைத்தும் அத்துப்படி என்பதால் நான் வைத்த வாதங்களை அதிகாரிகளால் மறுக்கமுடியவில்லை. வேறு யாராக இருந்தாலும் எதையாவது சொல்லி நிராகரித்திருப்பார்கள்.

கூட்டத்திலேயே இதை செயல்படுத்துவதற்கான கால அவகாசத்தையும் சொல்லும்படி வலியுறுத்தினோம். 6 மாத அவகாசம் அளித்தனர் அதிகாரிகள். இதன்படி இனி டில்லியில் ஓடும் ரயில்களுக்கான டிக்கெட்டுகளில் இனி இந்தி, ஆங்கிலம் இடம்பெறும். செகந்தராபத்தில் ஓடும் ரயில்களுக்கான டிக்கெட்டுகளில் இந்தி, ஆங்கிலம் இவற்றுடன் தெலுங்கு மொழி அச்சிடப்பட்டிருக்கும். சென்னையை மையமாகக்  கொண்டு ஓடும் ரயில்களில் இந்தி, ஆங்கிலம் இவற்றுடன் தமிழ் மொழி இடம்பெறும். இப்படி ஒவ்வொரு மாநிலங்களிலும் ஓடும் ரயில்களில் அந்தந்த மாநில மொழி இந்தி ஆங்கிலத்திற்கு அடுத்ததாக இடம்பெறும்” என்றார்.

“தமிழகத்தில் பெரும் அதிர்வலைகளை ஏற்படுத்திய சுவாதி கொலை வழக்கில் நுங்கம்பாக்கம் ரயில் நிலையத்தில் சிசிடிவி பொருத்தாதது பெரும் சர்ச்சையானது. அதன் எதிரொலியாக ரயில் பயணிகள் வசதிகள் மேம்பாட்டுக்குழு இந்தியா முழுக்க ரயில்நிலையங்களில் சிசிடிவி அமைக்க உள்ளதாக உறுதியளித்ததே...ஆனால் நுங்கம்பாக்கத்தில் இன்னமும் சிசிடிவி பொருத்தப்படவில்லையே என்றோம்.
“ இதற்கு முழுக்க முழுக்க அதிகாரிகளின் மெத்தனமே காரணம். சுவாதி கொலையைத் தொடர்ந்து அவர்களின் தந்தையைச் சந்தித்துப் பேசிய சில மணிநேரங்களில் தென்னக ரயில்வேயின் சென்னை கோட்ட நிர்வாகி அனுபம் ஷர்மாவைத் தொடர்பு கொண்டு பேசினேன். நுங்கம்பாக்கம் உள்ளிட்ட இந்தியா முழுக்க இதுபோன்ற சிசிடிவி இல்லாத ரயில்நிலையங்களைக் கணக்கெடுத்து நிர்பயா நிதியிலிருந்து அங்கு சிசிடிவி அமைக்க முடிவெடுக்கப்பட்டது. அதற்காக உடனடியாகப் பணம் ஒதுக்கப்பட்டது. ஆனால் டெண்டர் விடுவதில் குழப்பம் உருவானது. முதன்முறை விடப்பட்ட டெண்டர் ரத்து செய்யப்பட்டு ரீ டெண்டர் விட முடிவெடுத்த பின்னரும் அதிகாரிகள் இறுதி முடிவை எடுப்பதில் காலதாமதம் செய்தனர். கடந்த வாரம் நடந்த கூட்டத்தில் அதுபற்றியும் நான் கடுமையான வலியுறுத்தியபின் நடவடிக்கையைத் துரிதப்படுத்துவதாகத் தெரிவித்துள்ளனர். நுங்கம்பாக்கத்தில் இன்னும் சில நாள்களில் சிசிடிவி அமைக்கப்பட்டுவிடும்.

ரயில் பயணிகள் வசதிகள் மேம்பாட்டுக்குழு எதிர்காலத்தில் பயணிகளுக்கு செய்துதர உள்ள திட்டங்கள் என்னென்ன?

இந்தியாவில் பெரும்பாலான ரயில்நிலையங்கள் துர்நாற்றம், மின்விசிறி, மின்விளக்கு இல்லாமல் உள்ளே நுழையவே அருவருப்பு ஏற்படும் விதகமாக அடிப்படை சுகாதார வசதிகளின்றி உள்ளன. அப்படிப்பட்ட ரயில் நிலையங்கள் கணக்கெடுக்கப்பட்டு அவற்றை மேம்படுத்தத் திட்டமிட்டுள்ளோம். ரயில் நிலையத்தின் உள்ளே நுழைந்தால் ஒரு விமானநிலையத்திற்குள் வந்ததுபோன்ற பிரமை பயணிகளுக்கு வரவேண்டும். அத்தகைய ஒரு நவீனமயமானவைகளாக ரயில்நிலையங்கள் மாறும் நாள்கள் வெகுதொலைவில் இல்லை” என்றார்.
ரயில்வேத்துறைக்குத் தமிழ்மொழி மீது கொஞ்சம் ஓரவஞ்சனை உண்டு எப்போதும். வட இந்திய மக்களிடம் உள்ள தமிழ் மொழி மீதான வெறுப்பு மனநிலைக்குச் சான்று ரயில்வேத்துறை. அந்தளவுக்குத் தமிழ்மொழி அங்கு இரண்டாந்தரமாகவே இன்றுவரை மதிக்கப்பட்டு வருகிறது. இதனாலேயே தமிழகத்தில் மொழிப்பிரச்னை தீவிரமாகிற சமயங்களில் முதலில் தாரும் கையுமாக தமிழ் உணர்வாளர்கள் செல்வது ரயில் நிலையங்களை நோக்கித்தான். அந்தளவுக்கு ரயில்வே நிலையங்களில் தமிழ் மொழி புறக்கணிக்கப்படுவதாகக் கடந்த காலத்தில் புகைச்சல் இருந்ததுண்டு.

'சதுரங்க வேட்டை' படத்துக்குப் பிறகு, வினோத்தின் இயக்கத்தில் உருவாகிவரும் திரைப்படம், 'தீரன் அதிகாரம் ஒன்று' இந்தப் படத்தின் ஃபர்ஸ்ட் லுக் போஸ்டர் சமீபத்தில் வெளியாகி ஹிட் அடித்திருக்கிறது. படத்தின் டைட்டிலில் இருக்கும் ஃபயர், படத்தில் எந்த அளவுக்கு இருக்கும் என்பது பற்றித் தெரிந்துகொள்ள இயக்குநர் வினோத்தைத் தொடர்புகொண்டோம்.
'' 'தீரன் அதிகாரம் ஒன்று', ஒரு நேர்மையான போலீஸ் ஆபீஸரை மையமாகவைத்த கதைதான். இதற்காக, இந்தியா முழுக்கப் படப்பிடிப்பு நடத்தியுள்ளோம். 2005-ம் ஆண்டு செய்தித்தாளில் ஒரு செய்தி படித்தேன். அதைப் பற்றி படம் பண்ணலாம் என்று தோன்றியது. அந்தச் செய்தியை பேஸ் பண்ணி ஒரு கம்ப்ளீட் ஆக்‌ஷன் படத்துக்கான கதையை எழுதிவைத்தேன். அதுதான் இப்போது, 'தீரன் அதிகாரம் ஒன்று' என உருவாகியுள்ளது.  இந்தப் படத்தின் தீரன் திருமாறன் என்கிற கதாபாத்திரத்துக்காகக் கார்த்தியைப் பல போலீஸ் ஆபீஸர்களிடம் பயிற்சி எடுக்க வைத்தேன். 'சதுரங்க வேட்டை' படம், வசனத்துக்காகவே வெற்றி அடைந்தது என்ற பேச்சை உடைக்க வேண்டும் என்பதற்காகவே விஷூவல், ஆக்‌ஷனை பெரிதாகக் காட்டி, இந்தப் படத்தை எடுக்க நினைத்திருந்தேன். அதற்காக நிறைய  எஃபெக்ட் போட்டிருக்கிறேன். படம் பார்க்கிற ஆடியன்ஸ் அதை ஃபீல் பண்ணுவாங்க. சிறுத்தை படத்தில் கார்த்தி நடிச்ச ரத்னவேல் பாண்டியன் என்கிற போலீஸ் கேரக்டரும் இந்தப் படத்தில் அவர் நடித்திருக்கும் கேரக்டரும் எந்த இடத்திலும் ஒத்துப்போகாது.

'சதுரங்க வேட்டை'யில் ஒரு பெரிய ஹீரோ நடிச்சிருந்தா, தியேட்டரில் ஆடியன்ஸ் சப்போர்ட் கிடைச்சிருக்கும். தியேட்டரில் பார்த்தவர்களைவிட, டிவிடி, நெட்டில் பார்த்தவர்கள்தான் அதிகம். தயாரிப்பாளருக்குப் பாதிப்பு ஏற்படாமலிருக்க, இந்தப் படத்தை ஒரு பெரிய ஹீரோவை வைத்து எடுக்கிறேன். இது ஒரு கமர்ஷியல் படமாக இருக்கும்,  'தீரன்' என்கிற டைட்டிலை சுசீந்திரன் சார் பதிவு பண்ணியிருந்தார். தயாரிப்பாளருக்காக வேண்டி, அந்த டைட்டிலை சுசீந்திரன் சார் விட்டுக்கொடுத்தார். இதற்காக நான், அவருக்குப் பெரிய நன்றி சொல்லிக்கொள்கிறேன். இந்தப் படத்தை வட மாநிலங்களில் ஷூட் பண்ணினோம். அங்கு வெயில் கடுமையாக இருந்ததால், படப்பிடிப்புக் குழு மிகவும் சிரமத்துக்கு உள்ளானது. பலர் மயங்கி விழுந்த சம்பவமும் நடந்தது. எங்களுக்குத் தேவையான உதவிகளை புரொடக்‌ஷன் டீம் நல்லபடியா செய்து கொடுத்தாங்க. எல்லாருடைய உழைப்பும் சேர்ந்த 'தீரன் அதிகாரம் ஒன்று'  நிச்சயமாக மக்கள் மனதில் இடம்பிடிக்கும்'' என நம்பிக்கையுடன் கூறினார் வினோத்.

மனநிலை பாதிக்கப்பட்ட ஒரு பெண்ணை மேற்கு வங்க கிராம மக்கள் சேர்ந்து கட்டிவைத்து அடித்துக் கொன்ற சம்பவம் உலகளவில் அதிர்வலைகளை உருவாக்கியுள்ளது.

மேற்கு வங்கத்தில் மூர்ஷிதாபாத் என்னும் மாவட்டத்தில், ஒரு சிறிய கிராமத்தில் தான் இக்கொடிய சம்பவம் நடந்துள்ளது. ஓடேரா பிபி (Otera Bibi) என்னும் 42 வயது மனநலம் பாதிக்கப்பட்ட பெண் பெற்றோர்களுடன் மேற்கு வங்கத்தில் உள்ள ஒரு கிராமத்தில் வசித்து வந்துள்ளார்.

கடந்த செவ்வாய்க்கிழமை வழிதவறி பக்கத்து கிராமத்துக்குச் சென்றுவிட்டார் பிபி. அங்கு அவரைக் கண்ட ஒருவர், குழந்தையை கடத்தும் பெண் என்று கிராம மக்களிடம் பரப்பிவிட்டார். கிராம மக்கள் பிபியைப் பிடித்து டிராக்டரில் கட்டிவைத்து அடித்துள்ளனர். பிபி வலி தாங்க முடியாமல் கதறியுள்ளார். எதற்காக அடிக்கிறார்கள், தன்னைச் சுற்றி என்ன நடக்கிறது என்று எதையும் அறியும் சூழலில் பிபி இல்லை. பிபியின் ஆடைகளை அப்புறப்படுத்தி, தலைமுடியை வெட்டி மனிதாபிமானமன்றி நடந்துகொண்டுள்ளனர் அந்த கிராமத்து ஆண்கள்.

தகவலறிந்த மூர்ஷிதாபாத் காவல்துறையினர் சம்பவ இடத்துக்கு வந்து பிபியை மீட்டு மருத்துவமனையில் சேர்த்துள்ளனர். ஆனால், சிகிச்சை பலனின்றி பிபி இறந்துவிட்டார். அவரின் பெற்றோரை காவல்துறை கண்டுபிடித்து மருத்துவமனைக்கு அழைத்துவந்துள்ளது. பெற்றோர்,  பிபியின் உடலைப் பார்த்து கதறி அழுதுள்ளனர். பின்னர்தான் பிபி மனநிலை பாதிக்கப்பட்டவர் என்று காவல்துறைக்கு தெரியவந்துள்ளது. அந்தப் பெண்ணை அடித்தவர்கள் மீதும், அவரை பற்றி வதந்தி பரப்பியவர்கள் மீதும் நடவடிக்கை எடுக்கப்படும் என்று காவல்துறை தெரிவித்துள்ளது.

பிபி அடித்துக் கொல்லப்பட்ட காட்சியை அங்கிருந்த ஒருவர் வீடியோவாக எடுத்து சமூகவலைதளத்தில் பகிர, உலகளவில் அந்த வீடியோ பரவி அனைவரையும் சோகத்தில் ஆழ்த்தியுள்ளது.