!...Payanam...!

பிரச்னைகள் எப்போதும் தனித்து வருவது இல்லை’ என்பார்கள். உடல் பருமன் பிரச்னை வந்தாலே, நீரிழிவு, உயர் ரத்த அழுத்தம், முதுகு வலி, குழந்தைப்பேறு இன்மை, மூட்டு வலி, உளவியல் சிக்கல் மற்றும் மன அழுத்தம், மாரடைப்பு என அடுத்தடுத்து இதரப் பிரச்னைகளும் போனஸாக வரிசை கட்டும்.

உடல் எடை ஒரே நாளில் கூடிவிடுவது கிடையாது.

ஆனால், உடல் எடைக் குறைப்பு மட்டும் சில நாட்களில் நிகழ்ந்துவிட வேண்டும் என்று நாம் பேராசைப்படுகிறோம். ஒரே வாரத்தில் உடலை இளைக்கவைக்கும் பயிற்சி ஏதாவது இருக்கிறதா? என விளம்பரங்களைத் தேடி அலைகிறோம். உடல்பருமனில் இருந்து அபரிமிதமான உடற்பருமனுக்கு செல்லும்போது உடல் ஆரோக்கியத்தில் பாதிப்பு ஏற்படும். இந்தியர்களின் சராசரி பாஸல் மெட்டபாலிக் ரேட் (பி.எம்.ஆர்.) என்பது 1800 கலோரி. ஆனால், சராசரியாக இந்தியர்கள் எடுத்துக்கொள்ளும் உணவில் 3000 கலோரி உள்ளது. நம் உடல்வாகையும், உணவுப் பழக்கத்தையும் முறையாக ஆராய்ந்து, படிப்படியான மாற்றங்களை நமக்குள் நிகழ்த்தினால், நிச்சயம் உடல் பருமன் பிரச்னையை சரி செய்துவிட முடியும். இதோ, உங்களை நீங்களே அலசுவதற்கான அற்புத வழிகள்…

உங்கள் உடலில் உள்ள கொழுப்பின் அளவைப் பொறுத்து மட்டுமே நோய் அபாயம் அதிகரிப்பது கிடையாது. எங்கே, எவ்வளவு இருக்கிறது என்பதைப் பொறுத்து அது மாறும். ஈஸியாகப் புரிந்து கொள்வதற்காக, கொழுப்பு சேரும் இடத்தை ஆப்பிள் மாடல், பேரிக்காய் மாடல் என்று இரண்டு விதமாக வகைப்படுத்துகிறார்கள் மருத்துவர்கள். வயிற்றுப் பகுதியில் சேரும் கொழுப்பை ஆப்பிள் மாடல் என்றும், இடுப்பு மற்றும் பின்புறத்தில் சேரும் கொழுப்பை பேரிக்காய் மாடல் என்றும் கூறுவார்கள். இரண்டுமே மோசம்தான். பேரிக்காய் வடிவத்தினரைவிட ஆப்பிள் வடிவத்தினர்தான் அதிக ஜாக்கிரதையாக இருக்க வேண்டும். குறிப்பாக, இதய நோய் வருவதற்கான வாய்ப்புகள் அவர்களைவிட இவர்களுக்கு அதிகம்!

இடுப்பை அளவிடுங்கள்… அபாயத்தைக் கணக்கிடுங்கள்…

நீங்கள் (ஆப்பிள்) ஆணாக இருந்தால் இடுப்பின் அளவு 94 செ.மீ-க்கு (37 இன்ச்) அதிகமாகவும், பெண்ணாக இருந்தால் 80 செ.மீ-க்கு (32 இன்ச்) அதிகமாகவும் இருந்தால் எச்சரிக்கையாக இருக்க வேண்டும் என்று அர்த்தம். (பேரிக்காய்) ஆண்கள் 102 செ.மீ-க்கு (40 இன்ச்) அதிகமாகவும், பெண்கள் 88 செ.மீ-க்கு (35 இன்ச்) அதிகமாகவும் இருந்தால் கூடுதல் எச்சரிக்கை தேவை. இடுப்பு அளவைக் குறைக்கும் முயற்சியில் உடனடியாக ஈடுபட வேண்டியது அவசியம்!

திட்டமிட்ட ஆரோக்கிய உணவு

 ஆரோக்கியமான உணவு உங்கள் உடலுக்குத் தேவையான ஊட்டச் சத்தைக் கொடுப்பதுடன், உடல் எடையைக் குறைக்கவும் வழிவகுக்கும். இதனால் இதய நோய் மற்றும் சர்க்கரை நோய் வருவதற்கான வாய்ப்புகள் குறையும். ஆரோக்கியமான உணவுத் திட்டமிடல் என்பதில், கார்போஹைட்ரேட் மற்றும் கொழுப்புச் சத்து உள்ள உணவின் அளவைக் குறைத்து, அதிகக் காய்கறிகள், பழங்களை எடுத்துக்கொள்ளுதல், கொழுப்பு நீக்கப்பட்ட அல்லது குறைந்த அளவு கொழுப்பு உள்ள பால் எடுத்துக்கொள்ளுதல், இறைச்சி, மீன், முட்டை, பாதாம், முந்திரி ஆகியவற்றைக் குறைவாக எடுத்துக்கொள்ளுதல் போன்றவை அடங்கும். உணவில் சர்க்கரை மற்றும் உப்பின் அளவைக் குறைத்துக்கொள்ளவேண்டும். இப்படி சமச்சீரான உணவுப் பழக்கத்தைக் கடைப்பிடித்தாலே, உடல் எடை கட்டுப்படத் தொடங்கிவிடும்.

உடல் எடையைக் குறைக்க அதிக கலோரிகள் உள்ள உணவு மற்றும் பானங்கள் உட்கொள்வதைத் தவிர்க்க வேண்டும். சாப்பிடும் உணவில் இருந்து எந்த அளவு சக்தி கிடைக்கிறதோ, அதை உடம்பில் சேர்த்துவைக்காமல் அவ்வப்போது எரித்துவிட வேண்டும். அதாவது, உடல் உழைப்பின் மூலம் அவற்றைப் பயன்படுத்த வேண்டும். விளக்கமாகச் சொன்னால்… உண்ணுகிற உணவுக்கு ஏற்ப நடைப்பயிற்சி, உடற்பயிற்சி, நீச்சல் பயிற்சி என்று எது முடிகிறதோ, அதைச் செய்ய வேண்டும்.

உடல்பருமனால் அவதிப்படும் அதே நேரம், நீரிழிவு போன்ற பிரச்னை இல்லை என்றால் அவர்களுக்கு புதிய ஸ்லீவ் கேஸ்ட்ரக்டமி (Sleeve gastrectomy) அறுவைச் சிகிச்சை உள்ளது. இந்த அறுவைச் சிகிச்சையில், பசியைத் தூண்டும் க்ரெலின் (Ghrelin)) என்ற ஹார்மோன் அகற்றப்படும். மேலும், இரைப்பையின் அளவும் குறைக்கப்படும். இதனால் சாப்பிடும் அளவு மட்டுமே குறையும், ஊட்டச்சத்து கிரகிப்பது குறைக்கப்படாது. இந்த அறுவைச் சிகிச்சை முடித்த ஒரே ஆண்டில், உடல் எடை 70 சதவிகிதம் வரை குறைந்துவிடும். அபரிமிதமான உடல்பருமன் உள்ளவர்களுக்கு பை பாஸ் அறுவைச் சிகிச்சை தான் சிறந்தது. இதில் இரைப்பையின் அளவு குறைக்கப்படுவதுடன், ஊட்டச்சத்து கிரகிக்கப்படும் அளவும் குறைக்கப்படுகிறது. இதுதவிர, ரோபோட்டிக் அல்லது எண்டோஸ்கோப்பி மூலமாகவும் உடல்பருமன் அறுவைச் சிகிச்சை செய்யும் முறை இந்தியாவில் முதன்முறையாக சென்னையில் அறிமுகமாகியுள்ளது’ என்றார்.

உடல் எடை குறைய டாக்டர்கள், டயட்டீஷியன் அளிக்கும் உற்சாக வழிகள்…

காலை உணவு கண்டிப்பாகத் தேவை. குறைந்தது மூன்று வேளை உணவு அவசியம். ஆவியில் வேகவைத்த இட்லி, இடியாப்பம் போன்ற உணவுகளைச் சாப்பிடலாம்.

குறைந்தது நாள் ஒன்றுக்கு மூன்று லிட்டர் வரை தண்ணீர் குடிக்க வேண்டும். பசியுடன் இருக்காமல், ஆரோக்கிய உணவை நேரத்துடன், அளவோடு சாப்பிடுவது நல்லது.

உடல் பருமனுக்கு முக்கியக் காரணமான சாதத்தைக் குறைத்து, ஒரு பங்கு சாதம், இரண்டு பங்கு வேகவைத்த காய்கறிகள் என்று அளவாகச் சாப்பிடலாம். இரவில் சாதத்தைத் தவிர்த்து, தோசை, சப்பாத்தி போன்ற டிஃபன் வகைகள் பெட்டர்.

முட்டைக்கோஸ், வாழைத்தண்டு, பாகற்காய் போன்றவற்றை உணவில் அடிக்கடி சேர்த்துக் கொள்வது நல்லது.

பழ வகைகளில் மா, பலா, வாழை, சப்போட்டா ஆகிவற்றைத் தவிர்த்து, மிதமான இனிப்பு உள்ள சாத்துக்குடி, கொய்யாப் பழங்களைச் சாப்பிடலாம்.

அசைவப் பிரியர்கள் தோல் மற்றும் கொழுப்பு நீக்கப்பட்ட கோழி இறைச்சியைக் குழம்பு வைத்துச் சாப்பிடலாம். மீனை எண்ணெயில் பொரிக்காமல், குழம்புவைத்து சேர்த்துக்கொள்ளலாம். முட்டையின் வெள்ளைக் கருவை மட்டும் சாப்பிடலாம்.

குழந்தைகள் குறைந்தது ஒரு மணி நேரத்துக்காவது விளையாட்டு, உடற்பயிற்சிகளில் ஈடுபட வேண்டும்.

பெரியவர்கள் குறைந்தது 30 நிமிடங்கள் பிரிஸ்க் வாக்கிங் செய்ய வேண்டும்.

குடும்பமே தொலைக்காட்சியில் மூழ்கிக்கிடக்காமல், எல்லோரும் சேர்ந்து ஈடுபடும் ஏதாவது ஒரு விளையாட்டு அல்லது தோட்ட வேலை போன்ற கூட்டு வேலைகளில் ஈடுபடலாம்.

காலையில் எழுந்ததும் டீ, காபி குடிப்பதைத் தவிர்க்க முயற்சிக்கலாம். முடியாதவர்கள் பிளாக் டீ அல்லது பிளாக் காபியில் சர்க்கரையின் அளவைக் குறைத்து அருந்தலாம்.

கிழங்கு வகைகளில் மாவுச்சத்து அதிகமாக இருப்பதால், அவற்றை முற்றிலுமாகத் தவிர்ப்பது நல்லது.

லிபோசக்ஷன் என்ற கொழுப்பு உறிதல் சிகிச்சையும் உள்ளது. இது, உடலின் எந்தப் பகுதியில் உள்ள அதிகப்படியான கொழுப்பை அகற்ற வேண்டும் என்று நினைக்கிறோமோ, அந்த இடத்தில் செய்யப்படும்.

பொதுவாக, நாவை அடக்குவது என்பது மிகவும் கடினமான செயல். இனிப்பு, கொழுப்பு உணவுகளும் நிச்சயம் மகிழ்ச்சி அளிக்கக் கூடியதுதான். இவை அனைத்தையும் ஒரேயடியாகத் தவிர்த்தாலும், மனதளவில் தடுமாற்றமும், உற்சாகக் குறைவும் ஏற்படும். ‘எடுத்தேன் கவிழ்த்தேன்’ என்று உடல் எடையைக் குறைப்பதற்காக, உணவு மற்றும் உடற்பயிற்சியை மிக வேகமாக மாற்றிவிடக் கூடாது. கரைப்பார் கரைத்தால் கல்லும் கரையும்தானே… அதே பாணியில் பருமனையும் கரைப்போம்.

தயாரிப்பாளரின் ரத்தக் கண்ணீரை ஒரு கோப்பையில் பிடித்துக் குடிக்க சொன்னால், சப்புக் கொட்டிக்கொண்டே குடிக்கும் ஜீவன்களில் முக்கியமான ஜீவன், அப்படத்தில் நடிக்கும் ஹீரோதான். சின்ன ஹீரோக்களுக்கு வற்றிப்போன ரொட்டி கூட கிடைக்காது. அதுவே பெரிய ஹீரோக்கள் என்றால், தாகம் தீர்ப்பதென்றால் கூட நதி ஓட வேண்டும். இந்த ஜீவாதார மேடு பள்ளங்களை ஆராய்ந்தால் தித்திப்பும் கசப்புமாக திகட்ட திகட்ட நியூஸ் கொட்டும்.

நாம் சொல்ல வருவது முக்கியமான விஷயம். சம்பளத்தை ஆரம்பத்திலேயே மொத்தமாக கொடுங்க. அப்பதான் இமிடியெட் கால்ஷீட் என்று சொல்லி சொல்லியே படம் எடுக்கிற பணத்தையும் சேர்த்து அறுவடை செய்யும் ஹீரோக்கள், அந்த படம் முடிந்த பின்பு தயாரிப்பாளர் ரிலீசுக்கு படும் பாட்டை துளி கூட நினைத்துப் பார்ப்பதில்லை. ஆனால் இந்தியில் அப்படியில்லை. ஒரு சின்ன அட்வான்ஸ். படம் முடிந்து வியாபாரம் ஆன பின்தான் மீதி சம்பளம். அது யாராக இருந்தாலும்…

அப்படியொரு ஸ்டைலுக்கு வந்திருக்கிறார் அரவிந்த்சாமி. முன்னணி ஹீரோக்களுக்கு சற்றும் சளைக்காமல் சம்பளம் நிர்ணயிக்கும் அரவிந்த்சாமி, அந்த பணத்தை முதல்லயேகொடுய்யா… என்று பிடுங்கி எடுப்பதில்லை. ஒரு ரூபாய் அட்வான்ஸ். (நெசமாவே ஒரு சிங்கிள் ரூப்பிதான்ங்க) மிச்சத்தை வியாபாரம் செஞ்ச பின் கொடுங்க என்று கூறிவிடுகிறார். இதனால் ஹீரோவுக்கு ஆரம்பத்திலேயே கொட்டி அழும் பணத்தை வைத்துக் கொண்டு படத்தையே முடித்துவிடுகிறார்கள் தயாரிப்பாளர்கள்.

நேரில் மட்டுமல்ல… மனசாலும் அழகனாக விளங்கும் அரவிந்த்சாமியின் ஸ்டைலை பிற ஹீரோக்களுக்கு வற்புறுத்தியாவது கற்றுக் கொடுக்குமா தமிழ்சினிமா? இல்லேன்னா பொழைக்கறது கஷ்டம்ப்பா….

 அது பதட்டமும் பரபரப்புமாக ஓடிக்கொண்டிருந்த நேரம்.

தந்தி தொலைக் காட்சியின் ‘மக்கள் முன்னால்‘ நிகழ்ச்சிக்கு கருத்தாக்கக் குழு ஆசிரியராக இருந்த நேரம். சீமான் நெறியாளுமை செய்தார். வாரம் ஒரு தலைப்பிலான நிகழ்ச்சிக்கு அரசியல் கட்சி தலைவர்கள் மற்றும் சமூக ஆர்வலர்களை அழைத்தாக வேண்டும். பல நண்பர்களிடம் தொடர்பில் இருந்தேன். அப்படித்தான் திருவள்ளூர் மாவட்ட தினமலர் நிருபரான தம்பி தேவேந்திரன் ’மீஞ்சூர் கோபி’யை தரைமணி திரைப்பட படபிடிப்பு தளத்திற்கு அழைத்த வந்தார். ஏற்கனவே அறிந்திருந்த சகோதரர்தான். ஆனால் நிகழ்ச்சிகளில் பேசி கண்டதில்லை.

இன்றைய ஊடகங்களில் ‘வரும்’ சமூக ஆர்வலர்களுக்கான ‘கோட்வேட்’ ஏதுமில்லை கோபியிடம். அப்பட்டமான கிராமத்து முகம்.பேச்சும் அப்படித்தான். கண்கள் மட்டும் எரிந்து கொண்டிருந்தது அனலாக. இந்த நிகழ்ச்சிக்கு சரியாக இருக்குமா என்ற தயக்கம். ‘சாதாரணமா நினைக்காதீங்க. அடிச்சி பட்டைய கிளப்புவாரு அண்ணன்’ என்றார் தம்பி தேவா.

அதற்குள் தளத்திற்கு சீமான் அவர்கள் வந்துவிட்டார். கோபியைக் கண்டதும், ‘அடடே நீயாடா தம்பி, வா..வா என தழுவிக்கொண்டார். அவர்களுக்குள் அறிமுகம், பரவாயில்லை என்ற நிம்மதி. நிகழ்ச்சி தொடங்கி பரபரப்பாக நகர்ந்து கொண்டிருந்தது விவாதம்..

அப்போதுதான்.“ப்ளாஸ்டிக் கவர் வேண்டும் என்று நாங்களா வரிசையில நின்று மனுக்கொடுத்தோம். சாராயக்கடை வேண்டும்னு நாங்களா மனுக்கொடுத்தோம். யாரைக் கேட்டு இதையெல்லாம் கொண்டு வந்தீங்க.

ரோடு வேணும். தண்ணி வேணும். பள்ளிகூடம் வேணும்னு எத்தனையோ தேவைக்கு சுதந்திரம் வாங்கினதிலிருந்தே மனுக் கொடுத்து போராடி செத்துகிட்டிருக்கோமே. அதையெல்லாம் நிறைவேற்றாத அரசு, யாருமே கேட்காத ப்ளாஸ்டிக்கையும் சாராயத்தையும் என் தெருவில, என் வீட்டு வாசல்ல கொண்டு வந்து நிறுத்துகிறதே ஏன்? என் அப்பன் தாத்தன் எல்லாம் மஞ்ச பையிலதான எல்லாமும் வாங்கிகிட்டு இருந்தான். இப்ப எங்க கையில ப்ளாஸ்டிக் பையை யாரு தினிச்சது. நாங்க யாராவது வந்து, ‘ஐயா, சாமி, அந்த ப்ளாஸ்டிக் பை இல்லாட்டி சோறு தண்ணியில்லாம செத்துபோயிடுவோம்னு வந்து கேட்டோமா? அது எல்லாமும் முதலாளிகளுக்காக, பெரு முதலாளிகளுக்காக நீங்க கொண்டு வந்தீங்க. மக்களுக்காக என்ன செய்தீங்க…” என்று கோபி சீறிய போது அரங்கம் கை தட்டலில் அதிர்ந்தது. அவருக்குள் இருக்கும் நெருப்புக் கோபம் அன்றுதான் எனக்கு சுட்டது.

அதிலிருந்து தொடர்ச்சியாக வாய்ப்புள்ள நிகழ்ச்சிகளில் அந்த நெருப்பு மனிதனை பயன்படுத்திக் கொண்டேன்.

அப்போது தான் ஒரு நாள் சந்திக்கனும்ணே என்றார்.

வழக்கம் போல் வீட்டிற்கு வந்தார். அப்போது ‘கத்தி’ திரைப்படம் வெளியான நேரம். தன் கதை எப்படி திருடப்பட்டது, யார் யாரிடமெல்லாம் ஓடினேன் என்பதை சொல்லச் சொல்ல, மொட்டை மாடி காற்றிலும் எனக்கு புழுக்கம் அதிகரித்து.

ஒரு எளியவரின் கதையை, அறிவை, செல்வாக்கில் இருப்பவன் திருடும் வலியை நான் நிறையவே அனுபவித்திருக்கின்றேன். கலங்காதீர்கள். தோல்விகள் தான் நம்மை அடுத்த களங்களை நோக்கி நகர்த்தும். முன்பைக் காட்டிலும் நீங்கள் வேகமாக சுழன்றியங்குவீர்கள் என்றேன். அவரது சிரிப்பில் ஆயிரம் துரோகங்களும், அவமானங்களும் உள்வாங்கிய அலட்சியம் தெரிந்தது.

இரவு பத்து முப்பதுக்கு அவர் புறப்பட்டு போக, அதன் பிறகும் உறங்க பிடிக்காமல் மாடியிலேயே உட்கார்ந்திருந்தேன். அதிகாரம், செல்வாக்கு பெற்றவரிகள் திருட்டு எளியவர்களை எப்படியெல்லாம் அடித்து வீழ்த்துகிறது என்ற தவிப்பு, கோபம்.

அப்போதுதான், ‘நான்கு இட்லி+ ஒரு டீ= கத்தி சுட்ட கதை” என்ற பதிவை எழுதினேன். மனதை சுட்ட உண்மைகள் தான் அதில் இருந்தது. அடுத்த நாள் காலையிலேய பத்திரிகை நண்பர்களான ஆந்தை குமார், அந்தணன் உள்ளிட்ட பலரிடமும் அதைச் சொல்ல, அடுத்த சில மணி நேரங்களில் ஆன்லைன் மீடியாக்களில் பரபரப்பாகியது.
யாழ்பாணத்திலிருந்த என் பத்திரிகை நண்பர் Jegan Janakeswaran தொடர்பு கொண்டார். அந்த பதிவு உதயம் பத்திரிகையில் அப்படியே வந்தது. பேசுபொருளாக மாற இப்படி பல நண்பர்கள் பின் நின்றார்கள்.
அதோடு நின்று விடாமல், ஏதாவது செய்தாக வேண்டுமே என்று பலரிடமும் ஓடி நின்றார். வேண்டினார். புலம்பினார். எல்லாமும் பஞ்சாயத்தோடவே நின்றது. ஒவ்வொரு முறையும் சுவற்றில் அடித்த பந்தாகவே சோர்வுடன் திரும்பி வருவார். சோர்ந்து போகாதீர்கள் என்பேன். அப்போது ப்ரான்ஸில் இருந்த செந்தில்நாதன் சேகுவேரா உள்ளிட்ட பல நண்பர்களின் தொடர்பை ஏற்படுத்தினேன்.

கடைசியாக நீதி மன்றத்தில் வழக்கு போடுவதென்று முடிவானது. முதல் முயற்சியில் பிரபல வழக்கறிஞர்களும் பாதியில் நின்றுவிட இரண்டாவது கட்ட முயற்சி சரியாகவே பலனளித்தது. அந்த முயற்சிக்கு இரண்டு பேரின் சாட்சியம் வேண்டும். திருவள்ளூர் பத்திரிகையாளரான தம்பி தேவேந்திரனோடு, நீங்களும் சாட்சியமளிக்க வரவேண்டும் என்றார் கோபி.

ஒப்புக்கொண்டு சென்றேன்.

எழும்பூர் நீதி மன்றத்தில் காலையிலிருந்து காத்துக் கிடப்போம். கையில் காசு இருக்காது. இருப்பதை வைத்து டீ குடிப்பதோடு சரி.

ஒரு நாள், தம்பி தேவேந்திரன், வீட்லிருந்தே கறிசோறு எடுத்து வந்திருந்தார். கூடவே வறுத்த ஈரலும்..உருட்டி உருட்டி ஆளுக்கு நான்கு வாய் சாப்பிட்டோம். மாலையில் நீதிபதி அழைத்தார். அவர்முன் சாட்சியமளிக்க எல்லாமும் தட்டச்சு செய்யப்பட்டு, அதை சரி பார்த்து கையொப்பமிட்டு கிளம்புவதற்கே மாலையாகிவிட்டது.

இப்படி பல போராட்டங்கள். அவமானங்கள். சோர்ந்து போனாலும் துவண்டு விடவில்லை கோபி. தோல்விகளையே படிகற்களாக மாற்றிக் கொண்டிருந்தார் என்பதை அப்போது உணரவில்லை. அவர் பட்ட அவமானங்களை வேறு யாராகிலும் பட்டிருப்பார்களா? தெரியவில்லை. அனைத்தையும் உரமாக்கிக் கொண்டது அவரின் நெஞ்சுரம். அதுவும் அவரால் மேலே சென்றவர்கள் அவரைப் பார்த்து ஏலனத்தோடு சிரிக்கும் இடம் இருக்கிறதே…அது எதிரிக்குகூட வரக்கூடாது.

ஒவ்வொன்றிலிருந்தும் மீண்டு எழுந்தார். தன் முயற்சியில் சற்றும் தளராத விக்கிரமாதித்தன் என்பதற்கு நிகழ்கால உதாரணமானார்.

திடீரென்று ஒரு நாள் வந்தார். அறம் படம் குறித்த விஷயத்தை சொன்னார். மனதிற்கு மகிழ்ச்சியளித்தது. தடைகளும் தடங்கலும் வரலாம். விடாமல் நகர்த்தி முடிக்க வேண்டும் என பேசிக்கொண்டோம். பிறகு படப்பிடிப்பு தொடங்கியிருந்த போது ஒரு நாள் வந்தார். பத்திரிகையாளர்கள் பங்கெடுக்கும் காட்சியை பற்றி கூறி, அதற்கான ஒத்துழைப்பு வேண்டும் என்றார். அந்த நேரத்தில் எனக்கு ஒரு புத்தக வெளியீட்டு வேலை நெருக்கத்தில் இருக்க முடியாமல் போனது. ஆனாலும், ‘உங்களுக்கு தெரியாததையா நான் சொல்லிவிட முடியும் கோபி என்று கூறி அனுப்பினேன்.

இப்போது படத்தை பார்த்து முடித்து பல மணி நேரமாகிறது.

எனக்குள்ளான அந்த அதிர்வு இன்னும் நிற்கவில்லை. எனது 25 வருட சென்னை வாழ்க்கையில் திரையரங்கு சென்று பார்த்தது பத்து பதினைந்து படங்களுக்குள்ளாக தான் இருக்கும். எனக்கு அதில் நாட்டம் இருப்பதில்லை. நண்பர்களின் படம் என்றால் சிறப்புக் காட்சியின் போதே பார்த்துவிடுவதுண்டு. ஆனால் கோபி நயினாரின் அறம் படத்தை மக்களோடு மக்களாக அமர்ந்து பார்க்க வேண்டும் என்றே பார்த்தேன். என்னைப் போலவே என் அருகில் இருந்தவர்களும் நுனி சீட்டில் அமர்ந்து திகிலடிக்க பார்த்ததை கண்டேன்.

அந்த ஊடக காட்சிக்கள்தான் சற்று தொய்வு. ஆனாலும் குறையில்லை. சற்று மூச்சுவாங்கிக் கொண்டு நிமிர்ந்து பார்க்க அந்த காட்சிகள் தேவைப்படுகிறதுதான்.

தேர்வு செய்யப்பட்ட குளிர் காற்று வீசும் மலைப் பிரதேசங்கள் இல்லை. விருந்தினர் மாளிகைகள் இல்லை. கலை நயமிக்க வீடுகள், சாலைகள் என்றில்லை.

ஒரு கால் நூற்றாண்டில் பொட்டல் காடுகளாகி, சீமைக் கருவேல மரங்களாகி நின்ற இதோ இருக்கும் பூண்டி கடரோரப் பகுதி கிராமங்கள்தான். நெய்தல் நிலத்தை ஒட்டிய வேளாண் பகுதியாக இருந்த இடம்தான். அரசின் பல்வேறு திட்டங்களால் நிலத்தடி நீர் அற்று வறண்ட பூமியாக மாறிப்போன சாதாரண பொட்டல் பகுதிதான் படப்பிடிப்பு தளம்.

அதில் வரும் மனிதர்களும், அவர்கள் வாழும் குடியிருப்புகளும் கூட யாதார்த்தமானவைதான். முகப்பூச்சுகள் இல்லை, செட்டப்புகளும் இல்லை. அவர்கள் பேசிய வசனங்கள், கோபங்கள், கொந்தளிப்புகள்….என ஒவ்வொன்றும் ‘சினிமாவுக்கென்று’ படைக்கப்படவில்லை.

ஒவ்வொன்றுமே அந்த மக்களிடம் இருந்த நிஜம்.

கால் நூற்றாண்டாக அவர்களுக்குள் தேங்கியிருந்த கொந்தளிப்பு. இயக்குனர் கோபி நயினார் அதை அப்படியே திரைப்படத்தில் கடத்தியிருக்கிறார். சினிமாத்தனம் இல்லாத ‘மக்கள் கலைஞர்கள்’தான் இப்படி சாதிக்க முடியும் என்பதை மெய்பித்திருக்கிறார்.

மற்றொரு அதிசயமும் நிகழ்ந்திருக்கிறது. கதாநாயகி நயன்தாரா என்றவுடனே ஒரு பாடலுக்கே பத்து பதினைந்து உடையலங்காரம், உடல் அழகை வெளிப்படுத்தும் கோணங்கள், முத்தக் காட்சிகள் என்றிருக்கும் இன்றைய சினிமாக்களில், வெறும் இரண்டே இரண்டு புடவை ஜாக்கெட்டோடு ஒரு கதாநாயகியை, அதுவும் உடல் அழகை வெளிப்படுத்தாத கோணங்களில் காட்டி வெற்றியடைய வைப்பது கனவிலும் நடக்காத ஒன்று. ஆனால் ‘அறம்’ படத்தில் உண்மையாகி நிற்கிறது. அதுவும் பெறும் வெற்றியோடு. ஒரு கதாநாயகியை யார் எப்படி வெளிக் காட்டுகிறார்கள் என்பததான் இயக்குனரின் திறமை.

கோபி அழகை வெளிப்படுத்தி வெற்றி காண்பதில் நம்பிக்கை வைத்திருக்கவில்லை. மக்களின் அவலங்களை வெளிப்படுத்துவதில் நம்பிக்கை வைத்திருக்கிறார். அதை மெய்பித்தும் இருக்கிறார்.

சிறுமி ஆழ்துளை கிணற்றில் விழுந்து, அது மீட்கப்படும் பரபரப்பான அந்த திகிலடைந்த காட்சிகளுக்குள்ளாகவே தண்ணீர் அரசியல் குறித்தும், சூழலியல் குறித்தும், முதலாளி வர்கம் குறித்தும் என எல்லாமும் பேச முடியும் என்றால் அது யதார்த்த கலைஞன் கோபியால் மட்டுமே சாத்தியம் என்பதை சாதித்திருக்கிறார்.

ஆழ்துளை கிணறுக்குள் குழந்தை விழுந்துவிட்ட அந்த நேரத்தில் மோட்டார் சைக்கிளில் வந்து சருக்கி விழுந்து எழுந்தோடும் அந்த காட்சியாகட்டும், தீயணைப்பு வாகனத்தை ஒட்டி, இத்தூண்டு இடத்தில் பைக்கை ஓட்டி வந்து சறுக்கி விழுந்தபடியே எழுந்து ஓடும் காட்சிகளாகட்டும், பிரபல ஹாலிவுட் திரைப்பட சண்டைக் காட்சிகள் தோற்றுப்போகும். அவ்வளவு உயிர்ப்பு. உறைந்து உடைந்து நின்ற தருணங்கள் அது.

ஒளிப்பதிவு ஓம் பிரகாஷ்! ஜிப்ரானின் இசை, பாடலாசிரியர் உமா, இவர்களை எல்லாம் கட்டிக் கொண்டாட வேண்டும்.

சமீபத்தில் ஒரு படத்தின் பாடல் வெளியீட்டு விழா பிரபலங்கள் சூழ, மேல விமானத்தில் பறந்து பல ஆயிரம் அடிகள் உயரத்தில் இருந்து நவீன பாராசூட் பலூனில் குதித்து கொண்டாடினார்களே…

இந்த அறம் படத்தை கொண்டாட வேண்டும் என்றால் அதற்கும் மேல் நிலவைத்தான் தேட வேண்டும். இந்த ஆண்டின் மிகச் சிறந்த திரைப்படம்.

 விரைவில் திரைக்கு வரவிருக்கும் தீரன் அதிகாரம் ஒன்று படம் பற்றி கார்த்தி சொல்வதென்ன-

நம்ம எல்லாரும் போலீசை சூப்பர்மேன் போன்றும் , வேற்று கிரகத்தில் இருந்து இறங்கிவந்தவர்கள் போன்றும் பார்க்கிறோம். நமது வீட்டில் அண்ணனோ , தம்பியோ அல்லது நண்பர்களோ போலீசாக இருப்பார்கள். போலீஸ் அதிகாரிகள் அனைவரும் நம்மில் ஒருவர் தான் என்பதை நாம் புரிந்துகொள்ள வேண்டும். போலீஸ் அதிகாரிகள் எங்கிருந்து வருகிறார்கள். என்ன மாதிரியான குடும்ப சூழ்நிலையில் இருந்து வருகிறார்கள் என்ற விஷயம் தான் அவர்களை ஒரு வகையான போலீஸ் அதிகாரியாக மாற்றுகிறது.

போலீஸ் டிரைனிங்கில் அவர்கள் போலீசாக மாற மட்டும் தான் பயிற்சி அளிக்கப்படுகிறது. அவர்கள் எப்படிபட்ட போலீசாக இருக்கிறார்கள் என்பது அவர்களுடைய சூழ்நிலை தான் தீர்மானிக்கிறது. நான் தீரன் படத்துக்காக சந்தித்த போலீஸ் அதிகாரி ஒருவர் முதலில் கல்லூரியில் பேராசிரியராக ஆக வேண்டும் என்று தான் முயற்சி செய்துக்கொண்டிருந்திருக்கிறார் ஆனால் அவர்கள் சூழ்நிலையின் காரணமாக போலீஸ் அதிகாரியாக பணியாற்ற துவங்கியுள்ளார். முதலில் குற்றத்தை கண்டால் அவருக்கு கோபம் தான் வரும் , பதவியேற்றதும் அவர் கண் முன் நடக்கும் குற்றங்களை தட்டி கேட்கவும் முடிந்துள்ளது. இதனாலேயே போலீஸ் வேலையை அதிகமாக நேசித்து குற்றங்கள் நடப்பதை கட்டுபடுத்தியுள்ளார்.

தீரன்-னில் முற்றிலும் உண்மையான ஒரு போலீஸ் அதிகாரியை நீங்கள் பார்க்கலாம். சாதாரணமாக போலீஸ் அதிகாரி ஒருவர் கேஸ் பைலை படிக்கும் போது எப்படி ரீயாக்ட் செய்வாரோ அதே அளவு தான் தீரனும் இந்த படத்தில் ரீயாக்ட் செய்வார். இதை நான் சிறுத்தை படத்திற்காக ஒரு போலீஸ் அதிகாரியை சந்தித்தபோது சாதாரணமாக எதையும் எதிர்க்கொள்ளும் அவருடைய தன்மை எனக்கு பிடித்திருந்தது. அதை தான் பல காட்சிகளில் தீரன்-னில் நான் கடைபிடித்துள்ளேன். இயக்குநருக்கு அது மிகவும் பிடித்திருந்தது. தீரன்-னில் நீங்கள் வேறு ஒரு கோணத்தில் போலீஸ் அதிகாரிகளை பார்ப்பீர்கள். போலீஸ் அதிகாரிகளுக்கு தடங்கல் என்பது கிரிமினல் பக்கத்தில் இருந்து மட்டும் வராது. அதிகாரிகளிடமிருந்து , சமூகத்திடமிருந்து கூட வரும்.

இதையெல்லாம் தாண்டி தான் ஒவ்வொரு கேஸையும் அதிகாரிகள் கையாள வேண்டியுள்ளது. இதை சொல்லும் போது சாதரணமாக இருக்கும் திரையில் பார்க்கும் போது உங்கள் வியக்கவைக்கும். இது 1995-2005 வரைக்கும் நடந்த உண்மை சம்பவத்தை மையமாக கொண்டு எடுக்கப்பட்டுள்ள கதையாகும். அதை ஒரு போலீஸ் அதிகாரியின் வழ்க்கையின் மூலம் கூறியுள்ளோம். நாம் பார்க்கும் ஒரு சில விஷயங்களை மட்டும் தான் மொத்த காவல் துறை என நினைக்கிறோம். அது தவறு. நாம் அனைவரும் 8 மணி நேரம் வேலை செய்ய சம்பளம் வாங்குகிறோம். ஆனால் போலீஸ் அதிகாரிகள் ஒரு நாளைக்கு 22மணி நேரம் வேலை செய்கிறார்கள். அவர்களுக்கு விடுமுறை என்பதே கிடையாது. நாம் பார்க்கும் ஒரு சில விஷயங்களை மட்டும் வைத்துக்கொண்டு மொத்த காவல்துறையும் இப்படி தான் என்று கூறுவது தவறு.

மற்ற மாநில போலீஸ் அதிகாரிகளை விட தமிழ்நாட்டு போலீஸ் அதிகாரிகள் மேல் அனைவருக்கும் பயம் உண்டு. போலீஸ் அதிகாரியின் வாழ்க்கையாக தீரன் கதை நாம் சொல்கிறோம். தீரன்-னின் வாழ்க்கையை மாற்றிய ஒரு கேஸ் தான் இந்த படத்தின் கதை. நான் நடித்த கதாபத்திரங்களிலேயே எனக்கு “ நான் மகான் அல்ல “ படத்தில் நான் செய்த கதாபாத்திரம் தான் மிகவும் பிடிக்கும். என்னென்றால் நான் நிஜ வாழ்க்கையில் எப்படி இருப்பேனோ அப்படியே அந்த படத்தில் இருப்பேன். தீரன் வீட்டில் இருக்கும் போது “ நான் மகான் அல்ல “ படத்தில் வருவது போல ஒரு பையனாக இருப்பான். போலீசாக ஸ்டேஷனில் இருக்கும் போது வேறு ஒரு விதமாக இருப்பான். மற்ற படங்களில் வருவது போல் சத்தமாக பேசுவது போன்ற விஷயங்களை தவிர்த்து நிஜமாகவே போலீஸ் அதிகாரிகள் எப்படி இருப்பார்களோ அப்படியே இந்த படத்தில் இருக்க நான் முயற்சி செய்துள்ளேன்.

இந்த படத்தில் போலீஸ் அதிகாரியாக என்னை காண்பித்துக்கொள்ள பிட்னசையும் , நான் பார்த்த போலீஸ் அதிகாரிகளின் குனாதீசியங்களை , உடல்மொழியையும் பயன்படுத்தியுள்ளோம். இப்போதுள்ள இளம் போலீஸ் அதிகாரிகள் எல்லாம் மீசை இல்லாமல் தான் இருக்கிறார்கள். விட்டால் அவர்கள் எல்லாம் சினிமாவில் டூயட் பாடலாம். நிஜமாக இன்றைய போலீஸ் அதிகாரிகளின் தோற்றம் எப்படி இருக்குமோ அப்படி தான் என்னுடைய தூரமும் இந்த படத்தில் இருக்கும். ராஜஸ்தான் மாதிரியான ஒரு flat land-ல் நாம் ஒளிந்திருந்து எதிரிகளை பிடிக்க முடியாது. மண்னுக்குள் மறைந்து தான் பிடிக்க முடியும் அதனால் தான் ட்ரைலரில் அப்படி ஒரு காட்சி இடம்பெற்றது. அது கிராபிக்ஸ் அல்ல நிஜம் தான். நம் சமூகத்தில் நடைபெறும் பிரச்சனைகளை காணும் போது எனக்கு கோபம் வரதான் செய்கிறது.

சமீபத்தில் கந்து வட்டி பிரச்சனையால் தீ குளித்து பெண் குழந்தையோடு இறந்த அந்த சம்பவத்தை பார்த்த போது கோபம் வந்தது. இதை போன்ற சம்பவத்தை பார்க்கும் போது நாம் நடவடிக்கை எடுக்க வேண்டிய அந்த இடத்தில் இருக்க வேண்டும் என்று தோணும் என்றார் கார்த்தி.

ஹரி இயக்கத்தில் விக்ரம் தற்போது நடித்துவரும் சாமி 2வில் ஹீரோயினாக கீர்த்தி சுரேஷ் நடிக்கிறார்.

முதல் பகுதியில் ஹீரோயினாக நடித்த த்ரிஷாவுக்கு சிறிய நேரம் மட்டும் திரையில் வரும் அளவுக்கு முக்கியமில்லாத கதாபாத்திரம் மட்டும் கொடுக்கப்பட்டது.

அதனால் ஏற்பட்ட கருத்து வேறுபாட்டால் த்ரிஷா இந்த படத்தில் இருந்து விலகினார். இந்நிலையில் தற்போது விக்ரம் த்ரிஷாவை நேரில் சந்தித்து சமாதானபடுத்தியுள்ளார். அதன் பிறகு த்ரிஷா மீண்டும் படத்தில் இணையவுள்ளார் என தகவல் வெளியாகியுள்ளது.

நயன்தாரா நடிப்பில் கோபி இயக்கத்தில் கடந்த வாரம் திரைக்கு வந்த படம் அறம். இப்படம் அனைத்து தரப்பினர்களாலும் கொண்டாடப்பட்டு வருகின்றது.

இந்நிலையில் இப்படம் முதல் மூன்று நாட்களில் தமிழகம் முழுவதும் ரூ 4.4 கோடி வசூல் செய்தது, இதுதான் ஒரு ஹீரோயினுக்கு முக்கியத்துவம் கொடுத்து வந்த படங்களிலேயே மிகப்பெரிய ஓப்பனிங்.

தற்போது 5 நாள் முடிவில் அறம் தமிழகத்தில் மட்டுமே ரூ 6 கோடி வரை வசூல் செய்துள்ளதாக கூறப்படுகின்றது, எப்படியும் அறம் ரூ 12 கோடி வரை வசூல் வரும் என எதிர்ப்பார்க்கப்படுகின்றது.