!...Payanam...!

தமிழ்சினிமாவில் சாதிக் கதையை படமெடுக்கும் இயக்குனர்கள், அவரவர் சாதியை உயர்த்தி பிடிப்பது அவ்வப்போது நடப்பதுதான். இனி பாரதியார் பற்றி படமெடுத்தாலும், பூணூலை பிரதானமாக காட்டுகிற அளவுக்கு சாதிக்கு சப்போர்ட் பண்ண ஆரம்பித்துவிட்டது படைப்பாளிகள் மனசு! இந்த நிலையில்தான் “என் சமூகத்திற்காக தொடர்ந்து குரல் கொடுப்பேன்” என்று தெள்ளந் தெளிவாக கூறிவிட்டார் பா.ரஞ்சித். “கோட்டு போடுறதுதான் உனக்கு பிரச்சனைன்னா நான் போடுவேண்டா…” என்கிற அவரது கம்பீரக் குரலுக்கு சப்போர்ட் பாதி, சவுண்டு மீதியாக இருந்தாலும், மீண்டும் ரஜினியின் கால்ஷீட் என்பது ரஞ்சித்தின் தைரியத்துக்கு கிடைத்த வெற்றியன்றி வேறில்லை!

பா.ரஞ்சித்துக்கு ரஜினியின் கால்ஷீட் எப்போது என்பது இன்னும் வெளிப்படையாக தெரியவில்லை. அதற்குள் அவர் தனது திரைக்கதையை மெருகேற்றிக் கொள்வார் என்று நம்பலாம். (கபாலியின் சொதப்பல் இனிமேலும் நிகழக்கூடாதில்லையா) அப்படியே அந்த வேலையோடு வேறு படங்களை தயாரிக்கவும், வேறொரு படத்திற்கு கதை வசனம் எழுதித்தரவும் சம்மதித்திருக்கிறார் ரஞ்சித். அவரது இணை இயக்குனர் ஒருவர் இயக்கவிருக்கும் படத்திற்கு இவர்தான் கதை வசனம்.

இந்தப்படத்தில் அதர்வா ஹீரோவாக நடிக்கவிருப்பதாக தகவல் கசிகிறது. 1973 ம் வருடத்தில் நடந்த ஒரு உண்மை நிகழ்வைதான் கதையாக வடித்திருக்கிறாராம் ரஞ்சித். மறுபடியும் கோட்டு, கொள்கைன்னு வாரி விட்றாதீங்க ஐயா.

ஏன்னா ரஜினி பேச வேண்டிய வசனங்களை அதர்வா பேசினா உலகம் ஐயோன்னு ஆயிடும்!

காதலின் வடிவமான கவுதம் மேனன், ஆக்ஷன் பவுடரை அள்ளி பூசிக் கொண்டால் எப்படியிருக்கும்? இரண்டும் நடந்திருக்கிறது படத்தில்! ட்ரங்க் பெட்டிக்குள் ஆப்பிள் ஐ போனை வைத்துக் கொடுத்த மாதிரி பொருந்தாத பேக்கிங்…

‘வாழ்க்கையில நாம பிளான் பண்ணுனது நடக்காது. ஆனால் அதைவிட பயங்கரமா நடக்கும்’ என்று முதல் டயலாக் வைத்தபோதே யூகித்திருந்தால், சட்டையில் ஒட்டிய நாலு சொட்டு ரத்தத்தை தவிர்த்திருக்கலாம். எனிவே… ஜோடியா போனவங்களுக்கு மட்டும் சோக்கான முதல் பாதி கியாரண்டியப்போவ்…!

படித்துவிட்டு வேலைக்காக காத்திருக்கும் சிம்புவுக்கு, வீட்டுக்குள்ளேயே தேவதை கூடு கட்டுகிறது. தங்கையின் தோழி மஞ்சிமா சில நாட்கள் இவர் வீட்டில் தங்க வேண்டிய சூழ்நிலை. ஐஸ்கட்டியை கொண்டு வந்து உள்ளங் கைக்குக்குள் வைத்த பின், ஜில்லுக்கு குறைச்சல் என்ன? காதலின் இன்னொரு ஐகான் ஆன சிம்பு, உருகி உருகி வழிகிறார். ஏ.ஆர்.ரஹ்மானும், சிம்புவும், மஞ்சிமாவும், தாமரையுமாக சேர்ந்து நம்மை ஒரு கனவு மாளிகைக்குள் கடத்திக் கொண்டு போகிறார்கள். அடிக்கடி வரும் பாடல்கள் துளியாவது இம்சிக்க வேண்டுமே? இன்னும் இருக்கா… என்று ஏங்க வைக்கிறது. சட்டென்று மாறுது வானிலை… அப்புறம் என்ன? சிம்பு தன் தடந்தோள்கள் உயர்த்தி, தாறுமாறாக அடித்து, டப்பு டப்பென்று சுட்டு, செகண்ட் ஆஃப் சினிமாவை ‘தேமே’வாக்குகிறார். ஹ்ம்… என்னவோ ஆயிருச்சு கவுதம் மேனனுக்கு!

ரகசியமா பார்த்து, மனசுக்குள்ளேயே மழை பெய்ய வைச்சு, மஞ்சிமாவை மடக்கப் பார்க்கும் சிம்பு, “நாலு நாள் அப்படியே ஜாலியா பைக் டூர் போவலான்னு இருக்கேன். முதல்ல கன்னியாக்குமரி… அப்புறம் அப்படியே” என்று இழுக்க, ஆட்டத்திற்குள் இணைந்து கொள்கிறார் மஞ்சிமா. அதுவும் சிம்புவே எதிர்பார்க்காத அந்த ஸ்டார்ட்டிங் நிமிஷத்தில். ஜோடியாக கிளம்புகிற புறாக்கள், கன்னியாக்குமரியையும் தாண்டி, மஹாராஷ்டிரா வரை பயணிக்கிறது. அதுதான் மஞ்சிமாவின் சொந்த ஊர். “உங்க வந்து வீட்லேயே விட்டுட்டு போறேன்யா” என்று முனைப்பாகிற சிம்புவுக்கும், மஞ்சிமாவுக்கும் நேர்கிற அந்த வினாடி திருப்பம்… அதற்கப்புறம் படத்தையே வேறு திசையில் ஓட்டிக் கொண்டு கிளம்பிவிடுகிறது. மிச்ச மணித்துளிகள் சரியான ஆக்ஷன் மசாலா. வில்லனை பந்தாடி, காதலியை எப்படி காப்பாற்றினார் சிம்பு என்பதுதான் என்ட்.

துள்ளல் நிறைந்த அதே ஃபீலிங்ஸ் சிம்பு. நண்பர்களிடம் மஞ்சிமா பற்றி விவரிக்கும் போதெல்லாம், அப்படியே காற்றில் ஏறி கவிதையாய் மூச்சு விடுகிறார். “நம்ம காதல்தான் ஊருக்கே தெரியுமே?” என்று அவர் ஒரு டயலாக் விட, புரிந்து கொண்டு சிரிக்கிறது தியேட்டர். ஸ்கிரீனில் வெவ்வேறு வெயிட்டுகளிலும் லுக்குகளிலும் வந்தாலும், சிம்புவை ரசிக்க ஒரு நூறு வித்தைகள் இருக்கிறது அவரிடத்தில். கவுதமும் இவரும் சேரும்போதெல்லாம் நிகழும் காதல் மேஜிக்கை மட்டுமே ரசிக்க விரும்புகிறது ஊர். அப்புறம் ஏங்க சிம்புவுக்கு அந்த போலீஸ் கெட்டப்? “நான்தான் ரஜினிகாந்த்” என்று அவர் முரட்டுக் காட்டுவதெல்லாம் செம காமெடி பாஸ்…

இருபத்தியெட்டாவது பர்த் டேவுக்கு இப்பவே கேக் வெட்டிய ஷேப்பில் இருக்கிறார் மஞ்சிமா. அந்த அழகு முகத்தில் பட்டாம்பூச்சியாய் சிறகடிக்கும் கண்கள் மட்டும் ஸ்பெஷல் கிஃப்ட். மெல்லிய ஆச்சர்யங்களை மெனக்கடாமலே கொட்டுகிறது நடிப்பு. பிற்பாதி சினிமாவுக்கு மஞ்சிமா தேவைதான். அதனால் இருந்துவிட்டு போகட்டும் என்று அளந்து அளந்து காட்டுகிறார்கள். சுள்ளென்று வெயில் அடிக்கிறது தியேட்டரில்.

சிம்புவுக்கு இணையாகவே வருகிறார் பிரண்ட் சதீஷ். ஸ்பேஸ் கொடுத்த விதத்தில் சிம்புவுக்கும் பெரிய மனசுதான்!

படத்தின் ஹீரோ சிம்பு மட்டுமல்ல, ஏ.ஆர்.ரஹ்மானும், எடிட்டர் ஆன்ட்டனியும் கூட! தள்ளிப் போகாதே பாடல் செருகப்பட்டிருக்கும் அந்த இடம், செம ஷாக்! அதை பதமாக நிரவி, காட்சியின் வலியை நமக்கும் ஊட்டுகிற அந்த வித்தையில் விஸ்வரூபமாக உயர்ந்து நிற்கிறது ஆன்ட்டனியின் எடிட்டிங்! இப்படி ஒன்றல்ல, இரண்டல்ல, எல்லா சீன்களிலும் தன் இருப்பை காட்டுகிறது ஆன்ட்டனியின் திறமை.

பத்தே வினாடியில் பருப்பு துவையல் அரைச்சுடணும் என்கிற வேகத்தில் பாடப்பட்டிருக்கும் அந்த பைக் பாடல், எரிச்சலோ எரிச்சல். வரியும் புரியாமல், வார்த்தையும் புரியாமல் என்னய்யா ஸ்டைல் அது? மற்றபடி ரஹ்மானில் எல்லா பாடல்களும் ஏகாந்தம். சொர்க்கம்! தாமரையில் வரிகளில் அந்த ராஜாளி பாடல் அப்படியே அள்ளிக் கொண்டு போகிறது. படத்தில் சிம்புவின் பெயரே தெரியாமல் அவருடன் மஞ்சிமா லாங் டிரைவ் போவதும், இக்கட்டான நேரத்தில் வந்து ஐ லவ் யூ சொல்வதும் கவுதம் டச்!

ஒரு மொட்டை வில்லனை கடைசி வரைக்கும் விட்டு வைத்து, கதையை இழுத்துக் கொண்டே போகிறார் கவுதம். அதுவும் அந்த கலவரத்திற்கு இவர் சொல்ல வரும் பிளாஷ்பேக், சத்தியமா புரியல… அதனாலேயே அவுட்டோரில் கடலை கொரிக்க கிளம்பிவிடுகிறான் ரசிகன். எல்லாருமா சேர்ந்து பார்ட் 2 ன்னு கிளம்பிடாதீங்க பாஸ்.

இன்னும் ஆயிரம் ‘விண்ணை தாண்டி வருவாயா’ எடுத்தாலும், அசராமல் கைதட்ட ஒரு கூட்டம் இருக்கும் போது, அதையே தொடர்வதற்கு அச்சமென்ன கவுதம்?

அச்சமென்பது…. கவுதமின் ஆக்ஷன் மட்டுமே!

நிலா பூமிக்கு அருகில் வரும் நாள்தான் சூப்பர் நிலவு என்று கூறப்படுகிறது. அதன்படி 68 ஆண்டுகளுக்கு பிறகு நாளை வானில் சூப்பர் நிலவு தோன்றுகிறது.  இந்த நிகழ்வின் போது நிலா
வழக்கத்தை விட 14 சதவீதம் பெரியதாகவும், 30 சதவீதம் அதிக ஒளியுடனும்  தோன்றும் என்கின்றனர் விஞ்ஞானிகள்.

கடைசியாக கடந்த 1948-ம் ஆண்டு சூப்பர் நிலவு தோன்றியுள்ளது. அதன்படி நாளை காலை 6.21 மணிக்கு பூமிக்கு அருகில் வரும் என்றும், 8.52 மணிக்கு முழு நிலவையும் காணலாம் என்று கூறப்பட்டுள்ளது. 221, 523 மைல்கள் தொலைவில் நிலா வருவதால் நாளைய நிகழ்வு இந்த நூற்றாண்டின் மிகப்பெரிய சூப்பர் நிலவாக இருக்கும் என்கின்றனர். நாளை தோன்றும் சூப்பர் நிலவு அடுத்ததாக 2034-ஆம் ஆண்டுதான் வருமாம்.

இந்தியாவில், இனி பழைய 500 ரூபாய், 1000 ரூபாய் நோட்டுகள் செல்லாது' என மத்திய அரசு அறிவித்ததன் விளைவாக கடந்த இரு தினங்களாக இந்தியாவே ஸ்தம்பித்து உள்ளது. வியாபாரத் தளங்களில், 'புது ரூபாய் நோட்டுகள்தான் வேண்டும், அல்லது நூறு, ஐம்பதாக சில்லைறையாக வேண்டும்'  என்கிறார்கள் வியாபாரிகள் அனைவரும்.இதனால் பொதுமக்கள் அத்தியாவசியப் பொருட்களை வாங்குவதற்குக் கூட கடும் அவதிக்கு உள்ளாகி வருகின்றனர். மத்திய அரசு வங்கிகள், பெட்ரோல் பங்க், தபால் நிலையம், ரயில் நிலையங்கள் போன்ற இடங்களில் பழைய ரூபாய் நோட்டுகள் செல்லும் என அரசு அறிவித்து இருந்தது. ஆனால், கடந்த இரு தினங்களாக பல பெட்ரோல் பங்க் மற்றும் மருத்துவமனைகள் இந்த அறிவிப்புகளை காதில் வாங்கிக்கொள்ளாமல், 'புது ரூபாய் நோட்டுகளைத் தான் வாங்குவோம் அல்லது சில்லரையாகத்தான் வாங்குவோம்' என்று சொல்லிவருகிறது.

இந்த நிலையில், பழைய 500 மற்றும் 1000 ரூபாய் நோட்டுகள் வாங்க மாட்டோம் என்று அடம்பிடித்த மருத்துவமனை ஒன்றில், ஒரு ரூபாய், இரண்டு ரூபாய் நாணயங்களை 40 ஆயிரம் ரூபாய்க்கு மூட்டையாக கட்டி எடுத்துக்கொண்டு போய் தக்கப் பாடம் புகட்டியுள்ளார்.

கொல்கத்தாவைச் சேர்ந்தவர் சுகந்தா சாலே. சில தினங்களுக்கு முன் இவர் டெங்கு காய்ச்சலால் பாதிக்கப்பட்டதால், பி.பிபோடர் என்ற தனியார் மருத்துவமனையில் சிகிச்சைக்காக அனுமதிக்கப்பட்டுள்ளார். கடந்த புதன் கிழமையன்று இரவு, 'சிகிச்சை முடிந்தது. சிகிச்சைக்கான கட்டணம் ரூபாய் 40 ஆயிரத்தைக் கொடுத்துவிட்டு நோயாளியை அழைத்க்ச் செல்லலாம்' என மருத்துவமனை நிர்வாகம் கூறியுள்ளது.

இதனால், சுகந்தா சாலே குடும்பத்தினர் வங்கிக்குச் சென்று 500, 1000 ரூபாய் நோட்டுகளாக 40 ஆயிரத்தை எடுத்து வந்திருக்கின்றனர். ஆனால் துரதிர்ஷ்டவசமாக அன்று இரவே மத்திய அரசு, '500 ரூபாய் நோட்டுகள் மற்றும் 1000 ரூபாய் நோட்டுகள் செல்லாது' என அறிவித்துவிட்டது. இதனால், இவர்கள் கொடுத்த 500, 1000 ரூபாய் தாள்களை மருத்துவமனை நிர்வாகம் வாங்க மறுத்துவிட்டது. 'எங்களுக்கு 100 ரூபாய் மற்றும் 50 ரூபாய் தாள்களாகத்தான் வேண்டும்; அதுவரை நோயாளியை டிஸ்சார்ஜ் செய்ய இயலாது' என்றும் சொல்லியிருக்கின்றனர்.

'காசோலையாகத் தருகிறோம் டிஸ்சார்ஜ் செய்யுங்கள்' எனக் கேட்டதற்கும் மருத்துவமனை ஒப்புக்கொள்ளவில்லை. இதனால் ஆத்திரம் அடைந்த சுகந்தா சாலேவின் குடும்பத்தினர்கள் மருத்துவமனைக்குப் பாடம் புகட்ட நினைத்தார்கள். அதன்படியே வாட்ஸ்அப் மற்றும் ஃபேஸ்புக் வழியாக பிரச்னையைச் சொல்லி தனது நண்பர்கள், உறவினர்கள் மற்றும் தெரிந்தவர்களிடத்தில் ஒரு ரூபாய் மற்றும் இரண்டு ரூபாய் காசுகளாக அனுப்பும்படி உதவி கேட்டுள்ளனர்.

இந்த வகையில் அவர்கள் சேகரித்துக் கொடுத்த 40 ஆயிரம் சில்லரையையும் ஒரு மூட்டையில் கட்டிக்கொண்டு மருத்துவமனைக்குச் சென்றிருக்கிறார்கள் சுகந்தா சாலே குடும்பத்தினர். ஆனால், மருத்துவமனை நிர்வாகமோ இப்போது, 'சில்லரைகளாக வேண்டாம். காசோலையாக கொடுங்கள் வாங்கிக்கொள்கிறோம்' என்று யு டர்ன் அடித்திருக்கின்றனர். ''இந்தியாவில் மாற்றத் தக்க சில்லைறை காசுகளை கொடுக்கிறோம்.... நீங்கள் வேண்டாம் என்கிறீர்கள். வாங்க மறுத்தால் போலீஸ் ஸ்டேஷனில் புகார் கொடுப்போம்" என்று மிரட்டியுள்ளனர்.

இதன்பின்னர், 'சில்லறை காசுகளை வாங்குவதை தவிர வேறு வழியில்லை' என்ற முடிவுக்கு வந்த மருத்துவமனை நிர்வாகம், ஆறு ஊழியர்களைக் கொண்டு 'காசு சரியாக உள்ளதா?' என எண்ணிப் பார்த்தபிறகே, சுகந்தா சாலேவை டிஸ்சார்ஜ் செய்துள்ளது.

இதுவல்லவோ மருத்துவ சேவை!

கோவாவில் இரண்டு மிகப்பெரிய உட்கட்டமைப்பு திட்டங்களை துவக்கி வைத்து பேசிய மோடி, “கறுப்புப் பணத்தை ஒழிக்கவே மக்கள் எங்களை தேர்வு செய்தனர். எனக்கான அனைத்தையும் நாட்டுக்காக உதறி தள்ளிவிட்டேன்” என கண்ணீர் மல்க பேசியுள்ளார்.

கோவாவில் மோபா என்ற இடத்தில் க்ரீன் ஃபீல்ட் சர்வதேச விமான நிலையம் (greenfield airport) மற்றும் டெம் என்ற இடத்தில் மின்னனு நகரும் (electronic city) உருவாக்க, இன்று பிரதமர் மோடி அடிக்கல் நாட்டினார். இந்த விழாவில் பேசிய மோடி “அக்பர் தனது அமைச்சரவையில் ஒன்பது ரத்தினங்கள் உள்ளதாக குறிப்பிடுவார். அதே போன்று என்  அமைச்சரவையில் கோவாவில் இருந்து வந்த மனோகர் பாரிக்கர் உட்பட பல ரத்தினங்கள் இருப்பதை பெருமிதத்துடன் கூறிக் கொள்கிறேன்.

கறுப்புப் பணத்தை ஒழிக்கவே மக்கள் என்னை தேர்வு செய்தனர். வெளிநாட்டில் பதுக்கி வைக்கப்பட்டுள்ள கறுப்புப் பணத்தை வெளியே கொண்டு வருவது நம் கடமை. பல எம்.பி.,க்கள்  நகைகள் வாங்க பான் கார்டு கட்டாயம் வேண்டும் என்னும் விதி வேண்டாம் என என்னிடம் கூறியது அதிர்ச்சியளித்தது. மேலும் உயர் பதவியில் ஒரு நாற்காலியில் அமர்ந்து  வேடிக்கை பார்ப்பதில் விருப்பமில்லை. என் குடும்பம், வீடு என எனக்காக இருந்த அனைத்தையும் நாட்டுக்காக விட்டு வந்துள்ளேன்”, இவ்வாறு கண் கலங்கி பேசினார்.