!...Payanam...!

 தொண்டையில் சளி உண்டாவதையும், அதனால் ஏற்படும் தொந்தரவுகளையும் பெரும்பாலானோர் அனுபவித்திருப்போம்.

அதிலும் தொண்டையில் சளி இருந்தால் மூச்சு விடவே சிரமமாக இருக்கும்.

சுவாசமானது இயல்பாக இல்லையென்றால் அன்றாட தேவைகள் பூர்த்தி செய்யப்படாமல் இருக்கும்.

ஆவி பிடித்தல்

 தொண்டை சளி இறுகி இருந்தால், அப்போது சூடான நீரில் ஆவி பிடித்தால் நல்ல நிவாரணம் கிடைக்கும்.

தண்ணீர்

 கபம் மற்றும் சளியை தளர்த்த வேண்டுமெனில், தினமும் குறைந்தது எட்டு டம்ளர் தண்ணீராவது குடிக்க வேண்டும். இது உடல் ஆரோக்கியத்திற்கும் மிகவும் நல்லது.

சுத்தமான மூக்கு

 தொண்டையில் சளி தேங்காமல் இருக்க, மூக்கினை அடிக்கடி சுத்தம் செய்ய வேண்டும்.

உப்புத் தண்ணீர்
 சளி இருக்கும் போது வெதுவெதுப்பான தண்ணீருடன் உப்பைச் சேர்த்து அடிக்கடி வாய் கொப்பளிக்க வேண்டும்.

இதனால் தொண்டையில் உள்ள கிருமிகள் அழிந்து, தொண்டை கரகரப்பு நீங்கும்.

யூகலிப்டஸ் எண்ணெய்

 கபத்தைத் தளர்த்தவும் மற்றும் சளியின் இறுக்கத்தை போக்கவும், சிறிது யூகலிப்டஸ் எண்ணெயை வெந்நீரில் சேர்த்து ஆவி பிடித்தல் நல்லது.

மூலிகைத் தேநீர்

 சளியை குணப்படுத்த மூலிகைத் தேநீர் அல்லது கோழி சூப் போன்றவற்றை சூடாக பருகினால், தொண்டை இதமாக இருக்கும்.

மஞ்சள் தூள்

 சளி இருக்கும் பொழுது அரை டம்ளர் பாலுடன், சிறிது மஞ்சள் தூள் சேர்த்து பருக வேண்டும். ஏனேனில் மஞ்சள் தூளில் கிருமி நாசினிகளின் பண்பு அதிகமாக இருப்பதால், அதனைக் குடிக்கும் போது, தொண்டையில் உள்ள கிருமிகள் அழிந்துவிடும்.

காரமான உணவுகள்

 காரமான உணவுகளை சாப்பிட வேண்டும். ஹார்ஸ் முள்ளங்கி அல்லது ஹாட் சில்லி பெப்பர்ஸ் போன்ற உணவுகளை உட்கொள்வது சளி இறுகுவதை தவிர்க்கும்.

23 முறை கேட்ட கேள்வி:-

வசதியான வீடு ஒன்றின் வரவேற்பறை அது! 80 வயது மதிக்கத்தக்க முதியவர் ஒருவர் சன்னலுக்கருகில் சாய்வு நாற்காலியில் அமர்ந்திருக்கிறார். மூதாட்டியான அவரது மனைவி அவருக்கருகில் அமர்ந்து தனது இடுங்கியக் கண்களால் திருமறையை ஓதிக் கொண்டிருக்கிறார். நன்கு படித்து, பெரிய பதவியில் இருக்கும் 45 வயதுடைய அவர்களின் மகனும் தனது லேப்-டாப்பில் ஏதோ வேலை செய்துக் கொண்டிருக்கிறார்.

திடீரென ஒரு காகம் முதியவரின் அருகிலிருந்த சன்னலில் வந்து அமர்ந்தது.

“என்ன இது?” என்று கேட்டார் முதியவர்.

லேப்-டாப்பிலிருந்து கண்களை விளக்கிய மகன் சொன்னார், “அது ஒரு காகம்”

சில நிமிடங்கள் கழிந்தன. அந்த முதியவர் மீண்டும் கேட்டார், “என்ன இது?”

“இப்பத்தானே சொன்னேன், அது ஒரு காகம்” என்றார் மகன்.

சிறிது நேரம் கழித்து மூன்றாம் முறையாக அந்த முதியவர் தன் மகனிடம் கேட்டார், “என்ன இது?”

சற்று எரிச்சலான குரலில் மகன் பதிலளித்தார், “அது ஒரு காகம், காகம்!”

இன்னும் சிறிது நேரம் கழித்து அந்தத் தந்தை நான்காவது முறையாக அதே கேள்வியைக் கேட்டார், “என்ன இது?”

மகனோ பொறுமையை இழந்து விட்டார். தனது தந்தையைப் பார்த்து அவர் கத்தினார், “அதே கேள்வியை ஏன் திரும்பத் திரும்ப கேட்டுட்டே இருக்கீங்க? எத்தனை முறைதான் பதில் சொல்வது, ‘அது ஒரு காகம்’ என்று? இதைக்கூட உங்களால புரிஞ்சுக்க முடியலையா?”

முதுமை அடைந்து விட்டதால் மீண்டும் சிறு குழந்தை போல ஆனதாலோ என்னவோ, தந்தையின் முகத்தில் எந்தவித உணர்ச்சிகளும் தென்படவில்லை. அவருக்கருகில் அமர்ந்து அமைதியாகக் குர்ஆனை ஓதிக்கொண்டிருந்த அவரது மனைவி எழுந்து தமது அறைக்குச் சென்று திரும்பினார். அவரது கையில் மிகப் பழைய நாட்குறிப்பு ஒன்று இருந்தது.

அது அந்தத் தந்தையின் நாட்குறிப்பு. தன் மகன் பிறந்ததிலிருந்து அவர் அதில் எழுதி வந்தார். அதில் ஒரு பக்கத்தைத் திறந்தத் தாய் அதைத் தன் மகனிடம் கொடுத்து படிக்கச் சொன்னார்.

அந்தப் பக்கத்தில் இவ்வாறு எழுதப் பட்டிருந்தது;

“எனது சின்னஞ்சிறு மகன் என்னுடன் உட்கார்ந்திருக்கும்போது சன்னலில் ஒரு காகம் வந்தமர்ந்தது. என் மகன் ‘அது என்ன’ என்று 23 தடவைகள் கேட்டான். ‘அது ஒரு காகம்’ என்று நான் 23 தடவைகளும் பதில் சொன்னேன். அவன் ஒவ்வொரு முறை அந்தக் கேள்வியை கேட்டபோதும் நான் அவனை பாசத்துடன் அணைத்துக் கொண்டேன். அவன் திரும்பத் திரும்பக் கேட்ட அதே கேள்வி என்னை எரிச்சலடையச் செய்யவில்லை. அதற்கு மாறாக, கள்ளங்கபடமற்ற அச்சிறு குழந்தையின் மீது எனக்கு பிரியம்தான் அதிகமானது”.

இதைப் படித்த மகனின் கண்கள் பனித்து விட்டன. 23 தடவை அதே கேள்வியை கேட்டபோதும் தன் மீது பாசமழை பொழிந்த தன் தந்தை மீது எரிச்சலடைந்ததற்காக அவரது மனம் வருந்தியது.

உலகம் போற்ற ஆட்சி செய்த இராஜராஜனின் ஆட்சி அமைப்பு..!

இதில் ஆட்சி முறை அமைப்பும், இன்று மாவட்டங்கள் இருப்பது போன்று அன்று எப்படி மண்டலங்களாக ஆட்சிப் பிரிவுகள் இருந்தன என்பதும், ஆட்சிக்கு உறுதுணையாக இருந்த அலுவலர்களைப் பற்றியும் அறிந்துகொள்வோம்.

1. இராஜராஜன் காலத்து நாட்டுப் பிரிவு - மண்டலங்கள்.

2. அதிராசராச மண்டலம் (சேலம் மாவட்ட்த் தென்பகுதி - கோவை - திருச்சி மாவட்டங்கள்).

3. இராசராசப் பாண்டி மண்டலம் (மதுரை - இராமநாதபுரம் - திருநெல்வேலி மாவட்டங்கள்).

4. செயங்கொண்ட சோழ மண்டலம் (தென்னார்க்காடு - செங்கற்பட்டு - வடவார்க்காடு - சித்னர் மாவட்டங்கள்).

5. சோழ மண்டலம் (தஞ்சாவூர் மாவட்டம் - திருச்சி மாவட்ட கிழக்குப் பகுதி).

6. நிகரிலி சோழ மண்டலம் (மைவரின் தென்பகுதி - பெல்லாரி மாவட்டம்).

7. மலை மண்டலம் (திருவாங்கூர் - கொச்சி உள்ளடங்கிய சேரநாட்டு மேற்கு கடற்கரைப் பகுதி).

8. மும்முடிச் சோழ மண்டலம் (மைவரின் தென்பகுதி - சேலம் மாவட்ட வடபகுதி).

9. வேங்கை மண்டலம் (கிருட்டின - கோதாவரி ஆறுகளுக்கு இடைப்பட்ட கீழைச் சாளுக்கிய நாடு).

பேராட்சி முறையில் மன்னனுக்குத் துணை செய்த அலுவலர்கள்..

1. உத்திர மந்திரி
2. பெருந்தர அதிகாரிகள்
3. திருமந்திர ஓலை
4. திருமந்திர ஓலை நாயகம்
5. ஒப்பிட்டுப் புகுந்த கேழ்வி
6. வரியிலிடு
7. காடுவெட்டி
8. உடன் கூட்டத்து அதிகாரி
9. அனுக்கத் தொண்டன்
10. நடுவிருக்கை
11. விடையில் அதிகாரி
12. உள்வரி திணைக்களத்துக் கண்காணி
13. புரவரித் திணைக்களம்
14. புரவரி திணைக்களத்து நாயகம்
15. வரிப் பொத்தகம்
16. முகவெட்டி
17. வரிப்பொத்தகக் கணக்கு
18. வரியிலிடு புரவரி திணைக்களத்து நாயகம்
19. கடமை எழுதுவோன்
20. பட்டோலை
21. ராகாரிய ஆராய்ச்சி
22. விதிசெய்

பெண் அதிகாரிகள்..

அரசியின் ஆணையை நிரவேற்றிய பெண் அதிகாரி ”அதிகாரிச்சி” என்று அழைக்கப்பட்டாள். 

அஜீத்தை கடவுளாக பார்க்கும் ரசிகர்களால் கூட, விவேகம் படத்தை ஓட வைக்க முடியவில்லை. கூட்டிக் கழித்து கணக்கு போட்டு பார்த்தால், அவ்வளவும் அன்புச்செழியனின் வட்டிக்கு கூட தேறாத அளவுக்குதான் வசூல்! இருந்தாலும் படம் வெளிவந்த ஒரு வாரம் வரைக்கும் இந்திய திரையுலக சரித்திரத்தையே புரட்டிப் போட்ட படம் விவேகம் என்றெல்லாம் கூறி வந்தனர் ரசிகர்கள். ஆசை வேறு. நிஜம் வேறு என்பதை உணர்த்துகிற அறிவிப்புகளில் ஒன்றுதான் விசுவாசம்.

அதே சத்யஜோதி பிலிம்ஸ் நிறுவனத்திற்கு நஷ்டத்தை சரி செய்யும் விதத்தில் கால்ஷீட் கொடுத்திருக்கிறார் அஜீத். இந்த புதிய படத்தின் தலைப்புதான் விசுவாசம். கடந்த சில வாரங்களாக சினிமா பிரமுகர்களே கூட தனியார் தொலைக்காட்சி விவாதங்களில் விவேகம் நஷ்டம் என்று சொல்லி வருவதும் அதை சத்யஜோதி தியாகராஜன் கண்டு கொள்ளாமலிருப்பதும் சில பல விஷயங்களை மவுனமாக அறிவித்து வருகிறது.

இதெல்லாம் ஒரு பக்கம் இருக்கட்டும். தன் படங்கள் வரும்போதெல்லாம் அப்படத்தின் தலைப்பை அறிவிக்கவே மாதக் கணக்கில் இழுப்பது அஜீத்தின் ஸ்டைலாக இருந்தது. விவேகம் என்கிற தலைப்பே படம் முடிகிற நேரத்தில்தான் சொல்லப்பட்டது. இந்த அலட்டல் படத்தின் வெற்றிக்கு துளியும் உதவப்போவதில்லை என்பதை முதன் முறையாக உணர்ந்திருக்கிறார் அஜீத். அதனால்தான் இந்த முறை படப்பிடிப்புக்கு முன்பே விசுவாசம் என்ற தலைப்பை ரசிகர்களுக்கு தெரிவித்திருக்கிறார்.

அதுமட்டுமல்ல… ஒரு சினிமா என்றால் அதன் சடங்கு சம்பிரதாயங்கள் என்னவோ? அது விசுவாசத்தில் நடக்கட்டும் என்று பச்சைக் கொடி காட்டிவிட்டாராம். இனி குறித்த நேரத்தில் பர்ஸ்ட் லுக் வரும். ட்ரெய்லர் வரும். படத்தின் ஆடியோ வெளியீட்டு விழாவும் பிரமாண்டமாக நடக்கும். இந்த மாற்றத்தின் அவசியத்தை உணர்ந்து கொண்ட அஜீத், மீண்டும் முருங்கை மரம் ஏறாமலிருக்க வேண்டும். அதுதான் ரொம்ப முக்கியம்.

விலைமதிக்க முடியாத பொக்கிஷத்தைத் தேடி, கரடி, கழுதைப்புலி, காண்டாமிருகமெல்லாம் வாழும் அடர்ந்த காட்டுக்குள் ஐந்து பேர் சாகசப் பயணம் செல்லும் அதே இந்தியானா ஜோன்ஸின் இந்தியன் வெர்ஷன்தான் இந்திரஜித். இந்தியானா ஜோன்ஸ் - இந்திரஜித். டைட்டிலுக்கான காரணம் புரியுதா மக்களே...

பல ஆயிரம் ஆண்டுகளுக்கு முன் சூரியனிலிருந்து ஒரு துகள் பிரிந்து, பூமியை வந்து சேர்கிறது. பொதுவாக விண்கல் விழும் இடங்களில் புல், பூண்டுகூட முளைக்காது என்றுதான் ஹாலிவுட்காரர்கள் பயமுறுத்துவார்கள். ஆனால், இந்தப் படத்தில் விண்கலம் விழும் இடத்தில் புல், பூண்டு மட்டுமல்ல பூவெல்லாம் மலர்கிறது. அந்த அளவுக்கு பாஸிட்டிவ் பவர் கொண்ட அற்புதமான, ஆச்சரியமான, அதிசயமான கல். அதன் மருத்துவ சக்தியைச் சரியாகப் பயன்படுத்தினால், இப்போதுள்ள இந்தியாவை அடுத்துவரும் 400 ஆண்டுகளுக்கு நோய்-ஃப்ரீ நாடாக மாற்றலாம். எனவே, அதைத் தேடிக் கண்டுபிடித்து நாட்டின் சேவைக்காகப் பயன்படுத்த ஒரு ஹீரோ குழுவும் தனது தேவைக்காக பயன்படுத்த வில்லன் குழுவும் மூட்டை முடிச்சுகளோடு காட்டுக்குள் கிளம்புகிறார்கள். இறுதியாக, யார் கையில் அந்த அதிசயக் கல் கிடைத்தது என்பதுதான் `இந்திரஜித்' படத்தின் மீதிக்கதை.

நாயகன் இந்திரஜித்தாக கௌதம் கார்த்திக். இந்தியானா ஜோன்ஸ், பேர் கில்ஸ், டார்ஸான் அல்லது `ஜங்கிள் புக்' மோக்லியையாவது ரெஃபரென்ஸாக எடுத்துக்கொண்டு நடிக்க வேண்டியவர், `சந்தோஷ் சுப்ரமணியம்' ஜெனிலியாவை ரெஃபரென்ஸாக எடுத்துக்கொண்டு நடித்திருக்கிறார். குறும்புத்தனம் என அவர் காட்டும் சில `க்யூட்' எக்ஸ்பிரஷன்களைப் பார்க்கும்போது கிறுகிறுவென வருகிறது. கௌதம் கார்த்திக்கை சரியா யூஸ் பண்ணிக்கலை இயக்குநரே! படத்தில் `ஹேப்பி' எனும் கதாபாத்திரத்தில் சிஜியின் உதவியோடு ஒரு நாய்க்குட்டி நடித்திருக்கிறது. ஒட்டுமொத்த காட்டையுமே கொத்தமல்லி, கருவேப்பிலை போல அசால்ட் செய்யும் `ஹேப்பி' நாய்க்குட்டி, உண்மையிலேயே க்யூட். இவர்களைத் தவிர வேறு எந்தக் கதாபாத்திரமும் மனதில் நிற்கவில்லை. யாரெல்லாம் படத்தில் கோட் அணிந்திருக்கிறார்களோ அவர்கள் எல்லோருமே வில்லன்கள்தான். ஒரே ஒரு கேரக்டர் மட்டும் விதிவிலக்காக கோட் அணிந்து சுற்றிக் கொண்டிருக்க, `அது எப்படி இவரை மட்டும் விட்டு வைப்போம். இவரும் வில்லன்தான்' என அக்குல் பொங்கல் அடித்திருக்கிறார்கள். ஹீரோயினாக வரும் அஷ்ரிதா அழகு. நடிப்பதற்கான எந்த வாய்ப்புமே அவருக்கு இல்லை.

மேலே சொல்லியிருக்கும் கதையை முதல் 30 நிமிடத்திலேயே சொல்லிவிடுகிறார்கள். மீதிக்கதை என்று சொன்னது எல்லாமே நமக்கு சோகக்கதைதான். புதையலைத் தேடி காட்டுக்குள் பயணம்,  காட்டு விலங்குகளின் அட்டாக், ஹீரோவின் சாகசம் என விறுவிறு திரைக்கதை அமைக்க படத்தில் அத்தனை வாய்ப்புகள் இருந்தும் தவறவிட்டிருக்கிறார் இயக்குநர். அந்த அடர்ந்த அருணாசலப் பிரதேசக் காட்டை வண்டலூர் ஜூவைப்போல ட்ரீட் செய்திருக்கிறார்கள். காட்டெருமையே அடித்ததுபோல் படு பவர்ஃபுல்லாக அமைத்திருக்க வேண்டிய திரைக்கதை, கட்டெறும்பு கடித்தது போன்றுகூட அமைக்காமல் மிஸ் செய்திருக்கிறார்கள். `முத்துராமலிங்கம்' படத்தில் சொன்ன `மசாலாவை அரைச்சு வை' வசனத்தை கௌதம் கார்த்திக் இந்தப் படத்தின் இயக்குநரிடம் சொல்லியிருக்கலாம். தரமான விஷுவலை தந்திருக்கிறார் ஒளிப்பதிவாளர் ராசாமதி. படம் முழுக்க வரும் அனிமேஷன் காட்சிகள் `நூற்றுக்கு நூறு சதவிகிதம் தரம், பலம், நிறம்' இல்லையென்றாலும், 70 சதவிகிதமாவது `நச்' என இருக்கிறது. கேபியின் இசையில் பாடல்கள் ஓகே. பின்னணி இசையில் ஓர் இடம் `சம்போ சிவ சம்போ' பாடலை எல்லாம் ஞாபகப்படுத்துகிறது.

ஏழு கழுதை வயதான நமக்கு `இந்திரஜித்தை' கண்டாலே செம காண்டாகும் அல்லது காமெடியாக இருக்கும். ஆனால், சுட்டி விகடன் படிச்சுட்டு, சுட்டி டிவி பார்த்துகிட்டு திரியும் வாண்டுகளை நிச்சயம் `இந்திரஜித்' ஈர்ப்பான். வயசானாலும் நான் குழந்தைதான் என்பவர்களையும் நிச்சயம் ஈர்ப்பான்...

பாரதிராஜா காலத்திலிருந்தே கிராமத்துக் கதையை மண்வாசனையோடு முதல் படத்தை எடுக்க வேண்டும் என்ற ஆசை கோலிவுட்டின் பெரும்பான்மை உதவி இயக்குநர்களுக்கு உண்டு. அந்தவகையில் தஞ்சை மண்ணையும் மக்களையும் மையப்படுத்தி 'வீரையன்' திரைப்படத்தை இயக்கியிருக்கிறார் படத்தின் இயக்குநர் பரீத். அந்த முயற்சி எந்தளவுக்கு வொர்க் அவுட் ஆகியிருக்கிறது?

தன் சொத்துகளை எல்லாம் இழந்து தம்பிகளைப் படிக்க வைக்கிறார் 'வீரையன்' ஆடுகளம் நரேன். படித்தத் திமிரில் அண்ணனை மதிக்காமல் தம்பிகள் முறைக்க, 'உங்களைவிட பெரியாளா என் பையனை மாத்திக் காட்டுறேன்டா' எனச் சவால்விட்டு பையனைப் படிக்க வைக்கிறார். இன்னொருபுறம் ஊருக்குள் சின்னச் சின்ன திருட்டுகளைச் செய்து அடிவாங்கித் திரிகிற இனிகோ பிரபாகர், 'கயல்' வின்சென்ட், ப்ரீத்திஷா கூட்டணி. அப்படி அடிப்பவர்களில் வேல.ராமமூர்த்தியின் வீட்டு டிரைவரும் ஒருவர். பதிலுக்குப் பழிவாங்க அந்த டிரைவரும் ஊர்ப்பெரியவரான வேல.ராமமூர்த்தியின் மகளும் ஓடிப்போக இருக்கும் விஷயத்தைச் சபையில் சொல்லிவிடுகிறார்கள் இந்த மூவரும். அவமானத்தில் வேல.ராமமூர்த்தியின் மகள் தூக்கில் தொங்க, டிரைவருக்கு பைத்தியம் பிடித்துவிடுகிறது. இதற்கு நடுவே இனிகோ பிரபாகர் அண்ட் கோவால் நரேனின் மகன் படிப்பும் தடைபடுகிறது. இதனால் நரேன் குடும்பத்துக்கு என்னாகிறது... இனிகோ குழுவினர் தங்கள் தவறுகளைச் சரிசெய்ய என்னவெல்லாம் செய்கிறார்கள் என்பதுதான் கதை.

கதையை சிம்பிளாகச் சொல்லிவிட முடிகிறது இல்லையா. ஆனால், இதுதான் கதை என்பதைப் புரிந்துகொள்ள நான்கைந்து குரூப் டிஸ்கஷன்கள் நடத்த வேண்டியிருக்கின்றன. அந்த அளவுக்கு திரைக்கதையைக் குழப்பியடித்திருக்கிறார் இந்தப் படத்தின் இயக்குநரும் தயாரிப்பாளருமான பரீத். கதையின் நாயகனாக முயற்சி செய்துகொண்டிருக்கும் இனிகோ பிரபாகருக்கு, அதை ஓரளவுக்கு நிவர்த்தி செய்துகொடுத்திருக்கும் படம் இது. அவருடைய முகச் சாயலுக்கு கிராமத்துக் கதைகள் பொருந்துகிறதுதான். அவரும் முடிந்த அளவுக்குப் படத்தைத் தாங்கி நிற்க உழைத்திருக்கிறார். ஆனால், அதுமட்டுமே பத்தாதே ப்ரோ! வீ வான்ட் மோர் ரியாக்‌ஷன்ஸ்! 'கல்வி மட்டும்தான் ஒருவனை முன்னேற்றும்' கான்செஃப்டில் இருக்கும் அப்பாவாக நரேன், மகனின் படிப்புக்காக நிறைய உழைப்பதும், ஊர் பெருசுகளுக்கு டீ கொடுத்து, மகனின் பெருமையைப் பேசச்சொல்லிக் கேட்பது எனத் தனி டிராக்கில் ஸ்கோர் செய்கிறார். 'கயல்' படத்தில் லைக்ஸ் குவித்த வின்சென்ட் இதில் வழக்கமான நண்பனாக வந்து போகிறார். திருநங்கை பிரீத்திஷா ஹைடெசிபலில் பேசியே கவனம் ஈர்க்கிறார்.

'ஆடுகளம்' நரேன், வேல.ராமமூர்த்தி போன்ற வெயிட்டான நடிகர்கள் இருந்தும் கதையில் கனம் இல்லாததால் அவர்களும் வேறுவழியில்லாமல் கொடுத்ததை செய்துவிட்டுப் போகிறார்கள். பார்ப்பதற்குப் பாந்தமாக இருக்கும் ஹீரோயின் ஷைனிக்கும் திரையில் பெரிதாக வேலையில்லை. அருணகிரியின் இசையில் பாடல்களெல்லாம் எங்கேயோ கேட்டவை போலவே இருக்கின்றன. எடிட்டர் ராஜா முகமதுவின் கத்திரிகள் ஓவர்டைம் பார்த்திருப்பதால் நிறைய காட்சிகள் அந்தரத்தில் தொங்குகின்றன. கிளைகளாக ஆங்காங்கே தொங்கும் திரைக்கதையில், 'பூட்டு திருட்டு' எபிசோட் தனி ரசனையைக் கொடுக்கிறது. ஆனால், திரைக்கதையில் சீரியஸான காட்சிகளுக்கும் காமெடிக் காட்சிகளுக்கும் வித்தியாசம் காட்டுவதில் மெனக்கெடல் இல்லாதது, உணர்வுகளைக் கச்சிதமாகக் காட்சிப்படுத்தத் தவறியது போன்ற குறைகளால் படம் திக்குதெரியாமல் சுற்றுவதால், சில நல்ல காட்சிகளையும் 'ஜஸ்ட் லைக் தட்'டாகக் கடந்துபோகவேண்டிய கட்டாயம் வருகிறது.

படத்தின் மிகப்பெரிய ஆறுதல் முருகேஷாவின் ஒளிப்பதிவு. ஓப்பனிங் காட்சியில் கிராமத்துத் தெய்வம் 'வீரையன்' கோயிலில் விரியும் அவரின் கேமராக் கண்கள் வஞ்சகம் இல்லாமல் பட இறுதிவரையிலும் கிராமத்து அழகை அள்ளி அடைக்கிறது. கிராமத்தின் இயல்பான லைட்டிங்கையும் சிதிலமடைந்த கட்டடங்களையும் அவ்வளவு அழகாகப் பயன்படுத்தியிருக்கிறார். படத்தின் மிகப்பெரிய ஆறுதலாக ஒளிப்பதிவு மட்டுமே இறுதிவரை நம்மை இறுக்கிப்பிடித்து உட்காரவைக்கிறது.

தவிர, திரைக்கதை இலக்கே இல்லாமல் எகிறிக் குதிப்பதால் யார் வில்லன் எனக் கணிக்கவே முடியாது. 'என்னைப் பாத்துக்குற உன்னை, நான் பாத்துக்கமாட்டேனா?' - வாட்ஸ் அப் குட்மார்னிங் மெசேஜ்போல இருக்கும் இந்த வசனம், காதலர்கள் உரையாடிக்கொள்வது. இந்தமாதிரியான வசனங்களாலேயே காதல் எபிஸோடிலும் சரி, சென்டிமென்ட் காட்சிகளிலும் சரி அநியாயத்துக்கு நாடகத்தன்மை தெரிகிறது.


நான்கைந்து கதைகள், அவை வந்து ஒன்றிணையும் மையப்புள்ளி, க்ளைமாக்ஸ் டுவிஸ்ட் என யோசிக்கும்போது கச்சிதமான கிராமத்து கமர்ஷியலாகத்தான் யோசித்திருக்கிறார் இயக்குநர். 'நல்ல கதை, சுமாரான அல்லது மோசமான மேக்கிங்' என்பதுதான் பெரும்பாலான சிறுபட்ஜெட் படங்களில் இருக்கும் முக்கியமான பிரச்னை. அது இந்தப் படத்திலும் தொடர்வதால், 'வீரையனோடு' ஒன்றவே முடியாமல் போகிறது.

சென்னை, தி.நகரிலுள்ள சர் பிட்டி.தியாகராய ஹாலில் `அறம்', `விழித்திரு', `ஜோக்கர்' படங்களின் இயக்குநர்கள் கோபி நயினார், மீரா கதிரவன், ராஜூமுருகன் ஆகியோருக்கு, நேற்று மாலை (24.11.2017)  விடுதலை கலை இலக்கிய பேரவை மற்றும் மருதம் கலைக்கூடம் பாராட்டு விழா ஏற்பாடு செய்திருந்தது. விடுதலை சிறுத்தைகள் கட்சித் தலைவர் தொல்.திருமாவளவன் தலைமையில், பாடலாசிரியர் உமாதேவி, சி.பி.ஐ வீரபாண்டியன் ஆகியோரோடு இயக்குநர் பா.ரஞ்சித்தும் அந்நிகழ்வில் கலந்துகொண்டார்.

`அறம்' இயக்குநர் கோபி நயினாருக்கு சால்வை அணிவித்து மரியாதை செய்த இயக்குநர் ரஞ்சித், “மெட்ராஸ் படத்துக்கு `ஏ' சர்ட்டிஃபிகேட் கொடுத்தாங்க. ஏன்னு கேட்டத்துக்கு ரவுடிங்களைப் பத்தின படம்னு காரணம் சொன்னாங்க. இதுவரைக்கும் ஹவுசிங் போர்டு, ஸ்லம் போர்டு, சேரி, மீனவர் குப்பத்துல வசிக்கிற மக்கள்னா ரவுடின்னு கட்டியமைச்ச பொது புத்திதானே இதுக்கு காரணம். `அட்டகத்தி' படம் பண்ணப்போ வாழ்க்கைய பதிவு பண்ண ரொம்ப கஷ்டப்பட வேண்டியிருந்துச்சு. ஆனா, காலம் அப்படியே இல்ல. சாதி கூடாதுன்னு சேரிலயே பிரசாரம் பண்றதை விட்டுட்டு ஊர்த்தெருவுல நின்னு இன்னும் வீரியமா பிரசாரம் பண்ணினாதான் மாற்றம் வரும். அப்போதான் சமத்துவ சமுதாயம் பிறக்கும்" என்றார்.


தொடர்ந்து, "தோழர் ராஜுமுருகன் மாதிரியான இயக்குநர்கள் சமூகத்தை நெருக்கமா பார்த்து அவ்ளோ அழகா எழுதுறாங்க, படைப்பாக்குறாங்க. அவருடைய பார்வையில இந்த சமூகம் ஏன் சமத்துவமில்லாம இருக்குது, ஏன் இவ்வளவு பிரிவுகள்னு நிறைய கோபம். அவருக்குள்ள இருக்கிற கோபங்கள்தான் அவரோட படைப்பா வருது. ஆள்றவங்க, இந்த சமுகம் பிரிஞ்சே இருக்கணும், தலித், தலித் அல்லாதவங்கனு இருக்கணும்னு நினைக்கிறாங்க. ஆனா, சாதி இருக்கணும்னு சொல்றவங்க ஒரு பக்கமும் கூடாதுனு சொல்றவங்க ஒரு பக்கமுமாதான் இந்த சமூகம் பிரிஞ்சிருக்கு. இந்தப் பிரிவினை கண்டிப்பா ஒழியணும். மீரா கதிரவன் அண்ணன் பல குறியீடுகளோட அற்புதமான படமா, `விழித்திரு' படத்த உருவாக்கியிருந்தார். படம் எடுக்கிறது கஷ்டம்னா, அதை வெளியிடுறது ரொம்ப கஷ்டம், கஷ்டப்பட்டுதான் இந்தப் படத்தை வெளிய கொண்டு வந்திருக்கார். இப்பவரைக்கும் அது கொடுத்த துன்பங்கள்லயிருந்து மீளல. அவர் அடுத்தடுத்து இன்னும் நிறைய சிறந்த படங்களை கொடுக்கணும்னு கேட்டுக்குறேன்.

அண்ணன் கோபி நயினாரோட `அறம.' பல முக்கியமான பிரச்னையைத் தொட்டுப் பேசுது. இந்த மாதிரியான படங்கள் சமூகத்துக்கு ரொம்ப அவசியம். பல தயாரிப்பாளர்கள், நடிகர்கள் முன்வராதப்போ நயன்தாரா இந்தப் படத்தைப் பண்ண முன்வந்தது ரொம்ப பாராட்டப்பட வேண்டிய ஒண்ணு. அதனால்தான் அதில் சொல்லப்பட்ட கருத்துகள் பரவலா போய் சேர்ந்திருக்கு, விவாதமாகியிருக்கு. அப்படி விவாதமாகுறது ரொம்ப முக்கியம். கோபி அண்ணன் இதே மாதிரியான படங்களைத் தொடர்ந்து பண்ணனும். அவருக்கு என்னுடைய வாழ்த்துகள்.

இது தவிர, ஒரு சின்ன விளக்கம் தர வேண்டியிருக்கு. இப்ப சமூக வலைதளங்கள்ல நான் கோபி நயினார் அண்ணன் கிட்டே வேலை பார்த்ததாகவும் அவருடைய கதை டிஸ்கஷன்ல ஈடுபட்டதாகவும் பேசிக்கிட்டுருக்காங்க.  அதில் துளியும் உண்மை இல்லை. கோபி அண்ணன் என்னோட காலேஜ் சீனியர். அந்த வகையிலதான் அவரை எனக்குத் தெரியும். `மெட்ராஸ்' படம் திரைக்கு வர்றதுக்கு முன்னாடி, `கருப்பர் நகரம்' படம் மாதிரியே இருக்குன்னு ஒரு வழக்கு போட்டாங்க, நான் என் படத்தினுடைய டிவிடி, ஸ்கிரிப்ட் எல்லாம் சமர்ப்பிச்சு, `அந்தப் படம் வேற, `மெட்ராஸ்' வேற'னு கோர்ட்லயே நிரூபிச்சதுக்கு அப்புறம்தான் `மெட்ராஸ்' ரிலீஸ் ஆச்சு. இதைப் பத்தி அப்பவே கோபி நயினார் அண்ணன்கிட்ட பேசினேன். அந்தப் பிரச்னை அப்பவே முடிஞ்சு போச்சு. ஆனா, இப்போ சிலர் வேணும்னே கதைத் திருட்டு, அது இதுன்னு ஆதாரமில்லாமல் பொய் பிரசாரம் பண்றாங்க. எங்களுக்கு நடுவுல பிரச்னை உண்டுப்பண்ண பாக்குறாங்க. அவங்களுடைய முயற்சி பலிக்காது.


இங்கே வந்திருக்கும் இயக்குநர்கள், இயக்குநர் பிரம்மா நாங்க எல்லோரும் சேர்ந்து சமூக மாற்றத்துக்கான படைப்புகளைத் தொடர்ந்து கொடுப்போம். என்னுடைய தயாரிப்பில் ‘பரியேறும் பெருமாள்’ங்கிற படம் வருது. அது ரொம்ப முக்கியமான படைப்பா இருக்கும். அந்த படம் வந்தாலும் திட்டுவாங்க. திட்டட்டும் இன்னும் உற்சாகமா வேலை பார்ப்போம்” என்றார்.