!...Payanam...!

தமிழகத்தில் ஜல்லிக்கட்டு நடைபெறுவதை நிச்சயம் உறுதி செய்வோம் என்று தெரிவித்துள்ள முதல்வர் ஓ.பன்னீர்செல்வம்,  இதில் எள்ளளவும் பின்வாங்க மாட்டோம் என்றும்,  தமிழர்களின் பண்பாடு, கலாசாரம் ஆகியவற்றைக் கட்டிக் காப்போம் என்பதை உறுதிபட தெரிவித்துக் கொள்கிறேன் என்றும் கூறியுள்ளார்.

இது தொடர்பாக அவர் இன்று வெளியிட்டுள்ள அறிக்கையில், "தமிழர்களின் பண்டைய பண்பாடு, நாகரிகம் ஆகியவற்றை பிரதிபலிக்கும் வீர விளையாட்டான ஜல்லிக்கட்டு இந்த ஆண்டு தமிழகத்தில் நடத்தப்படுவதற்கு ஏதுவாக மத்திய அரசு அவசர சட்டம் ஒன்றை பிறப்பிக்க வேண்டுமென பிரதமருக்கு 9.1.2017 அன்று கடிதம் ஒன்றை எழுதியுள்ளேன்.  இது பற்றி மத்திய அரசிடமிருந்து எந்தவித பதிலும் இதுவரை பெறப்படவில்லை.  இந்நிலையில் ஜல்லிக்கட்டு நடத்தப்படவேண்டுமென்று வலியுறுத்தி பல அமைப்புகளும் போராட்டங்களில் ஈடுபட்டு வருகின்றன.  மேலும் பலஅரசியல் கட்சித் தலைவர்களும் பல்வேறு கருத்துகளை தெரிவித்து வருகின்றனர். எனவே, ஜல்லிக்கட்டு நடைபெறுவது பற்றிய விளக்கத்தை தமிழக மக்களுக்கு தெரிவிப்பது எனது கடமை என கருதுகிறன்.

ஜல்லிக்கட்டு தொடர்பாக பல்வேறு வழக்குகள் நீதிமன்றங்களில் தாக்கல் செய்யப்பட்டு, இறுதியாக 7.5.2014 அன்று உச்ச நீதிமன்றம் ஜல்லிக்கட்டு நிகழ்ச்சிக்கு ஒட்டுமொத்த தடை விதித்து தீர்ப்பளித்தது.  2006-ம் ஆண்டு மதுரை மாவட்டத்திலுள்ள அலங்காநல்லூரில் ஜல்லிக்கட்டு நடத்துவதற்கு தடை விதிக்கக் கோரி நாகராஜ் என்பவரால் வழக்கு ஒன்று தொடரப்பட்டது.  இந்த வழக்கு நிலுவையில் இருந்த போதே, ராமநாதபுரம் மாவட்டத்தில் மகா கும்பாபிஷேக திருவிழாவினை ஒட்டி மாட்டுவண்டி பந்தயம் ஒன்றை நடத்த அனுமதிக்குமாறு முனியசாமி என்பவர் சென்னை உயர் நீதிமன்ற மதுரை கிளையில் வழக்கு தொடர்ந்தார். இம்மனுவினை விசாரித்த உயர் நீதிமன்றம் மாட்டுவண்டி பந்தயம் மற்றும் ஜல்லிக்கட்டு நிகழ்ச்சி ஆகியவற்றுக்குத்  தடைவிதித்து 29.3.2006 அன்று உத்தரவு பிறப்பித்தது.  இதனை எதிர்த்து, 2006 -ம் ஆண்டு ஏப்ரல் மாதம் சென்னை உயர் நீதிமன்ற மதுரைக் கிளை அமர்வில் தமிழ்நாடு அரசு மேல்முறையீடு செய்தது.  இந்த அமர்வு நீதிமன்றம் 9.3.2007 அன்று பிறப்பித்த உத்தரவில் கிராமப் புற விளையாட்டின் மீது முழுமையாக தடை விதித்தது தவறு என்றும், இதனை நெறிமுறைப்படுத்தி நடத்தலாம் என்றும் ஆணையிட்டது.  இந்த தீர்ப்பினை எதிர்த்து, இந்திய பிராணிகள் நல வாரியத்தால் உச்ச நீதிமன்றத்தில் சிறப்பு விடுப்புக் கால வழக்கு 9.7.2007 அன்று தாக்கல் செய்யப்பட்டது.  உச்ச நீதிமன்றம்  27.7.2007 அன்று தடையாணை ஒன்றை பிறப்பித்தது.  இந்த தடையினை நீக்கக் கோரி விண்ணப்பங்கள் அளிக்கப்பட்டதைத் தொடர்ந்து, ரேக்ளா பந்தயம் மற்றும் ஜல்லிக்கட்டு ஆகியவை காவல் துறை மற்றும் மாவட்ட ஆட்சியர் தலைமையில் பிராணிகள் மற்றும் மனிதர்களுக்கு எவ்வித துன்புறுத்தலும் இல்லாமல் நடத்திட உச்ச நீதிமன்றம் அனுமதி அளித்தது.

உச்ச நீதிமன்றம் தனது 15.1.2008 நாளிட்ட ஆணையில் ஜல்லிக்கட்டு நெறிமுறைகளை கண்டிப்பாக கடைபிடிக்க வேண்டும் என்றும் பிராணிகளை பாதுகாக்க முன்னெச்சரிக்கை நடவடிக்கை எடுக்கப்பட்டு ஜல்லிக்கட்டு நிகழ்ச்சிகள் நடத்தப்பட வேண்டும்  என்றும் தெரிவித்தது.  இதனடிப்படையில் தமிழ்நாடு அரசால் தமிழ்நாடு  ஜல்லிக்கட்டு நெறிமுறை சட்டம்  2009 என்ற ஒரு சட்டம்  இயற்றப்பட்டது.     25.11.2010  அன்று உச்ச நீதிமன்றத்தால் வழங்கப்பட்ட இடைக்கால ஆணையில், மாவட்ட ஆட்சியர்கள், ஜல்லிக்கட்டு நிகழ்ச்சியில் பங்குபெறும் காளைகள், இந்திய பிராணிகள் நல வாரியத்தில் பதிவு செய்யப்பட்டுள்ளதை உறுதி செய்ய வேண்டும் என்றும்,  அதே போன்று பிராணிகள் நல வாரியம் ஜல்லிக்கட்டு நிகழ்வுகளை கண்காணிக்க அதன் பிரதிநிதிகளை அனுப்ப வேண்டும் என்றும்,  கால்நடை மருத்துவர்கள் குழு, நிகழ்ச்சி நடைபெறும் இடத்திலிருந்து நிகழ்வுகளில் பங்குபெறும் காளைகளை பரிசோதித்து சான்று அளிப்பதுடன், காயம்படும் காளைகளுக்கு சிகிச்சை அளிப்பார்கள் என்றும், ஜல்லிக்கட்டு நிகழ்வின் போது, விபத்து அல்லது காயம் அடைகின்ற ஜல்லிக்கட்டு வீரர்கள் மற்றும் குடும்பத்தினர் பயன்பெறும் வகையில், ஜல்லிக்கட்டு நிகழ்ச்சி நடத்துபவர்கள் சிறிய நிகழ்வுகளுக்கு 2 லட்சம் ரூபாயும்,  பெரிய நிகழ்வுகளுக்கு 5 லட்சம் ரூபாயும்  வைப்புத் தொகையாக செலுத்த வேண்டும் என்றும்  விரிவான நெறிமுறை வழங்கப்பட்டது.  இவ்வாணையினை எதிர்த்து பீட்டா  என்ற அமைப்பு வழக்கு ஒன்றைத் தொடுத்தது.  உச்ச நீதிமன்றம் இவ்வழக்கையும் மூலவழக்குடன் சேர்த்து விசாரிக்க ஆணையிட்டது. அவ்வப்போது உச்ச நீதிமன்றம் வழங்கிய ஆணைகளின் அடிப்படையில் ஜல்லிக்கட்டு நடைபெற்று வந்த சூழ்நிலையில், 2011-ம் ஆண்டு ஜனவரி மாதம்  மத்திய சுற்றுச்சூழல் மற்றும் வன அமைச்சகத்தின் பிராணிகள் நலப் பிரிவு,  ஜல்லிக்கட்டு நிகழ்வு, பழக்கப்பட்ட விலங்கின் செயலைக் காட்சிப்படுத்துவது எனக் குறிப்பிட்டு, எனவே அவை தடை செய்யப்பட வேண்டும் என பரிந்துரைத்து பிராணிகளுக்கு இழைக்கப்படும் தீங்கினை தடுத்தல் சட்டத்தின் பிரிவு 22-ன் கீழ் புலிகள், கரடிகள் ஆகியவைகளுடன் காளையையும் சேர்க்க வேண்டும் என பரிந்துரைத்தது.  இதன் அடிப்படையில், தி.மு.க அங்கம் வகித்த காங்கிரஸ் கூட்டணி அரசு தனது 11.7.2011 நாளிட்ட அறிவிக்கையில் காளையையும் இந்தப் பட்டியலில் சேர்த்து அறிவிக்கை ஒன்றை வெளியிட்டது.

ஜனவரி 2012-ல் ராதாராஜன் மற்றும் பிராணிகள் நல வாரியத்தினர்,  காளைகள் ஜல்லிக்கட்டு நிகழ்ச்சியில் பங்கேற்பதை தடை விதிக்கக் கோரி சென்னை உயர் நீதிமன்ற மதுரை கிளையில் மனு ஒன்றை தாக்கல் செய்தனர்.  ஜல்லிக்கட்டு நிகழ்ச்சி நடத்துவதற்கு கூடுதல் முன்னெச்சரிக்கை நடவடிக்கைகளை வகுத்து சென்னை உயர் நீதிமன்ற மதுரை கிளையில் தமிழக அரசால் பதில் மனு தாக்கல் செய்யப்பட்டது.  அம்மனுவினை சென்னை உயர் நீதிமன்ற  மதுரை கிளை அமர்வு ஆய்வு செய்து, ஜல்லிக்கட்டு நிகழ்ச்சி கூடுதல் பாதுகாப்புடன் நடத்துவதற்கு அனுமதி வழங்கியது. 10.1.2013-ல்  சென்னை உயர் நீதிமன்ற  மதுரை கிளையிலிருந்து இந்த வழக்கை உச்ச நீதிமன்றத்துக்கு மாற்றம் செய்ய உச்ச நீதிமன்றத்தால் ஆணையிடப்பட்டது. உயர் நீதிமன்ற ஆணைகளுக்கு ஏற்ப 2013-ம் ஆண்டு தமிழகத்தில் ஜல்லிக்கட்டு நிகழ்ச்சிகள் நடத்தப்பட்டன. உச்ச நீதிமன்றம், மத்திய அரசால் 11.7.2011 அன்று வெளியிடப்பட்ட அறிவிக்கை மற்றும் பிராணிகள் வதை தடுப்புச் சட்டம் ஆகியவற்றைக் கருத்தில் கொண்டு, 7.5.2014 அன்று  இறுதி உத்தரவை பிறப்பித்தது.  அதன்படி, தமிழ்நாட்டில் ஜல்லிக்கட்டு நிகழ்ச்சிகள் நடத்தவும், மகாராஷ்டிராவில் காளைமாட்டுப் பந்தயத்தை நடத்தவும் முழுமையான தடை பிறப்பிக்கப்பட்டது.  மேலும் தமிழ்நாடு  ஜல்லிக்கட்டு நெறிமுறை சட்டம் 2009, இந்திய பிராணிகள் வதை தடுப்புச் சட்டத்துக்கு முரணாக அமைந்துள்ளதால் அரசமைப்பு சட்டத்துக்கு எதிரானது என உச்ச நீதிமன்றத்தால்  தீர்ப்பளிக்கப்பட்டது.

உச்ச நீதிமன்றத்தின் இந்த ஆணை ஜல்லிக்கட்டு நடத்தப்படுவதை முற்றிலும் தடை செய்து விட்டதால், இதனை எதிர்த்து  19.5.2014 அன்று தமிழ்நாடு அரசால்  மறு ஆய்வு மனு உச்ச நீதிமன்றத்தில் தாக்கல் செய்யப்பட்டது.   இந்த மறு ஆய்வு மனுவை உச்ச நீதிமன்றம் 16.11.2016 அன்று தள்ளுபடி செய்துவிட்டது. உச்ச நீதிமன்றத்தின் 7.5.2014 அன்றைய தீர்ப்பின் காரணமாக, தமிழ்நாட்டில் ஜல்லிக்கட்டு நிகழ்ச்சி நடத்திட இயலாது என்பதால் ஜல்லிக்கட்டு நடத்துவதற்கான அனைத்து முயற்சிகளையும் தமிழ்நாடு அரசு தொடர்ந்து மேற்கொண்டு வந்தது. மத்திய சுற்றுச்சூழல் மற்றும் வனத் துறை அமைச்சகம், ஜல்லிக்கட்டு நிகழ்ச்சியை நடத்துவதற்கான சட்டப்பூர்வ நடவடிக்கையை எடுத்திட வேண்டுமென்று மத்திய அரசை, தமிழ்நாடு அரசு  தொடர்ந்து வலியுறுத்தியது.  7.8.2015 அன்று முதலமைச்சர் ஜெயலலிதா, பிரதமருக்கு அளித்த கோரிக்கை மனுவில் தமிழகத்தில் ஜல்லிக்கட்டு நிகழ்ச்சியை நடத்த வழிவகுக்கும் வகையில் உரிய சட்டப்பூர்வ நடவடிக்கைகளை மேற்கொள்ள வேண்டுமென கேட்டுக்கொண்டிருந்தார்கள். 11.7.2011 நாளிட்ட மத்திய சுற்றுச்சூழல் மற்றும் வனத் துறை அமைச்சகத்தால் வெளியிடப்பட்ட அறிவிக்கையில் காட்சிபடுத்தப்படும் விலங்காக சேர்க்கப்பட்டுள்ள காளைகளை அந்தப் பட்டியலில் இருந்து நீக்கிட வேண்டும் என்றும் 1960-ம் ஆண்டைய மிருக வதை தடுப்புச் சட்டத்தில் ஜல்லிக்கட்டை அனுமதிக்கும் விதமாக திருத்தங்கள் மேற்கொள்ள வேண்டும் என்றும் ஜெயலலிதா கேட்டுக் கொண்டார்.

2015-ம் ஆண்டு நாடாளுமன்ற குளிர்கால கூட்டத் தொடரில் இது குறித்த மசோதா ஒன்றை மத்திய அரசு தாக்கல் செய்யும் என மத்திய சுற்றுச்சூழல் மற்றும் வனத் துறை இணை அமைச்சரால் தெரிவிக்கப்பட்டது. ஜெயலலிதாவின் ஆணையின்படி அனைத்திந்திய அண்ணா திராவிட முன்னேற்றக் கழக நாடாளுமன்ற உறுப்பினர்கள் உரிய மசோதா தாக்கல் செய்யப்பட வேண்டும் என்று அந்தக் கூட்டத் தொடரில் பேசியிருந்தனர்.  எனினும், ஜல்லிக்கட்டு நிகழ்ச்சியை தமிழகத்தில் அனுமதிக்கும் வகையிலான எந்தவித மசோதாவும் நாடாளுமன்றத்தில் தாக்கல் செய்யப்படாததால், ஜெயலலிதா 22.12.2015 அன்று பிரதமருக்கு கடிதம் ஒன்றை எழுதினார்.  அந்தக் கடிதத்தில், ஜல்லிக்கட்டு நிகழ்ச்சியை நடத்த வகை செய்யும் அவசரச் சட்டம் ஒன்றை உடனடியாகக் கொண்டுவர வேண்டும் என கேட்டுக் கொண்டார்கள்.  ஜெயலலிதாவின் தொடர் வற்புறுத்தலின் காரணமாக மத்திய அரசின் சுற்றுச்சூழல், வனம் மற்றும் பருவநிலை மாற்றம் அமைச்சகம் 7.1.2016 அன்று ஒரு அறிவிக்கையை வெளியிட்டது.  இந்த அறிவிக்கையின்படி, காளைகள் என்பது காட்சிப்படுத்தப்படும் விலங்குகள் பட்டியலில் தொடர்ந்து இருந்தாலும், ஒரு காப்புரையை சேர்த்தது.  அந்தக் காப்புரையில், உச்ச நீதிமன்றம் தனது 7.5.2014 நாளிட்ட உத்தரவில் குறிப்பிட்டுள்ள ஐந்து உரிமைகள் மற்றும் பிராணிகள் வதை தடுப்புச் சட்டத்தில் உள்ள கூறுகள் ஆகியவை கடைபிடிக்கப்பட வேண்டுமென தெரிவித்தது.  எனினும், ஒருசில அமைப்புகள் இந்த அறிவிக்கைக்கு எதிராக உச்ச நீதிமன்றத்தில் மனு ஒன்றைத் தாக்கல் செய்ததில், 12.1.2016 அன்று மத்திய சுற்றுச்சூழல், வனம் மற்றும் பருவநிலை மாற்றம் அமைச்சகம் வெளியிட்ட அறிவிக்கைக்கு உச்ச நீதிமன்றம் தடை விதித்தது.

அதனைக் கருத்தில் கொண்டு, மத்திய அரசு, தான் ஏற்கெனவே கேட்டுக் கொண்டபடி, அவசரச் சட்டம் ஒன்றை பிறப்பிக்க வேண்டுமென்று ஜெயலலிதா, பிரதமரை கடிதம் மூலம் கேட்டுக் கொண்டார்.  அதன் பின்னர், அவசரச் சட்டம் ஒன்றை மத்திய அரசு பிறப்பிக்க வேண்டும் என்று ஜெயலலிதாவாலும்,  தமிழக அரசாலும், என்னாலும் தொடர்ந்து வலியுறுத்தப்பட்டு வந்த போதும், மத்திய அரசு இது தொடர்பாக இதுவரை எந்த ஒரு அவசரச் சட்டத்தையும் கொண்டு வரவில்லை. பிரதமரை 19.12.2016 அன்று நேரில் சந்தித்த போது தமிழ்நாட்டின் நலனுக்கான கோரிக்கைகள் அடங்கிய மனு ஒன்றினை அளித்தேன்.  அதில் ஜல்லிக்கட்டு நடத்துவதற்கு ஏதுவாக சட்டதிருத்தங்கள் கொண்டு வரப்படவேண்டும் என வற்புறுத்தி இருந்தேன்.  9.1.2017 அன்று பிரதமருக்கு நான் அனுப்பிய கடிதத்தில் ஜல்லிக்கட்டு நடத்த வகை செய்யும் விதமாக அவசரச் சட்டம் பிறப்பிக்கப்பட வேண்டும் என கேட்டுக் கொண்டுள்ளேன்.  ஜல்லிக்கட்டு நிகழ்ச்சி நடத்திடும்  வகையில் 7.1.2016 அன்று மத்திய அரசின் சுற்றுச்சூழல், வனம் மற்றும் பருவநிலை மாற்றம் அமைச்சகத்தால் வெளியிடப்பட்ட அறிவிக்கை தொடர்பான வழக்கில் உச்ச நீதிமன்றம் ஒத்தி வைத்துள்ள தனது தீர்ப்பினை விரைவில் வழங்கும் என எதிர்பார்க்கிறேன். இந்த தீர்ப்பின் மூலம் தமிழகத்துக்கு நியாயம் கிடைக்கும் என உறுதியுடன் நம்புகிறேன்.

தமிழகத்தின் உரிமைகளை காத்து அவற்றை மீட்டெடுத்தவர் ஜெயலலிதா.  காவிரி நதிநீர் பிரச்னை என்றாலும், முல்லைப் பெரியாறு பிரச்னை என்றாலும், சில்லறை வணிகத்தில் அந்நிய முதலீடு என்றாலும், தமிழர் நலன் ஒன்றையே கருத்தில் கொண்டு அதைப் பாதுகாத்தவர் ஜெயலலிதா.  அவர் வழியில் செல்லும் நானும், தமிழக அரசும், தமிழகத்தில் ஜல்லிக்கட்டு நடைபெறுவதை நிச்சயம் உறுதி செய்வோம்.  இதில் எள்ளளவும் பின்வாங்க மாட்டோம்.  தமிழர்களின் பண்பாடு, கலாசாரம் ஆகியவற்றை கட்டிக் காப்போம் என்பதை தமிழக மக்களுக்கு உறுதிபட தெரிவித்துக் கொள்கிறேன்" என்று கூறியுள்ளார்.

பாரதி கிருஷ்ணகுமார் இயக்கிய என்று தணியும் படத்தில் நாயகியாக நடித்தவர் ஜீவிதா.

இவருக்கு அண்மையில் பாலா படத்தில் நடிக்கும் வாய்ப்பு கிடைத்திருக்கிறது. அதற்காக ஜீவிதா, பாலாவை சந்திக்க சென்றிருக்கிறார்.

இதுகுறித்து ஜீவிதா பேசும்போது, பாலா அவர்களிடம் இருந்து அழைப்பு வந்ததும் அவ்வளவு சந்தோஷம்.

நான் அவரை அலுவலகத்தில் சந்தித்த போது என்னால் நம்பவே முடியவில்லை. பின் என்னிடம் கதை பற்றி கூறனார், எனக்கு அதில் சில மாற்றங்கள் தேவைப்படுவதாக கூறினேன். அவரும் அதற்கு சரியான பதில்கள் கொடுத்தார்.

அவர் படத்தில் நடிக்கிறேனோ இல்லையோ அவரை சந்தித்த அந்த 25 நிமிடங்கள் என் வாழ்நாளில் மறக்க முடியாத தருணம் என்று நெகிழ்ச்சியுடன் கூறினால் ஜீவிதா.

கமல்ஹாசன் காலில் அடிப்பட்டத்தை தொடர்ந்து சிறிகு ஓய்வுக்கு பிறகு இப்போது நிறைய நிகழ்ச்சிகளில் கலந்து கொண்டு வருகிறார்.

அண்மையில் இவர் ஒரு மாநாட்டில் கலந்திருக்கிறார். அதில் அவர் தனக்கு புகைப்பிடிக்கும் பழக்கம் வரக்காரணமே மிஸ்டர் சிவாஜி கணேசன் தான். அவர் புகைப்பிடிக்கும் ஸ்டைலை பார்த்தாலே அழகாக இருக்கும். நாமும் புகைப்பிடிக்க வேண்டும் போல் இருக்கும் என்று கூறியுள்ளார்.

உலக அளவில் கடந்த 2015ஆம் ஆண்டு நிகழ்ந்த பிரசவ மரணங்களில் மூன்றில் ஒருபங்கு இந்தியாவில் நிகழ்ந்துள்ளதாக ஆய்வறிக்கை ஒன்றில் தெரிவிக்கப்பட்டுள்ளது. இதுதொடர்பாக இங்கிலாந்தில் இருந்து வெளிவரும் மருத்துவ வார இதழான லேன்செட் வெளியிட்டுள்ள ஆய்வறிக்கையில், உலக அளவில் நடக்கும் பிரசவங்களில் 25 சதவீத பிரசவங்கள் சரியான மருத்துவரின் துணையின்றியே நடப்பதாகக்
கூறப்பட்டுள்ளது.மேலும், கடந்த 2015-ல் பிரசவத்தின் போது மரணித்த தாய்மார்கள் எண்ணிக்கை அடிப்படையில் உலக அளவில் மூன்றில் ஒருபங்கு இறப்பு இந்தியாவில் நிகழ்ந்துள்ளதாகக் கூறப்பட்டுள்ளது. கடந்த ஒரு ஆண்டில் மட்டும் இந்தியாவில் 45,000 பேர் பிரசவத்தின்போது மரணித்துள்ளதாக தெரிவிக்கப்பட்டிருந்தது.இதனிடையே“பிரசவ நேரத்தில் அனுமதிக்கப்படும் சொந்தங்களால், வலியால் துடிக்கும் பெண்ணுக்கு தொடர்ச்சியான நேரடி ஆதரவை வழங்க முடியும். குறிப்பாக, பெண்களை உடன் அனுமதிக்கும் போது, வசதியாக உணரச் செய்து, இயற்கையான முறையில் குழந்தை பிறப்பதற்கான சாத்தியக்கூறுகள் அதிகரிக்கின்றன” என மருத்துவக்குழு பரிந்துரை செய்துள்ளது. சிசேரியன் அறுவைசிகிச்சையை தவிர்த்து, குறைந்த செலவிலான இயற்கை பிரசவத்தை ஊக்குவிக்கும் வகையில்,  அரசாங்கமே ‘Birth companionship’ திட்டத்தை பொது மருத்துவமனைகளில் சமீபத்தில் அறிமுகப்படுத்தியுள்ளது. இதைப் பற்றி அறிய மூத்த மகப்பேறியல் மருத்துவர்களிடம் பேசினோம்.

“இத்திட்டத்தை தனியார் மருத்துவமனைகளில் முன்பே அறிமுகப்ப டுத்தி விட்டனர். வசதியானவர்களுக்கு மட்டுமே சாத்தியம் என்பதால் பயனாளிகள் மிகக் குறைவே. இப்போது இதை பொது மருத்துவமனை களில் அறிமுகப்படுத்தியுள்ளது சந்தோஷமான செய்தி. பழங்காலத்தில் உறவுப் பெண்களின் உதவியோடு வீட்டிலேயே  பிரசவம் பார்க்கும் முறை நம் நாட்டில் இருந்து வந்தது. அது ஒரு வகையில் கர்ப்பிணிகளுக்கு ஆதர வளிக்கும் வகையில் இருந்தது.

குழந்தைப்பேறில் ஏற்பட்ட அதிக அக்கறை மற்றும் மருத்துவத்துறையின் தொழில்நுட்ப முன்னேற்றத்துக்குப் பிறகு மருத்துவமனைகளில் பிரசவம் நடைபெறுவது அதிகரித்தது. ஆனாலும், வளர்ந்த நாடுகளோடு ஒப்பிடும்போது மகப்பேறு இறப்பு விகிதம் நம் நாட்டில் சற்று அதிகமாகவே இருக்கிறது. கிராமப்புற ஏழை கர்ப்பிணிகள் பெரும்பாலும் நவீன வசதிகளற்ற பொது சுகாதார நிலையங்களில் அனுமதிக்கப்படுவதால் அதிக அளவில் இறக்கின்றனர். அரசு மருத்துவமனைகளிலும், பொது சுகாதார மையங்களிலும் உள்ள பணியாளர்கள் கடுமையாக நடந்து கொள்வதால் மனஅழுத்தத்துக்கும் உள்ளாகிறார்கள்.

இதனால் பிரசவத்தில் கடும் இன்னல்களை சந்திக்கின்றனர். தனியார் மருத்துவமனைகளின் அதிக செலவுக்கு இவர்களால் ஈடுகொடுக்க முடிவதில்லை. பிரசவத்துக்கு முன்னான பாதுகாப்பு சிகிச்சைகளையும் அப்பெண்கள் பின்பற்றுவதில்லை. இது தவறான போக்கு. நகர்ப்புறங்களில் இப்போது பிரசவத்துக்கு முந்தைய ‘குழந்தை பிறப்பு கல்வி’ வகுப்புகள் நடத்தப்படுகின்றன.

இந்த வகுப்புகளில் அனுபவம் மிக்க குழந்தை பிறப்பு கல்வியாளர்கள், மகப்பேறு மற்றும் குழந்தை நல மருத்துவர்களைக் கொண்டு, சுவாச நுட்பங்கள், வலி மேலாண்மை, இயற்கைப் பிரசவம் மற்றும் சிசேரியன் முறை உள்பட அனைத்து பிரச்னைகளையும் எதிர்கொள்ளும் வகையில், கர்ப்பிணிகளுக்கும் கணவர்களுக்கும் கற்றுத் தரப்படுகிறது. இதுபோல கிராமத்துப்  பெண்களுக்கும், பிரசவத்தைப் பற்றிய முன்னறிவை போதிக்கும் வகையில் வகுப்புகளை நடத்தினால் சிறப்பாக இருக்கும். பிரசவத்தைப் பற்றிய முன்னறிவு, எப்படி பிரசவத்துக்கு ஒரு பெண்ணை தயாராக்குகிறது என்பதை விளக்கும் வகையில், விரிவான கையேடு ஒன்றை நான் வெளியிட்டுள்ளேன்.

லேபர் வார்டில் கர்ப்பிணியின் கணவ னையோ, உறவுப் பெண்களையோ அனுமதிப்பதால், அப்பெண் பிரசவத்தில் ஏற்படும் முன்னேற்றங்களை தன்னுடன் இருப்பவர்களிடம் பகிர்ந்து கொள்ள முடியும். கணவரின் ஆதரவான ஸ்பரிசங்களும், வார்த்தைகளும் அப்பெண்ணுக்கு பிரசவத்தில் ஏற்படும் அசவுகரியங்களை குறைக்கிறது. இதனால் மருத்துவரோடு தன் முழு ஒத்துழைப்பையும் தரும்போது சுகப்பிரசவத்துக்கான வாய்ப்பு அதிகரிக்கிறது.

ஆனால், கர்ப்பிணியின் தாயை சிலர் அனுமதிப்பதில்லை. ஏனெனில், ஒரு தாயால் தன் குழந்தை படும் கஷ்டத்தை சகித்துக் கொள்ள முடியாது. அதனால், டாக்டரிடம் ‘என் மகள் கஷ்டப்படாமல் குழந்தையைப் பெற்றெடுக்க ஏதாவது செய்யுங்கள்’ என்று கூறுவார். இது அப்பெண்ணின் தைரியத்தை குறைத்துவிடும். இதுவே, கணவனோ, மற்ற உறவுப் பெண்களாகவோ இருந்தால் தைரியமான வார்த்தைகளைச் சொல்லி அப்பெண்ணுக்கு உதவுவார்கள்.

ஏழைக் குடும்பங்களுக்கும் பொருந்தக்கூடியதாக இருப்பதால், Birth Companionship திட்டத்தை அனைத்து அரசு மருத்துவமனைகளில் முழுமையாகச் செயல்படுத்துவதோடு, தகுந்த வசதிகளையும் ஏற்படுத்தித் தரவேண்டும். இத்திட்டம் முழுமையாக வெற்றிபெறும்பட்சத்தில் நம்நாட்டில் குழந்தைகள் இறப்பு விகிதம் மற்றும் மகப்பேறு இறப்பு விகிதம் கணிசமாக குறையும் என்பதில் சந்தேகமில்லை” என்கிறார் மல்லிகா சாமுவேல்.

இப்போதெல்லாம் டி.வி சானல்களில் நடத்தப்படும் ரியாலிட்டி ஷோக்களுக்கு ஏகப்பட்ட கிராக்கி. அடுத்த வாரம் வரப்போகும் ஷோவுக்கு இந்த வாரம் ப்ரோமோ ஒன்று ஒளிபரப்புவார்களே அடேயப்பா.

சண்டை, மோதல், அழுகை, விலகிப்போவது என ஏதாவது சீரியஸ் ஆன சீன்களை ப்ரோமோவாக போட்டு பலரின் கவனத்தை திருப்பிவிடுவார்கள்.

ஆனால் அதில் சில உண்மையல்ல என அவ்வப்போது சில தகவல்கள் கசிந்து வருகிறது. இது பலருக்கும் அதிர்ச்சியை அளித்துள்ளது.

சில மாதங்களுக்கும் முன் ஜோடி நிகழ்ச்சியில் நடுவராக இருந்த சிம்புவுக்கும், அதில் நடனமாடிய டிங்குவுக்கும் சண்டை வருவதுபோல காண்பிக்கபட்டு பின் அது உண்மையல்ல என சொல்லப்பட்டது.

அதே நிகழ்ச்சியில் தற்போது நடக்கும் சீசனில் காமெடி நடிகராக இருந்த தாடி பாலாஜியும் அவரது மனைவியும் ரியல் ஜோடியாக நடனமாடுகிறார்கள்.

இதில் ஒரு எபிசோடில் தாடி பாலாஜி நான் என மனைவியை அடித்திருக்கிறேன், கடுமையாக திட்டியிருக்குகிறேன். அதற்காக அவரிடம் மன்னிப்பும் கேட்டிருக்கிறேன் என கூறினார்.

அதற்கு அவர் மனைவி டி.வியில் எல்லோரையும் சிரிக்கவைத்தவர் என்னை மட்டும் அழவைத்திருக்கிறார் என் சொன்னார். இக்காட்சி மிகவும் பரபரப்பானது. பாலாஜி இப்படி கொடூரமானவரா என ஒரு தோற்றம் இருந்தது.

தற்போது பாலாஜி இதற்கு மாறாக சில விஷயங்களை கூறியிருக்கிறார்.

அவர் சொல்லும்போது ;-

நான் என் மனைவியை காதலித்து திருமணம் செய்து கொண்டேன், அவரும் எனக்காக எல்லாவற்றையும் விட்டுவிட்டு வந்துவிட்டார்.

அவரை எப்படி நான் அடித்து, கொடுமைப்படுத்துவது. நான் என் மகள், மனைவியுடன் சந்தோசமாக இருக்கிறோம். டிவியில் நடந்தது ஒரு சின்ன கலாட்டா, அவ்வோளோ தான். ரியாலிட்டி ஷோ என்றால் அதெல்லாம் சகஜம் தானே என கூறியுள்ளார்.

இதனால் மீண்டும் இப்படி மக்களை சீரியஸ் ஆக்கும் டிவி நிகழ்ச்சிகளின் ப்ரமோக்கள் பின்னல் மாயை மட்டுமே என நிரூபணம் ஆகியுள்ளது.

21 வயதே ஆன இளைஞரிடமிருந்து ஓர் ஆச்சர்யமூட்டும் கச்சிதமான த்ரில்லர் சினிமா, ‘துருவங்கள் 16’.

’சின்னச் சின்ன தவறுகள்தானே என்று நினைத்து நாம் செய்யும் செயல்கள் எப்படி வாழ்க்கையை ஆழமாகப் பாதிக்கிறது’ என்பதுதான் ஒன்லைன். ஒரு கொலை, அதை நிகழ்த்திய குற்றவாளி யார் என்று புலனாய்வு செய்யும் கதையில் முன்னும் பின்னுமாகச் சில சம்பவங்களும், சம்பந்தப்பட்ட மனிதர்களும் பிணைக்கப்படுகின்றனர்.  பல சுவாரஸ்யமான திருப்பங்கள் மூலம் பார்வையாளர்களை நாற்காலி நுனியில் அமரவைப்பதோடு, கதையின் முடிச்சு அவிழும்போது வாழ்க்கைக்கான நீதியையும் முன்வைக்கிறது ‘துருவங்கள் பதினாறு’.

குறும்பட இயக்குநர்களிலிருந்து, தமிழுக்கு கிடைத்திருக்கும் மற்றுமொரு அறிமுகஇயக்குநர் கார்த்திக் நரேன்.  ஒரு காட்சியைக்கூட பார்வையாளர்கள் தவறவிடாதபடி சம்பவங்களின் அடுக்கடுக்கான பிணைப்புகள், விறுவிறுப்பான திரைக்கதை, நடிகர்களைக் கையாண்டது ஆகியவற்றில் முதல் படத்திலேயே முத்திரை பதித்திருக்கிறார். வாழ்த்துகள் கார்த்திக் நரேன்!

கோவையில் நள்ளிரவில் கொலை ஒன்று நடக்கிறது. தற்கொலையாக பதியப்படும் இந்தக்கொலையை யார் செய்திருப்பார் என்பதைக் கண்டுபிடிக்கும் போலீஸ் அதிகாரி தான் ரகுமான். அதே இரவில் மூன்று பொறுப்பற்ற இளைஞர்களின் காரில் மோதி,  ஒருவர் இறந்துவிடுகிறார். அந்த காரில் வந்த மூன்றுபேரும், குற்றத்தை மறைக்க சடலத்தை அதே காரில் எடுத்துச்செல்கிறார்கள். ஆனால் அடுத்த நாள் காலையில் காரில் வைக்கப்பட்ட சடலம் மாயமாகிறது. இந்த நான்கு பேருக்கும் கொலையாளிக்கும் என்ன சம்மந்தம், கார் விபத்தில் இறந்தவர் என்ன ஆனார்,  கொலையாளி யார்? இதையெல்லாம் ரகுமான் கண்டுபிடித்தாரா என்ற கேள்விகளுக்கான பதிலை பல ட்விஸ்டுகளுடன் சொல்கிறது திரைக்கதை.

முதுமையில் நரைத்த முடியும், கையில் வாக்கிங் ஸ்டிக்கும், ஒரு கப் டீயுமாக  அறிமுகமாகி, கதையைச் சொல்லத் தொடங்கும் ரகுமான், ஃப்ளாஷ்பேக்கில் துடிப்பான நடுத்தர வயது போலீஸ் அதிகாரி. முதுமையின் நடுக்கம், காவல்துறை அதிகாரியின் கம்பீரம், மிடுக்கு ஆகியவற்றை இயல்பாகக் கொண்டுவந்திருக்கிறார். படத்தைத் தாங்கிப்பிடிப்பதே ரகுமான் என்ற ஒற்றை மனிதரின் நடிப்பு என்று சொல்லலாம். ‘’சார்னு சொல்லமாட்டீங்களா?” என்று பணத்திமிர் இளைஞர்களிடம் கேட்பது, அதே இளைஞன் காவல்நிலையத்தில் இருக்கும்போது சற்றே இடைவெளி விட்டு, அந்த இளைஞனின் மாடுலேஷனோடு, ‘சார்’ என்று அழைப்பது என்று காட்சிக்குக் காட்சி முத்திரை பதிக்கிறார் ரகுமான்.

ரகுமானுடன் வரும் கான்ஸ்டபிள் கெளதம் நடிப்பில் கவனிக்கவைக்கிறார். இப்படத்தில் இரண்டாவது முக்கிய கதாபாத்திரமாக வரும் கெளதம் யாரென்பதை க்ளைமாக்ஸில் உடைக்கும் ட்விஸ்ட் எதிர்பாராத திருப்பம். குறைவான கதாபாத்திரங்கள்தான், டெல்லி கணேஷைத் தவிர அனைவருமே புதுமுகங்கள் என்றாலும் கதையின் இயல்பான போக்கும் சுவாரஸ்யமான விறுவிறுப்பும் நம்மைப் படத்தோடு ஒன்றவைக்கிறது.

போலீஸ் ஸ்டேஷனுக்குள் ரகுமான் நுழையும் காட்சி, மழையில் நடக்கும் கொலையை ஒவ்வொரு கோணத்திலும் பதிவு செய்தவிதம் என்று நேர்த்தியான ஒளிப்பதிவை தந்திருக்கிறார் சுஜித் சாரங். படத்தின் ட்விஸ்டைப் பதட்டத்துடனும், விறுவிறுப்புடனும் கடத்துவதற்காக ஸ்ரீஜித் சாரங்கின் கத்தரி நிறையவே மெனக்கெட்டிருக்கிறது.  பாடல் காட்சிகள் இல்லாதது படத்தின் ப்ளஸ். பட இறுதியில் வரும் மான்டேஜ் பாடல் ரசிக்கும் விதம். படத்துக்கேற்ற பின்னணி இசையை வழங்கியிருக்கிறார் ஜோக்ஸ் பிஜாய்.

குற்றவாளி நிச்சயம் சைக்கோ கில்லர் தான் என்று நம்பவைக்கும் இடங்களில் சச்சின் சுதாகரனின் சவுண்ட் எஃபெக்ட்ஸ் கைகொடுக்கிறது. சைக்கோ கில்லராக உருவகப்படுத்தும் வில்லனின் கெட்டப், இரவு நேரத்திற்கான செட் வேலைகள் என்று படமே நேர்த்தியான திரைக்கதையுடன் முழுமைபெறுகிறது.

“உன்னோட கோணத்தில் பார்த்தா நான் செஞ்சது தப்புங்குறமாதிரி தெரியும். ஆனா என்னோட கோணத்துல பார்த்தாதான் நான் பண்ணது சரியானு உனக்குப்புரியும்”, ‘’போலீஸ்காரன் சாகுறதுக்கு பயப்படமாட்டான். ஆனா என்னைச் சாகடிக்கிறதுக்கான சரியான காரணம் உனக்குத் தெரியணும். அதுனால நான் சொல்லுற கதைய கேட்டுட்டு அப்புறம் என்னைச் சுடு” - கதைக்கேற்ற கச்சித வசனங்கள்.

நாள் முழுவதும் ரகுமான் செல்ஃபோன் உபயோகிக்காமல் சுற்றுவது, நெருடுகிறது. ஒரு நாள் முழுவதுமா செல்ஃபோன் சார்ஜ் ஏறும்? அடுத்த காட்சிகான லீடாக முந்தைய காட்சியிலேயே சீன் வைப்பது த்ரில்லரின் முழு அனுபவத்தையும் உணரவிடாமல் சில இடங்களில் தடுக்கிறது. கோவை போன்ற ஒரு மாநகரில் மிகக்குறைவான போலீஸ் பாத்திரங்களே மீண்டும் மீண்டும் வருவது இன்னுமொரு உறுத்தல்.

தமிழ்நாட்டில் ஏன் ஜல்லிக்கட்டை ஆதரிக்கிறார்கள்?  . அப்படி இந்த ஜல்லிக்கட்டு தமிழ் மக்களை ஈர்த்ததற்கு காரணம் என்ன?   ஒருவர் களத்தில் மாட்டை வெற்றிகரமாக அடக்கி அதை வென்றுவிட்டால் ஆயிரம் மகுடம் தன் தலையில் ஏறுவதுபோல் நினைக்கும் வீரன். மற்றொருவர் வீரன் என்று எவரும் இல்லாமல் தன் காளை வென்றால் களத்தில் லட்சக்கணக்கான பார்வையாளர்கள் முன்பு மீசையை முறுக்கிவிட்டு நடந்து செல்லும் மாட்டின் சொந்தக்காரர்.

ஜல்லிக்கட்டு என்றால் என்ன?

மாட்டுப்பொங்கல்

தமிழர்களுக்கே உரிய பண்டிகையான மாட்டுப் பொங்கலன்று கோலாகலமாகக் கொண்டாடப்படும் வீர விளையாட்டுதான் ஜல்லிக்கட்டு.  இதை ஏறு தழுவுதல், மஞ்சு விரட்டு எனப் பல பெயர்களிட்டு அழைத்து வந்தனர் தமிழர்கள். குறிப்பிட்ட அந்த நாளில் 'வாடிவாசல்' என்று ஓர் இடத்தை அமைத்து வீரர்கள் விளையாட இடம் ஒதுக்கித் திருவிழா போல் கொண்டாடும் நாள்தான் ஜல்லிக்கட்டு. இதை சற்று விளக்கமாகப் பார்க்கலாம். முன்பு இதை 'சல்லிக்கட்டு' என்று அழைத்து வந்தனர் காலப்போக்கில் அது ஜல்லிக்கட்டு என்றாகிவிட்டது.

'சல்லி' என்றால் வெள்ளி மற்றும் தங்கக்காசுகளைக் குறிக்கும். 'கட்டு' என்றால் அதை மாட்டின் கொம்பில் கட்டுவதைக் குறிக்கும். மாட்டின் கொம்பில் இருக்கும்  கட்டப்பட்ட அந்தக் காசுகளை எவன் ஒருவன் காளையை அடக்கிக் காசினை அவிழ்த்துவிடுகிறானோ அவனுக்கு வெற்றியுடன் சேர்ந்து அந்தக் காசுகளும் பரிசாகக் கிடைக்கும்.  பட்டிதொட்டியெங்கும் காளையை அடக்கிய வீரனின் பெயர் பெருமையாகப் பேசப்படும். இவ்விளையாட்டு தமிழகம் முழுவதும் பலவிதமாக விளையாடப்பட்டு வருகிறது.

ஆதரிப்பதன் காரணம்?

தமிழ்நாட்டின் பாரம்பரியம், அடையாளம் என்று கருதப்படும் இந்த ஜல்லிக்கட்டானது சங்க காலத்திலிருந்தே பின்பற்றி வரப்படும் வீர விளையாட்டாகும். காளைமாட்டை அடக்குவது போல் பொறிக்கப்பட்ட 1,500 வருடங்கள் பழமை வாய்ந்த கல்வெட்டு மதுரை அருங்காட்சியகத்தில் இன்றும் இருக்கிறது. முல்லை நிலத்தின் பாரம்பரியமான விளையாட்டுகளில் ஜல்லிக்கட்டும் ஒன்று. காலப்போக்கில் வீர விளையாட்டாக பல கிராமங்களில் கொடிகட்டிப் பறந்து வந்தது. அதில் அலங்காநல்லூர், பாலமேடு, அவனியாபுரம் போன்ற ஊர்கள் ஜல்லிக்கட்டில் சிறந்து விளங்கும் ஊர்களாகத் திகழ்ந்து வருகின்றன.

இளைஞர்கள் பட்டாளம் :

ஜல்லிக்கட்டு நடந்தே தீர வேண்டும் என்ற கோரிக்கைகளை முன் வைப்பதில் முன்னிலை வகிப்பது இளைஞர் பட்டாளம்தான். சமீபத்தில் சோசியல் மீடியா வாயிலாக ஏற்பட்ட விழிப்பு உணர்வின் பலனாக, சென்னை மெரினா கடற்கரையில் கூடிய ஆயிரத்திற்கும் மேற்பட்ட இளைஞர்களால் அந்தப் பகுதியே மக்கள் வெள்ளம் போல் காட்சியளித்தது. ஜல்லிக்கட்டின் முக்கியத்துவத்தை இளைஞர்கள் பலருக்கும் தெரியப்படுத்த சோசியல் மீடியாவில் 'ஹேஸ்டேக்' ஒன்றை உருவாக்கி அதன் வாயிலாகத் தகவல்களைப் பகிர்ந்ததில் நடந்த நிகழ்வுதான் மெரினாவில் நடந்த ஜல்லிக்கட்டு ஆதரவு விழிப்பு உணர்வு பிரசாரம். இதில் கலந்துகொண்டோரில் பலர் தமிழ்நாட்டின் பாரம்பரிய உடையான வேட்டி சட்டையில் வந்திருந்தனர். அதேபோல் இடைவிடாது வீடியோ, மீம்ஸ், ஹேஸ்டேக் என சோசியல் மீடியா முழுவதுமாகக் களைகட்டி வருகிறது ஜல்லிக்கட்டுக்கு ஆதரவாக.. புத்தாண்டு தினம் அன்று சென்னையில் உள்ள பெசன்ட் நகரில் 12 மணி நெருங்கியதும் 'ஹேப்பி நியூ இயர்' என்பதற்குப் பதில் 'வீ வான்ட் ஜல்லிக்கட்டு' என்ற கோஷத்தை எழுப்பியதே இவர்களின் தமிழ் உணர்வுக்கான மிகப் பெரிய அடையாளமாகும்.