!...Payanam...!

89-வது ஆஸ்கர் விருது விழா 2017-ம் ஆண்டு, பிப்ரவரி 26-ம் தேதி நடக்கவுள்ளது. சிறந்த வெளிநாட்டு திரைப்படத்துக்கான பிரிவில் உலகம் முழுவதிலுமிருந்து பல நாடுகள், படங்களை அனுப்பி வைத்தன. இந்தியாவின் சார்பாக "விசாரணை"போட்டியிடுகிறது. இந்நிலையில், ஆஸ்கரில் போட்டியிடும் திரைப்படங்கள் குறித்த விவரங்களை ஆஸ்கர் அமைப்பு வெளியிட்டுள்ளது:

1. மொத்தம் 89 நாடுகளில் இருந்து திரைப்படங்கள் விண்ணப்பிக்கப்பட்டன.

2. அதில் 85 நாடுகளின் திரைப்படங்கள் தேர்ந்தெடுக்கப்பட்டுள்ளன.

3. அஃப்கானிஸ்தான், அர்மேனியா, கேமரூன், துனிசியா ஆகிய நாடுகளின் திரைப்படங்கள் நிராகரிக்கப்பட்டுள்ளன.

4. ஆஸ்கர் வரலாற்றில் முதன்முறையாக ஏமன் நாட்டில் இருந்து ஒரு திரைப்படம் தேர்வாகியுள்ளது. " ஐ ஆம் நொஜூம், ஏஜ் 10 & டிவோர்ஸ்டு" (I AM NOJOOM, AGE 10 & DIVORCED)

"விசாரணை" படத்தோடு 84 பிற நாட்டு படங்கள் போட்டியிடப்போவது உறுதி செய்யப்பட்டுள்ளது. வெற்றிக் கணிப்புகளை இப்பொழுதே செய்ய முடியாது என்றாலும்... பட்டியல் வெளியானதில் இருந்து சில திரைப்படங்கள் அதிர்வலைகளை ஏற்படுத்தியுள்ளன :

1. " சாண்ட் ஸ்டார்ம்" (SAND STORM) : இஸ்ரேல்



உலக வரலாற்றில் தொடர் யுத்தங்களை சந்தித்து வரும் பூமியான இஸ்ரேலின் பெண் இயக்குநர் எலைட் ஜெக்ஸர் இயக்கியிருக்கும் படம். தன் கனவிற்கும், குடும்ப கலாசாரத்துக்கும் இடையே சிக்கித் தவிக்கும் ஓர் அரேபிய டீனேஜ் பெண்ணின் வாழ்வை சொல்லும் படம்.

2. "டெசியர்தோ" (DESIERTO) : மெக்ஸிகோ

பிழைப்புக்காக  உயிரைப் பணையம் வைத்து எல்லைத் தாண்டிப் போகும் மெக்ஸிக்கர்களின் கண்ணீர்க் கதை. இயக்கம் ஜோனஸ் க்யூரன். "கிராவிட்டி" படத்திற்கான ஆஸ்கர் வென்ற இயக்குநர் அல்போன்சோ க்யூரனின் மகன். ஏக எதிர்பார்ப்புகளை ஏற்படுத்தியுள்ளது இந்தத் திரைப்படம்.

3. " தி சேல்ஸ் மேன் " (THE SALES MAN) : இரான்

              ஹீரோ ஒரு சேல்ஸ்மேன். ஒரு புது வீட்டுக்கு குடி வருகிறான். அதற்கு முன் அங்கிருந்த பெண் பாலியல் தொழில் வந்தார். இதைத் தொடர்ந்து ஏற்படும் சம்பவங்கள் தான் படத்தின் கதை...2016-ம் ஆண்டிற்கான கேன்ஸ் திரைப்பட விழாவில் போட்டியிட்டு சிறந்த நடிகர் மற்றும் சிறந்த திரைக்கதைக்கான விருதை இப்படம் வென்றுள்ளது.



4. " இட்ஸ் ஒன்லி தெ என்ட் ஆஃப் தி வேர்ல்ட்" (ITS ONLY THE END OF THE WORLD) : கனடா

 இன்னும் சில நாட்களில் சாகப் போகும் ஒரு எழுத்தாளர்... 12 ஆண்டுகளுக்குப் பின் தன் குடும்பத்தை சந்திக்க வருகிறார். அங்கு ஏற்படும் அனுபவங்கள்... கேன்ஸ் திரைப்பட விழாவில் "கிராண்ட் ப்ரீ" விருதினை இப்படம் வென்றது.

5. "எல்லே" (ELLE) : ப்ரான்ஸ்

வீட்டில் தனியாக இருக்கும் பெண் அடையாளம் தெரியாத ஒருவனால் பாலியல் வன்புணர்ப்புக்கு ஆளாகிறாள். அதைத் தொடர்ந்து நடக்கும் சம்பவங்களே படத்தின் களம்...

இவை மட்டுமல்லாமல் ஜெர்மனியின் "டோனி எர்ட்மேன்" (TONY ERDMAN), சிலி நாட்டின் "நெருடா" (NERUDA), வெனிசுலாவின் "ஃப்ரம்  அ ஃபார் " (FROM A FAR), பிலிப்பைன்ஸின் " ம ரோசா" (Ma' ROSA) உட்பட பல படங்களும் கவனத்தை ஈர்த்துள்ளன. உலகத் தரமான திரைப்படங்களோடு "விசாரணை" போட்டியிடுவது மகிழ்ச்சி தான் என்றாலும்... இவைகளை வென்று ஆஸ்கர் விருது கிடைத்தால் அது இந்திய சினிமாவின் சரித்திரத்தில் முக்கிய நிகழ்வாக அமையும்...

விசாரணை நிச்சயம் ஆஸ்கர் வெல்லும் என்கிறார் அதன் கதாசிரியர் சந்திரகுமார்.

கனவு கைகூடுமா??? பதில் பிப்ரவரி 26-ம் தேதி தெரியும்... 

ரெமோ படம் வெற்றியை தொடர்ந்து சிவகார்த்திகேயன் பல பேட்டிகள் கொடுத்து வருகிறார். அண்மையில் ஒரு பிரபல தொலைக்காட்சியில் இவர் பேட்டியளித்திருந்தார். அப்போது சினிமாவில் மது, சிகரெட் பழக்கம் இல்லாமல் எப்படி இருப்பது என கேள்வி கேட்கப்பட்டது.

இதற்கு பதிலளித்த சிவகார்த்திகேயன், எனக்கு அந்த பழக்கம் தேவைப்படவில்லை, ஏன் அப்படி இருக்கக் கூடாது என முடிவு எடுத்தேன். இத்தனைக்கும் நான் ரஜினி ரசிகன்.

ரஜினி சார்ன்னா அம்மா என்றழைக்காத உயிரில்லையே என்ற பாடல்தான் நினைவுக்கு வரும். ஒரு ரசிகனா எனக்கு அவர் கொடுத்தது இதுதான் என கூறியுள்ளார்.

ஷங்கர் எப்போது தமிழ் சினிமாவில் புதுபுது விஷயங்களை கொண்டு வருபவர். ஒவ்வொரு படங்களிலும் ஏதாவது மக்களுக்கு வித்தியாசமாக காட்ட வேண்டும் என்பதில் கவனமாக இருப்பார்.

அந்த வகையில் இந்தியாவே வியந்து பார்க்கும் அளவிற்கு 2.0 படத்தை எடுத்து வருகிறார், இப்படத்தின் பட்ஜெட் மட்டும் ரூ 350 கோடி தாண்டுமாம்.

இந்நிலையில் இப்படத்தை முழுவதும் 3டியில் எடுக்க முடிவு செய்துள்ளாராம் ஷங்கர், இவை பாலிவுட், ஹாலிவுட்டிற்கு ஓகே.

தமிழில் கூட சரி என்றாலும், இது ரஜினி நடிக்கும் படம், ரசிகர்கள் முதல் நாள் முதல் காட்சி கண்ணாடி அணிந்து படம் பார்ப்பதை விரும்புவார்களா? என்பது தெரியவில்லை.

“நண்பேன்டா…” என்று யாருக்கு வேண்டுமென்றாலும் கை கொடுத்துவிடுவார் சந்தானம். ஆனால் சிவகார்த்திகேயன் பற்றி பேச்செடுங்களேன்… வெண்டைக் காயை போட்டு விளக்கெண்ணையில் பிசைந்த மாதிரி ஆகிவிடும் முகம். ஒரே தொலைக்காட்சியால் உயரத்திற்கு வந்தவர்கள்தான் இருவரும். ஆனால் இவர் ஒரு துருவத்திலும் அவர் ஒரு துருவத்திலும் நின்று கொண்டு நம்பியார் சிரிப்பு சிரிப்பதுதான் நாடு தாங்காத புரட்சி #actorsanthanam #sivakarthikeyan #VijayTv #DhillukkuThuttu #remo #ActionHero #VTVGanesh

எப்படியாவது சிவகார்த்திகேயன் இடத்தை அடைந்துவிட வேண்டும் என்பதுதான் சந்தானத்தின் ஒரே லட்சியமாகவும் இருக்கிறது. மெல்ல காமெடி கூடாரத்திலிருந்து வெளியேறி, தனக்கு வேறொரு இமேஜ் கொடுத்துக் கொள்ள ஆசைப்பட்டாலும், மக்கள் மனசிலிருந்து அவரது நகைச்சுவை பிம்பம் உடைந்தால்தானே? அப்படி உடைய வேண்டும் என்றால், நவீன பொக்லைன்கள் நாலைஞ்சு இருந்தாலும் நடக்காது போலிருக்கே!

அதற்காகதான் புது வேகம் எடுத்திருக்கிறார் சந்தானம். விடிவி கணேஷ் தயாரிக்கும் ஒரு புதிய படத்தில் ஹீரோவாக நடிக்கும் சந்தானம், அதில் முழுக்க முழுக்க ஆக்ஷன் வேடத்தில் நடிக்கப் போகிறார். ஒருமுறை ஆக்ஷன் ஹீரோவாக வேஷம் போட்டுவிட்டால், அதற்கப்புறம் மம்பட்டி, கடப்பாரை என்று கையில் எடுத்துக் கொண்டு காலம் முழுக்க சுற்றினாலும், அதைவிட பெரிய பைட், அதைவிட பெரிய பைட் என்று ஓடிக் கொண்டே இருக்க வேண்டியதுதான். அதற்குள் இப்படியொரு முடிவை சந்தானம் எடுத்தது அறியாமையா ஆர்வக் கோளாறா என்பதுதான் புரியவில்லை.

ஆனால் சிவகார்த்திகேயன் அப்படியல்ல. நடுவில் புல் ஆக்ஷன் ஹீரோவாக நடிக்கக் கேட்டு அவருக்கு வந்த கதைகள் எல்லாவற்றையும் ஓரம் கட்டிவிட்டார். “நான் இப்பவே ஆக்ஷன் ஹீரோவா ஆகிட்டேன்னா, அதற்கப்புறம் புலி வால் பிடிச்ச மாதிரி அது பின்னால் ஓட வேண்டியதுதான். முதலில் விதவிதமான கதைகளில் நடிப்போம். பிறகு ஆக்ஷன் பக்கம் நோக்கலாம்…” என்கிறார்.

இப்ப சொல்லுங்க யாரு ஸ்லோ? யாரு ஃபாஸ்ட்? எந்த முடிவு நல்ல முடிவு?

தெலுங்கு திரையுலகின் சூப்பர் ஸ்டார் மகேஷ்பாபு. தற்போது தமிழ், தெலுங்கு இரண்டு மொழிகளிலும் ஏ.ஆர்.முருகதாஸ் இயக்கத்தில் நடித்து வருகிறார். அடுத்து தேனாண்டாள் பிலிம்ஸ் தயாரிப்பில்
சுந்தர்.சி இயக்கப் போகும் திரைப்படம் 'சங்கமித்ரா' .சரித்திரக்கால கதை என்பதால் 'பாகுபலி' போன்று 250 கோடி பட்ஜெட்டில் உருவாக்க திட்டமிட்டனர். முதலில் விஜய் கால்ஷீட் கேட்டனர்,அவர் மறுத்தார், அடுத்து சூர்யாவிடம் கேட்டனர் அவரும் 'நோ' சொல்லி விட்டார். அதன்பின் மகேஷ்பாபுவை சந்தித்தனர் அவர் அரைமனதோடு ஒ.கே சொல்லி அனுப்பினார்.

                                மகேஷ்பாபுவை தொடர்ந்து பெரும் சம்பளம் பேரத்தோடு ஜெயம் ரவி, ஆர்யாவிடம் தேதிகள் கேட்டனர். 'சங்கமித்ரா' படத்தை நட்சத்திர பட்டாள படமாக உருவாக்க திட்டமிட்டனர். இதற்கிடையில் ராஜமெளலி போன்று ஹிஸ்டாரிக்கல் கதையை படமாக்கும் திறன் சுந்தர்.சி-க்கு இருக்கிறதா? ஏற்கெனவே சுந்தர்.சி இயக்கிய படங்களின் வியாபாரம் என்ன? என்பது குறித்து மகேஷ்பாபு ரகசியமாக விசாரித்தார்.  சுந்தர்.சி இயக்கிய படங்கள் அத்தனையும் கரம் மசாலா படங்கள் என்றும்,  முப்பது கோடி தாண்டி எந்த படமும் பிசினஸ் ஆனதே இல்லை என்று தகவல்வர அதிர்ந்து போனார், மகேஷ்பாபு. வெறும் 30 கோடி வியாபாரம் மட்டுமே கொண்ட ஒரு டைரக்டர் எப்படி 250 கோடி பட்ஜெட்டில் படம் எடுப்பார்? அந்த படத்தை எப்படி பிசினஸ் செய்வார்கள்/ என்பது குறித்து கவலை கொண்டார்.

                           இந்த சூழ்நிலையில் தெலுங்கு சினிமாவின் சூப்பர் ஹிட் டைரக்டர் கொரட்டலா சிவா மகேஷ்பாபுவை அணுகி சொன்ன கதையைக் கேட்டு பிரமித்து போனார், மகேஷ்பாபு. கொரட்டலா சிவா இயக்கிய முதல்படம் 'மிர்ச்சி' பிரபாஸ் நடித்த இந்தப்படம் ஹிட், அடுத்து மகேஷ்பாபு நடிப்பில் இயக்கிய 'ஶ்ரீமந்துடு' திரைப்படம் சூப்பர் ஹிட்டாக சந்தோஷமான மகேஷ் காஸ்ட்லியான கார் ஒன்றை சிவாவுக்கு பரிசாக கொடுத்தார். சமீபத்தில் ஜூனியர் என்டி ஆர் நடித்து வெளியான 'ஜனதா கேரேஜ்' பம்பர் ஹிட்டாக நெகிழ்ந்துபோன  ஜூனியர் சிவாவுக்கு பிரமாதமான  சொகுசு பங்களாவை பரிசாக கொடுக்கப் போகிறார்.

                         சிவா  டைரக்‌ஷனில் நாம் ஒரு படம் நடிக்க மாட்டோமா? என்று தெலுங்கு முன்னணி ஹீரோக்கள் ஏங்கிக் கொண்டிருக்கும் இப்படிப்பட்ட நிலையில்  தன்னைத்தேடிவந்து சிவா  சொன்ன கதையிம் மகேஷ் மகிழ்ந்தும், நெகிழ்ந்தும் போனார்.  சுந்தர்.சி-யின் 'சங்கமித்ரா' படத்தில் நடிக்கும் திட்டத்தில் இருந்து விலகிக்கொண்டார், மகேஷ்பாபு. கொரட்டலா சிவா இயக்கத்தில் மகேஷ்பாபு நடிக்கும் படத்தை தாணய்யா தயாரிக்கிறார். ஏ.ஆர்.முருகதாஸ் படம் முடிந்த பிறகு  சிவா  இயக்கும் படத்தின் ஷூட்டிங் 2017 ஜனவரியில் ஹைதராபாத்தில் துவங்குகிறது.

சிவகார்த்திகேயன் படங்கள் என்றாலே குடும்பத்துடன் சென்று வரலாம் என்ற நிலை உருவாகிவிட்டது. ஆனால், அவர் படங்களில் தொடர்ந்து பெண்களை துரத்தி காதலிப்பது போல் காட்சிகள்
உள்ளது என பல குற்ற்ச்சாட்டுகள் எழுந்தாலும் படம் நன்றாக தான் ஓடுகின்றது.

நேற்று பல சர்ச்சை கேள்விக்கு சாமர்த்தியமாக பதிலை கூறினார் சிவகார்த்திகேயன், இதில் குறிப்பாக தான் அழுததற்கான காரணத்தையும் கூறிவிட்டார்.

இந்நிலையில் அந்த பேட்டியில் ‘சிவகார்த்திகேயன் அரசியலுக்கு வருவாரா?’ என தொகுப்பாளர் கேட்டார், அதிலும், ரஜினி, விஜய்க்கு பிறகு நீங்கள் தான் என்பது போலவும் கூறினார்.

இந்த கேள்வி நிகழ்ச்சியை பார்த்த அனைவருக்கு கோபத்தை ஏற்படுத்தியிருக்கும், ஏனெனில் அந்த இடத்திற்கும், இந்த கேள்விக்கும் எந்த விதத்திலும் சம்மந்தம் இல்லை, ஏன் இதை கேட்க வேண்டும் என ரசிகர்களே கோபமாகிவிட்டனர்.

"காலமெனும் ஆழியிலும்
காற்று, மழை, ஊழியிலும்
சாகாது கம்பனவன் பாட்டு...
அது தலைமுறைக்கு எழுதி வைத்த சீட்டு...!

கண்ணதாசன், கம்பனுக்கு எழுதிய கவிதை இது. கம்பனுக்கு மட்டுமின்றி, கண்ணதாசனுக்கும் இது பொருந்தும்.
ஐந்தாயிரத்துக்கும் மேற்பட்ட பாடல்கள், நான்காயிரத்துக்கும் மேற்பட்ட கவிதைகள், 20க்கும் மேற்பட்ட நாவல்கள் என காலத்தால் அழிக்க முடியாத படைப்புகளைத் தந்த மாபெரும் படைப்பாளி... சங்க இலக்கிங்களின் செழுமையையும், தத்துவங்களையும், அனுபவங்களையும், சமூக, அரசியல் விழிப்புணர்வையும் பாமர மனிதனுக்கும் புரியும் எளிய மொழியில் எழுதிய இந்த மாபெரும் கவிஞனுக்கு இன்று (அக்டோபர் 17ம் தேதி) 35வது ஆண்டு நினைவு நாள்.

சிவகங்கை மாவட்டம், காரைக்குடிக்கு அருகில் உள்ள சிறுகூடல்பட்டி என்ற கிராமத்தில் பிறந்தவர் கண்ணதாசன். இயற்பெயர் முத்தையா. அப்பா பெயர் சாத்தப்ப செட்டியார். அம்மா பெயர் விசாலாட்சி. உடன் பிறந்தவர்கள், ஆறு சகோதரிகள், மூன்று சகோதரர்கள்.

செட்டிநாட்டில், நிறைய குழந்தைகளைப் பெற்ற தம்பதி, குழந்தைகள் இல்லாத தம்பதிக்கு பிள்ளையை சுவீகாரம் கொடுக்கும் நடைமுறையாக இருக்கிறது. கண்ணதாசனும் அவ்விதம் காரைக்குடியைச் சேர்ந்த பழனியப்ப செட்டியார்-சிகப்பி ஆச்சி தம்பதிக்கு சுவீகாரம் தரப்பட்டார். சுவீகாரம் சென்ற வீட்டில் அவருக்கு வைக்கப்பட்ட பெயர் நாராயணன். எட்டாவதாகப் பிறந்ததாலோ என்னவோ, கண்ணதாசனுக்கு எட்டாம் வகுப்பு வரைக்கும் தான் பள்ளிக்கல்வி வாய்த்தது.

சிறு வயதிலேயே எழுத்தின் மீது தீராத ஆர்வம். சிறு சிறு புத்தகங்கள் வாசிக்கக் கிடைத்தன. பத்திரிகைகளில் கதை எழுத வேண்டும் என்பது அவரது கனவாக இருந்தது. 16 வயதில் வீட்டுக்குத் தெரியாமல் சென்னைக்கு கிளம்பி வந்தார். சந்திரசேகரன் என்று புனைப் பெயர் சூடிக்கொண்டு திரைப்படங்களில் நடிக்க வாய்ப்புத் தேடினார்.



ஆனால், சென்னை அவருக்கு பல கொடுமையான அனுபவங்களைத் தந்தது. பசியும், எதிர்காலம் குறித்த பயமும் வாட்டியது. திருவொற்றியூரில் உள்ள பட்டினத்தார் கோவிலிலேயே படுத்துக் கிடந்தார். ஒரு நிறுவனத்தில் உதவியாளராக வேலை கிடைத்தது. அந்நிறுவனத்தில் பணியாற்றிக் கொண்டே கதைகள் எழுதத் தொடங்கினார். கிரகலட்சுமி என்ற பத்திரிகையில் ”நிலவொளியிலே” என்ற அவரது முதல் கதை வெளிவந்தது. முதல் கதையை அச்சில் கண்ட உத்வேகத்தில், இன்னும் தீவிரமாக எழுதத் தொடங்கினார். பத்திரிகை துறையின் மீது பெரும் நாட்டம் ஏற்பட்டது.

ஒரு நண்பரின் பரிந்துரையோடு, புதுக்கோட்டையில் இருந்து வெளிவந்த திருமகள் என்ற பத்திரிகையில், "ப்ரூப் திருத்துனர்" வேலை கேட்டு வந்தார். நேர்க்காணலில், பத்திரிகையின் அதிபர், உங்கள் பெயரென்ன? என்று கேட்டார். அந்த நேரத்தில் எழுத்தாளர்கள் புனைப்பெயர் வைத்து எழுதுவது ஃபேஷனாக இருந்தது. அதிலும் ”தாசன்” என்று முடியும் பெயரை வைத்திருப்பவர்களுக்கு தனி மரியாதை கிடைத்தது. கிடைத்த சில நொடிகளில் ”கண்ணதாசன்” என்று பதில் சொன்னார். முத்தையா, கண்ணதாசனாக மாறியது அந்தத் தருணத்தில் தான்.  

கண்ணதாசனின் திறமையைத் தொடர்ந்து கவனித்த பத்திரிகையின் அதிபர், ஒருநாள் இதழுக்கு தலையங்கம் எழுதச் சொன்னார். இந்திய தேசிய ராணுவம் பற்றி கண்ணதாசன் எழுதிய தலையங்கம், பத்திரிகை அதிபரை பெரிதும் கவர்ந்தது. உடனடியாக பத்திரிகையின் ஆசிரியராக பணி அமர்த்தப்பட்டார். அப்போது அவருக்கு வயது 17.

பிறகு திரை ஒலி, சண்டமாருதம், தென்றல், தென்றல் திரை உள்ளிட்ட பத்திரிகைகளில் பணியாற்றினார். கண்ணதாசன் என்ற பத்திரிகையை அவரே நடத்தினார். அனைத்து பத்திரிகைகளிலும் அவரது கவிதைகள், கதைகள், கட்டுரைகள், நாடகங்கள் வெளிவந்தன. அவை அப்போதைய இலக்கிய ஆளுமைகள் மத்தியில் பெரிதும் கவனம் பெற்றன.



கவிதைகள் மூலம் அடையாளம் கிடைத்த பிறகு, திரைப்படங்களுக்கு பாடல் எழுத வேண்டும் என்ற எண்ணம் கண்ணதாசனுக்கு ஏற்பட்டது. சண்டமாருதம் பத்திரிகை நிறுத்தப்பட்ட பிறகு, மாடர்ன் தியேட்டர்ஸ் கதை இலாகாவில் கண்ணதாசனும் சேர்க்கப்பட்டார். கதை இலாகா சந்திப்புகளில் கருணாநிதியின் நட்பு கிட்டியது. அதன் வழி திராவிட இயக்கத்தின் மீது ஆர்வம் அதிகமானது.
பிறகு பத்திரிகை பணிகளை உதறிவிட்டு முழுமூச்சாக திரைப்படங்களுக்கு பாடல் எழுத வாய்ப்புத் தேடினார். ஜூபிடர் நிறுவன தயாரிப்பில், தான் இயக்கிய கள்வனின் காதலி படத்தில் பாடல் எழுத வாய்ப்புக் கொடுத்தார் கே.ராம்நாத். ”கலங்காதிரு மனமே... உன் கனவெல்லாம் நினைவாகும் ஒரு தினமே” என்ற பாடல் தான் கண்ணதாசனின் முதல் பாடல். அதன்பிறகு, அடுத்த 30 ஆண்டுகள் திரைத்துறையை முற்றுமுழுதாக ஆளுமை செய்தார் கண்ணதாசன். திரையுலகமே அவர் எழுதும் கவிக்காக காத்துக் கிடந்தது.
ஆசுகவி என்பார்களே... அதைப்போல, கண்ணதாசனிடம் அருவியெனக் கொட்டியது தமிழ். கதை, வசனம், தயாரிப்பு என சகல துறைகளிலும் இயங்கினார்  இசையமைப்பாளர்கள் எல்லாம் தங்கள் இசையில் அவருடைய பாடல் இடம் பெறுவதை பெருமையாகக் கருதினர்.

பன்மொழிப் புலவர் அப்பாத்துரையாரிடம் கற்ற இலக்கிய வளமை, திராவிட இயக்கத்தின் தீவிரம், பாரதிதாசன் பால் ஏற்பட்ட ஈர்ப்பு எல்லாம் சேர்ந்து கண்ணதாசனை தனித்துவமிக்க படைப்பாளியாக நிலை நிறுத்தியது.

அரசியலிலும் தீவிர ஆர்வம் காட்டினார். திமுகவில் தொடங்கிய அவருடைய அரசியல் காங்கிரசில் முடிவுற்றது. ஒருமுறை தேர்தலில் நின்று தோற்றார். அவரின் இயல்புக்கு அரசியல் பொருத்தமாக இல்லை. வெளிப்படையான பேச்சு, ஒரு கொள்கை தவறெனப் படும்போது தயக்கமில்லாமல் மாற்றிக்கொள்ளும் நேர்மை, எதற்கும் அஞ்சாத விமர்சனங்கள்... இதெல்லாம் அரசியலுக்கு சரிப்படவில்லை.
பாடலில் கொடிகட்டிப் பறந்த காலங்களில் கண்ணதாசன் செல்வத்தில் திளைத்தார். ஆனால், சேமித்து வைக்கும் வழக்கமில்லை. சொந்தப்படங்கள் எடுத்தார். அவை கடனில் தள்ளின.

”பிர்லாவைப் போல சம்பாதித்தேன். ஊதாரியைப் போல செலவழித்தேன். பல நேரங்களில் பிச்சைக்காரனைப் போல ஏங்கி நின்ற வாழ்க்கை தான் எனக்கு வாய்த்திருக்கிறது..” என்று ஒரு கட்டுரையில் பதிவு செய்திருக்கிறார் கண்ணதாசன்.

தொடக்கத்தில் திராவிட இயக்கத்தில் தீவிரமாக இயங்கிய கண்ணதாசன் பிற்காலத்தில் இந்து மதத்தில் பற்றுடையவரானார். இந்து மதம் சார்ந்து எழுப்பப்படும் பல்வேறு கேள்விகளுக்கு எளிய மொழில் பதில்களையும், அனுபவங்களையும் உள்ளடக்கி அவர் எழுதிய ”அர்த்தமுள்ள இந்துமதம்” தொகுப்பு இன்றளவும் அதிகம் விற்பனையாகும் நூல்களின் பட்டியலில் இடம் பிடிக்கிறது.
கண்ணதாசனுடைய வாழ்க்கை திறந்த புத்தகம். தனக்கு சரியெனப் பட்டத்தை அவர் செய்யத் தயங்கியதே இல்லை. அது தவறென்று உணரும்பட்சத்தில் அதை ஒப்புக்கொள்ளத் தயங்கியதும் இல்லை. தன்னுடைய வாழ்க்கையை கண்ணதாசன் அளவுக்கு வெளிப்படையாக பகிர்ந்து கொண்ட ஆளுமைகள் யாருமில்லை. வனவாசம், மனவாசம், எனது வசந்தகாலங்கள், எனது சுய சரிதம் ஆகிய 4 நூல்களும் கண்ணதாசனின் சுய சரிதைகள்.  

 கண்ணதாசனுக்கு மூன்று மனைவியர். 15 பிள்ளைகள்.

“கண்ணதாசன் எப்போதுமே பாக்கெட்டில் பணம் வைத்துக் கொள்ள மாட்டார். ஒருநாள் மௌண்ட்ரோடு பக்கமாக காரில் போகும்போது அவரது பாக்கெட்டில் பணம் இருந்தது. உடனடியாக ஒரு துணிக்கடையில் காரை நிறுத்தச் சொல்லி உள்ளே நுழைந்து, ”குழந்தைகளுக்கான உடை வேண்டும்” என்று கேட்டார். கடைகாரர் ”குழந்தைக்கு என்ன வயது?” என்று கேட்டார். கவிஞர் திகைத்து விட்டார். பிறகு சுதாரித்துக் கொண்டு, ”நம்ம வீட்டில் எல்லா வயதிலும் குழந்தைகள் உண்டு. எல்லா வயசுக்கும் ஒன்னொன்னு குடுப்பா” என்று சிரித்துக்கொண்டே வாங்கிச் சென்றார்...” என்று கண்ணதாசன் பற்றிய தன் நினைவுகளை சிரிப்போடு பகிர்ந்து கொள்கிறார் அவரிடம் உதவியாளராக இருந்தவரும் மூத்த இயக்குனருமான எஸ்பி, முத்துராமன்.

கண்ணதாசன் எழுதிய பெரும்பாலான பாடல்கள் அவரின் அனுபவத்தில் விளைந்தவை. அந்தந்த சூழலுக்கேற்ப பாடல் புனைவதில் அவருக்கு இணை யாருமில்லை.

ஒருமுறை, நெஞ்சில் ஓர் ஆலயம் படத்துக்காக இசையமைப்பாளர் விஸ்வநாதன் ஒரு பாடல் எழுத கண்ணதாசனை அழைத்திருந்தார். கண்ணதாசன் வரத் தாமதமாகி விட்டது. நெடுநேரம் காத்திருந்த விஸ்வநாதன், ”இனிமேல் கண்ணதாசனிடம் பாடல் கேட்கப் போவதில்லை” என்று நண்பர்களிடம் வருத்தமாக சொன்னார். இதைக் கேள்விப்பட்டு உடனடியாக விஸ்வநாதனைச் சந்தித்த கண்ணதாசன், பாடலை கொடுத்தார்.

”சொன்னது நீதானா? சொல்... சொல்.., என்னுயிரே” என்ற அந்தப் பாடலைப் படித்ததும் கண்கலங்கி கண்ணதாசனை கட்டி அணைத்துக் கொண்டாராம் விஸ்வநாதன். இப்படி பெரும்பாலான கதைகள் கண்ணதாசன் வாழ்க்கையில் உண்டு.

இன்றைக்கும் பலருக்குத் தாலாட்டாக, பலரின் துயரங்களுக்கு ஆறுதலாக, மனம் தொய்ந்து கிடக்கும் பலருக்கு உத்வேகமாக இருப்பவை கண்ணதாசனின் பாடல்கள். வாழ்வின் அனுபவத்தில் இருந்து எழும், உண்மையான ஒரு படைப்பு காலத்தை வென்று தலைமுறைகளைக் கடந்தும் நீடித்து வாழும் என்பதற்கு கண்ணதாசனின் பாடல்களும், படைப்புகளும் மிகச்சிறந்த உதாரணம்.

”எப்படியெல்லாம் வாழக்கூடாதோ, அப்படியெல்லாம் வாழ்ந்தவன் நான். அதனால் இப்படித்தான் வாழ வேண்டும் என்று அறிவுரை சொல்லும் தகுதி எனக்கு இருக்கிறது..” என்றார் அவர்.

காலமாகி 35 ஆண்டுகள் கடந்தும் கண்ணதாசன் இன்னும் நம் மத்தியில் வாழ்ந்து கொண்டிருக்கக் காரணம் இந்த நேர்மையும், உண்மையும் தான்..!



கண்ணதாசன் பற்றிய சில தகவல்கள்


* கண்ணதாசன் பாடல்களை தானே எழுதுவதில்லை. சொல்லச் சொல்ல அவரது உதவியாளர்கள் எழுதுவார்கள். இயக்குனர் எஸ்பி.முத்துராமன், பஞ்சு அருணாசலம், இராம.கண்ணப்பன் ஆகியோர் கண்ணதாசனிடம் உதவியாளர்களாக பணியாற்றினார்கள்.

* ”இவ்வளவு சிறப்பாக பாடல் எழுதுகிறீர்களே... உங்களுக்கு ஆதர்சமாக இருந்தது  யார்?” என்று கண்ணதாசனிடம் கேட்கப்பட்டது. ”என் தாய் வாசாலாட்சி பாடிய தாலாட்டு தான் என் பாடல்களுக்கு ஆதர்சம்” என்றார் கண்ணதாசன்.

* மெட்டுக்கு இசையமைப்பதையே விரும்புவார் கண்ணதாசன். பெரும்பாலும், வெறும் சூழ்நிலையை மட்டும் கேட்காமல் படத்தின முழுக்கதையையும் கேட்டு, அக்கதையை முழுமையாக பிரதிபலிக்கும் வகையில் பாடல்கள் எழுதுவார். அப்படி அவர் எழுதிய பாடல்கள் இன்றும் உயிர்ப்போடு இருக்கின்றன. இயக்குனர் பீம்சிங் இயக்கிய பெரும்பாலான ”பா” வரிசைப் படங்களின் பாடல்கள் அப்படி எழுதப்பட்டவை தான்.

* கண்ணதாசன் எப்போதும் மதுவில் திளைத்துக்கிடப்பார் என்றொரு கருத்து உண்டு. ஆனால் கண்ணதாசன் பாடல்கள் எழுதும்போது மது அருந்தமாட்டார்.

*மிகவும் ரசித்து ருசித்து சாப்பிடுவார் கண்ணதாசன். குறிப்பாக அசைவ உணவுகள். கண்ணதாசனின் மனைவி பார்வதி ஆச்சி மிகச்சிறப்பாக அசைவ உணவுகளை சமைப்பார். அவரது மகள் ரேவதி சண்முகம் சமையல் நிபுணராக இருப்பது குறிப்பிடத்தகுந்தது.

* சேரமான காதலி படைப்புக்காக கண்ணதாசனுக்கு சாகித்ய அகாடமி விருது வழங்கப்பட்டுள்ளது.