!...Payanam...!

 'இன்றைக்கு 'கொலஸ்ட்ரால்’ என்ற பெயரைச் சொன்னாலே, ஏதோ மிகப் பெரிய அபாயகரமான நோயாகத்தான் பார்க்கப்படுகிறது. உண்மையில் கொலஸ்ட்ரால் அதிகமாகும்போதுதான் பிரச்னை.

நம் உடல் செல்கள் உற்பத்தி செய்வதற்கும், சில ஹார்மோன்கள் சுரப்பதற்கும் கொலஸ்ட்ரால் அவசியம். மொத்தக் கொழுப்பும் எல்டிஎல் கொலஸ்ட்ரால், எச்.டி.எல். கொலஸ்ட்ரால், ட்ரைகிளிசரைட்ஸ் என்று பிரிக்கப்படுகிறது. நகர்ப்புற இந்தியர்கள் மத்தியில் நல்ல கொழுப்பான ஹெச்.டி.எல். 35 மி.கி என்ற மிகக்குறைந்த அளவிலேயே காணப்படுகிறது' .
.
கொலஸ்ட்ராலைக் கட்டுப்படுத்த எளிய வழிகள்

 அதிகப்படியான உடல் எடையைக் குறைப்பது, ஆரோக்கியமான உணவுகளை எடுத்துக்கொள்வது, உடற்பயிற்சி என வாழ்க்கை முறையில் நாம் செய்யும் சின்னச் சின்ன மாற்றங்கள், கொலஸ்ட்ரால் அளவைக் கட்டுப்படுத்தும்.

1. கொலஸ்ட்ரால் அளவை அறிந்துகொள்ளுதல்

 கொலஸ்ட்ரால் அளவு எவ்வளவு உள்ளது என்பது தெரிந்தால்தான், அதை எவ்வளவு கட்டுப்படுத்த வேண்டும் என்பதைத் திட்டமிட முடியும். எனவே, குறைந்தது ஆறு மாதங்களுக்கு ஒரு முறை ரத்தத்தில் உள்ள கொழுப்பின் அளவை முதலில் பரிசோதிக்க வேண்டும். உடலில் கெட்ட கொழுப்பு அதிகரிப்பதைத் தடுத்து, நல்ல கொழுப்பு அதிகரிக்கச் செய்ய, பரிசோதனை முடிவுகள் உதவும்.

2. நல்ல கொழுப்பைத் தேர்ந்தெடுத்தல்

 நாம் என்ன சாப்பிடுகிறோமோ, அது நேரடியாக நம் உடலில் கொழுப்பு சேருவதில் தாக்கத்தை ஏற்படுத்திவிடும். நார்ச் சத்துள்ள உணவு, கொழுப்பின் அளவைக் குறைக்க உதவும். சாச்சுரேட்டட் ஃபேட் (நிறைவுற்ற கொழுப்பு) மற்றும் டிரான்ஸ் ஃபேட் (மாறுதல் அடையும் கொழுப்பு) இவை உடலில் கெட்ட கொழுப்பு அளவை அதிகரிக்கச் செய்யும். தினசரி உணவில் 10 சதவிகிதத்துக்கும் அதிகமாக சாச்சுரேட்டட் ஃபேட் மற்றும் டிரான்ஸ் ஃபேட் இல்லாமல் பார்த்துக்கொள்ள வேண்டும். மோனோசாச்சுரேட்டட் ஃபேட், உடல் ஆரோக்கியத்துக்கு உதவும். இது ஆலிவ், கடலை எண்ணெயில் அதிகம் உள்ளது. பாதாம், வால்நட்டில் உள்ள கொழுப்பும் ஆரோக்கியத்தைத் தரும்.

3. டிரான்ஸ் ஃபேட் தவிர்த்தல்

 இது கெட்ட கொழுப்பு. நொறுக்குத் தீனிகள், பதப்படுத்தப்பட்ட உணவுகளில் மிக அதிக அளவில் இருக்கிறது. உடலில் உள்ள கெட்ட கொழுப்பை அதிகரிப்பதோடு, நல்ல கொழுப்பு அளவையும் குறைக்கிறது. எனவே, உணவுப் பொருட்களை வாங்கும்போது, அதில் 'டிரான்ஸ் ஃபேட்’ என்று இருந்தால் அதைத் தவிர்த்துவிடுங்கள்.

4. கொலஸ்ட்ராலின் பயன்பாட்டைக் கட்டுப்படுத்துங்கள்

 வயதானவர்களுக்கு நாள் ஒன்றுக்கு 300 மி.கி. அளவு கொழுப்பு தேவை. இதய நோயாளிகளுக்கு 200 மி.கி. போதுமானது. முட்டையின் மஞ்சள் கரு, ஈரல், மூளை போன்ற விலங்குகளின் இறைச்சி, பால் பொருட்களில் இருந்து அதிக அளவில் கொழுப்பு கிடைப்பதால், கொழுப்பு அதிகம் சேர்ந்த உணவுப் பொருட்களைக் குறைத்துக்கொள்வது நல்லது.

5. நார்ச் சத்து தினமும் தேவை

 உணவில் குறைந்தது ஐந்து முதல் 10 கிராம் அளவுக்கு நார்ச் சத்து தேவை. முட்டைக்கோஸ், சுரைக்காய், முள்ளங்கி, பீன்ஸ் போன்ற நார்ச் சத்து நிறைந்த காய்கறிகளை, தினசரி எடுத்துக்கொள்ள வேண்டும். இது கொலஸ்ட்ராலின் அதிகரிப்பை ஐந்து சதவிகிதம் வரைக்கும் குறைக்கும். அன்றாடம், போதுமான நார்ச் சத்துள்ள உணவை எடுக்காதவர்கள், இனியாவது உணவில் காய்கறிகளை அதிக அளவில் சேர்த்துக்கொள்ள வேண்டும்.

6. குறைந்த அளவு அசைவ உணவு

'ரெட் மீட்’ எனப்படும் மாட்டு இறைச்சி போன்றவற்றில் கொழுப்பு அளவு அதிகமாக இருக்கிறது. முடிந்தவரை இறைச்சி உணவுகளைத் தவிர்த்துவிடுவது நல்லது. இறைச்சிக்குப் பதில் அதிக அளவில் மீன் உணவை சேர்த்துக்கொள்ளலாம். இதய நோயாளிகள் மட்டுமல்ல, மற்றவர்களும் உணவில் முட்டை சேர்ப்பதைக் குறைத்துக்கொள்ள வேண்டும்.

7. மீன் உணவு

 எண்ணெய்த்தன்மை கொண்ட மீன்களில் ஒமேகா 3 கொழுப்பு அமிலம் அதிக அளவில் இருப்பதால், இது கெட்ட கொழுப்பைக் குறைக்க உதவுகிறது. வாரத்துக்கு இரண்டு, மூன்று முறை மீன் உணவை எடுத்துக்கொள்வதன் மூலம் கெட்ட கொழுப்பு மற்றும் ட்ரைகிளிசரைட் அளவையும் குறைக்க உதவும்.

8. முழு தானியங்கள்

 தினசரி உணவில் அவசியம் சேர்த்துக் கொள்ளவேண்டும். இதில் அதிக அளவில் வைட்டமின் மற்றும் மினரல் உள்ளது. சிவப்பு அரிசி, முழு தானிய பிரட் மற்றும் ஃபிளாக்சீட்ஸ் எனப்படும் ஆளி விதைகளை எடுத்துக்கொள்வது, கெட்ட கொழுப்பைக் குறைக்க உதவும். ஒமேகா 3 கொழுப்பு அமிலம் ஆளி விதையில் அதிகமாக இருக்கிறது

9. உடல் எடையைக் கட்டுக்குள் வைத்திருங்கள்

 உயரத்துக்கு ஏற்ற எடையில் இருக்கிறோமா என்பதைப் பார்க்க வேண்டும். பி.எம்.ஐ. அதிகமாக இருந்தால் உடல் எடையைக் குறைப்பதற்கான முயற்சிகளை உடனடியாக எடுக்க வேண்டும். இரண்டு கிலோ எடை குறைத்தாலும்கூட, இது உடலில் கொழுப்பு அளவைக் குறைப்பதில் பேருதவியாக இருக்கும். சீக்கிரமாக உடல் எடையைக் குறைக்க முயற்சிக்கக் கூடாது. வாரத்துக்கு அரை கிலோ என்ற அளவில் நிதானமாக உடல் எடையைக் குறைக்க முயற்சிக்க வேண்டும்.

10. தொடர் உடற்பயிற்சி

 தினசரி குறைந்தது 30 நிமிடங்களுக்காவது உடற்பயிற்சி செய்யும் பழக்கத்தை ஏற்படுத்திக்கொள்ள வேண்டும். இதனால் தேவையற்ற கொழுப்பு எரிக்கப்பட்டு, உடல் ஃபிட்-ஆகும். கொழுப்பால் ஏற்படும் பாதிப்புகளும் குறையும். இதய நோய் வருவதற்கான வாய்ப்பையும் பெருமளவு குறைக்கும்.

11. மது மற்றும் சிகரெட் தவிர்த்தல்

 அதிக அளவில் சிகரெட் புகைப்பது நம் உடலில் உள்ள எச்.டி.எல் எனப்படும் நல்ல கொழுப்பு அளவைக் குறைத்துவிடும். இதனால் மாரடைப்பு உள்ளிட்ட இதய நோய்கள் ஏற்படுவதற்கான வாய்ப்பு அதிகரிக்கிறது. இதேபோல ஆல்கஹால் அருந்தும்போதும் அதிக அளவில் கொழுப்பு உற்பத்தியாகிறது. எனவே, அதைத் தவிர்த்துவிடுவது நல்லது.

12. மாத்திரை

 ரத்தத்தில் கொழுப்பு அளவு அதிகமாக உள்ளவர்களுக்கு 'ஸ்டேடின்’ என்ற மாத்திரை பரிந்துரைக்கப்படுகிறது. இது கொழுப்பைக் குறைக்க உதவும். மருத்துவரின் பரிந்துரையின்பேரில் இதை எடுத்துக்கொள்ளலாம்.

மாதவிடாய் நாள்களில் இந்தியாவில் வெறும் 18 சதவிகித பெண்கள் மட்டுமே சானிட்டரி நாப்கின்களை உபயோகிக்கின்றனர். 'இந்தியாவில் உள்ள அனைத்துப் பெண்களும் நாப்கின் உபயோகிக்க வேண்டும். அந்நாள்களில் அவர்கள் மற்ற நாள்களைப்போல சகஜமாகவும், ஆரோக்கியமாகவும் இருக்கவேண்டும்' என்ற நோக்கில், மலிவு விலை நாப்கின்களையும் அதைத் தயாரிக்க உதவும் இயந்திரத்தையும் பல ஆராய்ச்சிகளுக்குப் பின் கண்டுபிடித்து 'பத்மஶ்ரீ' விருது வாங்கியவர், கோவையைச்  சேர்ந்த அருணாச்சலம் முருகானந்தம். அவருடைய  இன்ஸ்பிரேஷன் கதைதான், இந்த 'பேட்மேன்'. 

தான் வசிக்கும் கிராமத்துக் கோயில்களில் உள்ள அனுமான் சிலையின் வாயில் முழு தேங்காயைப் போட்டால், அது உடைக்கப்பட்டு, அனுமாரின் கைகளிலிருந்து சில்லுகளாக வெளிவரும். இது லக்ஷ்மிகாந்த் சவுஹானின் (அக்‌ஷய் குமார்) கண்டுபிடிப்புகளுள் ஒன்று. இயந்திர அறிவியல் மீது அதீத ஆர்வம் கொண்டவன். தனது கிராமத்தில் வசிக்கும் அனைவரிடமும் அன்பாகவும், மனதில் பட்டதை வெளிப்படையாகப் பேசும் வெகுளியாகவும் சித்திரிக்கப்படுகிறான். தனது மனைவிக்கு வெங்காயம் வெட்டும் குரங்கு பொம்மை செய்து தருவது, அவளுக்கென சைக்கிளில் வலிக்காத வண்ணம் சீட் தயாரித்தல்... எனத் தன் காதலை வெளிப்படுத்துகிறான்.

லக்ஷ்மிகாந்த் சவுஹானுக்குத் திருமணமாகி சிலநாள்களில், மாதத்தில் ஐந்து நாள்கள் மட்டும் தன் மனைவி காயத்ரி (ராதிகா ஆப்தே) தனியே ஒதுக்கிவைக்கப்படுவதன் பின்னணிக் காரணத்தை அறிகிறான். மாதவிடாய் தீட்டாகக் கருதப்பட்டு வீட்டின் ஓரமாய் ஒதுக்கிவைத்திருக்கும் தன் மனைவியை, அவள் தங்கியிருக்கும் இடத்திற்குச் சென்று, அவளை வீட்டுக்குள் வந்து சகஜமாக இருக்கும்படி அழைக்கிறான். அவளோ, பெரியவர்களின் வார்த்தையை மீறி, தான் வளர்ந்த சூழலிலிருந்து மாறுபட்டு, கட்டுப்பாடுகளை உடைத்துப் புதிய பழக்கங்களை ஏற்றுக்கொள்ள மறுக்கிறாள். அத்துடன் காயத்ரி அந்நாள்களில் உபயோகிக்கும் தீட்டுத்துணியைப் பார்த்து, "நான் இந்தமாதிரியான அழுக்குத் துணியை எனது சைக்கிள் துடைக்கக்கூட உபயோகிக்கமாட்டேன்' என்று கூறி வருத்தப்படுகிறான். மேலும், அவளுக்குச் சுத்தமான சானிட்டரி நாப்கின்களை வாங்கிக்கொடுக்க வேண்டும் என்று ஆசைப்படுகிறான். ஆனால், அதன் விலையோ அதிகம். அதனால், ஒருமாத பால் செலவுக்கு வீட்டில் தட்டுப்பாடு நிலவுமே என்கிற அச்சமும்கூட காயத்ரிக்கு இருக்கிறது. இவை அனைத்தையும் மனதில் கொண்டு, தானே நாப்கின்களைத் தயாரிக்க முற்படுகிறான். அவற்றை உபயோகித்துப் பார்க்குமாறு மனைவியிடம் கேட்கிறான். அம்முயற்சி தோல்வியுற்று, மறுநாளும் அவள் தீட்டுத்துணியையே உபயோகிக்கிறாள். இப்படி லக்‌ஷ்மியின் முயற்சிகள் தொடர்ந்து தோல்வியைத் தழுவ, மனைவியும் ஒருகட்டத்தில் நாப்கின்களைப் பரிசோதிக்கத் தயங்குகிறாள். ஒருகட்டத்தில், தன்னைத் தானே பரிசோதனைக்கு உட்படுத்திக்கொள்கிறான் லக்ஷ்மிகாந்த் சவுஹான். அப்போது அவனது பேண்டில் ரத்தக் கறையைப் பார்த்த கிராமத்தினர், ஊர் பஞ்சாயத்தில் அவனை அவதூறாகப் பேசுகின்றனர். மனைவி காயத்ரி, சவுஹானை விட்டுப் பிரிந்து செல்கிறாள். அதன்பிறகு நாப்கின் தயாரிக்கும் கனவு வெற்றியடைகிறதா, பிரிந்த மனைவியின் நிலை என்ன ஆனது... என்பதை லக்ஷ்மிகாந்த் சவுஹான் சந்தித்த அவமானங்கள் வழியே சொல்கிறார், 'பேட்மேன்'.

எல்லோருக்கும் தெரிந்த அல்லது கேள்விப்பட்ட ஒரு கதைக்கு கற்பனை உருவம் தருவதும், சுவாரஸ்யமான திரைக்கதை எழுதுவதும் சற்று கடினமான விஷயங்கள்தாம். அதை இலகுவாக அமைத்த விதம் இயக்குநர் பால்கியின் தொனியை மேலும் ஒருமுறை நினைவுக்குக் கொண்டுவருகிறது. என்னதான் படத்தில் எக்கச்சக்க பாஸிட்டிவ் விஷயங்கள் இருந்தாலும், அத்தனையும் முந்தியடித்துக் கொண்டு தன் நடிப்பைப் பற்றி மட்டும் பேசவைக்கிறார், அக்‌ஷய் குமார். மனைவியிடம் குறும்பும், குழந்தைத் தனமுமாய் இருக்கும் இயல்பையும், இறுதியில் அவர் ஐக்கிய நாடுகள் சபையில் தைரியமாக அவருக்குத் தெரிந்த ஆங்கிலத்தில் பேசும் காட்சியையும் தனது சிரிப்பிலேயே வெளிப்படுத்தியிருக்கும் விதம் படத்துக்குக் கூடுதல் பலம். 

பெண்களின் மாதவிடாய்ப் பருவத்தை ஆண்கள் பேசுவதற்குத் தயக்கப்படுவதைவிட, முதலில் பெண்கள் தைரியமாகப் பேசவேண்டும் என்பதை மிக ஓப்பனாய்க் கூறியிருப்பது, பெரிய விழிப்பு உணர்விற்கான சிறு ஆரம்பம். பெண்கள் தன்னலம் பேணி வலிமையுடனும், தன்னம்பிக்கையுடன் இருக்க வேண்டும். அதுவே அந்நாட்டின் முன்னேற்றத்திற்கு அடிப்படை எனக் கூறியிருப்பது சமகாலத்துக்குத் தேவையாக அமைந்துள்ளது.

இசையமைப்பாளர் அமித் திரிவேதி, காட்சிகளின், கதாபாத்திரங்களின் எமோஷன்களை இசையில் சரிவர ஆடியன்ஸிடம் கொண்டுபோய்ச் சேர்த்திருப்பதற்கு ஹேட்ஸ் ஆஃப். இது இயக்குநர் பால்கி முழுக்க முழுக்க இசைஞானி இளையாராஜா இல்லாமல் வேலை செய்திருக்கும் முதல் படம் என்பது குறிப்பிடத்தக்கது. கணவனின் கண்களைக்கூட பார்த்துப் பேசாத கிராமத்துப் பெண்ணாக ராதிகா ஆப்தே, தனக்கென ஒரு வாழ்க்கையைத் தேடிக்கொண்டே இருக்கும் சோனம் கபூர் என இருவரும் நடிப்பில் தங்களை நிலை நிறுத்தினாலும், அவர்களது கதாபாத்திரம் ஆழமாக இல்லாதது திரையில் சில நெருடல்களை ஏற்படுத்துகிறது. மேலும், ஆண் - பெண் நெருக்கமாக இருக்கிறார்கள் என்றால், அவர்களிடையே காதல் காட்சிகள் கட்டாயம் இருக்கவேண்டும் என்பது போன்ற ஸ்ட்டீரியோ டைப் சீன்களுக்கும் குட்-பை சொல்லியிருக்கலாம். மேலும், கதை எந்தக் காலகட்டத்தில் நடக்கிறது என்பதற்கான டீட்டெயிலிங்கையும் சேர்த்திருக்கலாம்.

தமிழகத்தின் ரியல் பேட்மேன் அருணாச்சலம் முருகானந்தம் கதைக்கு முலாம் பூசப்பட்டிருப்பது, 'பிராண்ட் செய்துதான் நாப்கின்களை விற்கவேண்டும். அப்போதுதான் மக்கள் அதிகம் வாங்குவார்கள்' என்ற வசனத்திலிருந்தே தெரிய வந்திருக்கிறது. இதே கதையைத் தழுவி 2017-ல் வெளிவந்த இந்தி திரைப்படமான 'ஃபுல்லு' தவறிய பிராண்டிங் அண்ட் மார்க்கெட்டிங் விஷயங்களை உட்புகுத்தி வெளிவந்துள்ளது 'பேட் மேன்'. பெண்களும் கூச்சப்பட்ட, அச்சப்பட்ட மாதவிடாய் மற்றும் சானிட்டரி நாப்கின் விஷயங்களைப் பற்றி ஒரு ஆண் பேசியதும், அதற்கென ஒரு தீர்வைக் கொடுத்து ஆண்களுக்குப் பெருமையைச் சேர்த்த இந்த 'சூப்பர்மேன்', படத்திற்கு டிக்கெட் வாங்கும் அதே தொணியில் நாளை நாப்கின்களும் வாங்குவது எந்தத் தவறும் இல்லை என்கிறான், இந்த 'பேட்மேன்'.

அமெரிக்காவிலுள்ள ஹார்வர்டு பல்கலைக்கழகத்தில் கமல் உரையாற்றினார். வேட்டி சட்டை அணிந்து இந்த நிகழ்வில்  கலந்துகொண்டார் கமல். 'வணக்கம்' என்று ஆரம்பித்தவருக்குப் பெரும் ஆரவாரத்துடன் வரவேற்பு கிடைத்தது. பத்திரிகையாளர் பர்கா தத், பார்வையாளர்கள் கேட்ட கேள்விகளுக்கு பதில் அளித்தார். அப்போது, "நான் வித்தியாசமானவன் எனக் கூறவில்லை. அரசியல் களத்தில் வித்தியாசமானவனாக இருக்க விரும்புகிறேன். அரசியலில் எனது நிறம் நிச்சயம் காவியாக இருக்காது. எனக்கும் ரஜினிக்கும் நோக்கம் என்பது அரசியலில் மக்களுக்கு நல்லது செய்ய வேண்டும் என்பதுதான். நானும் ரஜினியும் நல்ல நண்பர்கள். ஆனால் அரசியல் களம் என்பது வேறு. அரசியலில் வித்தியாசப்பட்டு இருக்கவே விரும்புகிறேன்” என்றார். பெருவாரியான மக்களை சென்றடைய தொடர்ந்து ஆங்கிலத்திலேயே உரையாற்றினார்.

அதன் தமிழாக்கத்தை கமல் நேற்று இரவு ட்விட்டரில் வெளியிட்டார். அதில் குறிப்பிட்டவை பின் வருமாரு:-  

"பாரம்பர்யம் கலாசாரம், மூத்த மொழியான தாய்த்தமிழ், கட்டடக் கலையின் முன்னோடி, சமூக நீதி காத்தல், உலக வணிகத்தில் வழிகாட்டி எனப் பெருமைப்படத்தக்க சாதனைகளுக்கு உரிமை கொண்டாடும் சிறப்பு கொண்ட தமிழகத்திலிருந்து உங்களைச் சந்திக்க வந்திருக்கிறேன்.

வெவ்வேறு விதமான கிராமங்களை உள்ளடக்கிய வேற்றுமையில் ஒற்றுமை காணும் இந்தியா என்பதில் எனக்குப் பெருமை உண்டு.

ஆனால் தற்போது அங்கே அனைத்தும் சீராக இல்லை; இன்னும் காலம் கடக்கக் கூடாது என்ற தொலைநோக்கோடு உறுதியான குறிக்கோளோடு புத்துலகம் காண வேண்டுமென விரைவில் அரசியல் பயணம் புறப்படவிருக்கிறேன்.

என்னுடய உண்மையான நோக்கம் சாதாரண நிலையிலுள்ள தமிழகத்தின் நிலையை மாற்றிக் காட்டுவதே ஆகும். ஏனென்றால் அங்கு அரசியல்வாதிகள், வர்த்தகம் செய்பவர்களில் பலர் தெளிவற்ற அணுகுமுறையைக் கொண்டவர்களாக உள்ளனர் எனக் கருதப்படுகிறது.

தமிழகத்திற்கு தக்க அணுகுமுறையோடு கூடிய வழிகாட்டுதல் அவசியமாகிறது. இதையொட்டியே எனது நோக்கமும் அமைந்துள்ளது. அங்கு கடைப்பிடிக்கப்படும் சீரற்ற கொள்கைகள் திருத்தப்படுவது முக்கியமாகும்."

"குறிப்பாக தமிழகத்தில் அரசியல்வாதிகளின் போக்கு மக்கள்நலனில் அக்கறையற்றதாக இருக்கிறது மாநிலத்தின் மொத்தவருவாய் நிலை பற்றாக்குறையாக உள்ளது. 2016-17 - ம் ஆண்டில் அகில இந்திய நிலையில் தமிழகம் நிதிநிலைப் பற்றாக்குறையில் மூன்றாம் இடத்தை வகிக்கிறது.

இதற்குக் காரணம் அரசின் வீணான செலவுகள் திட்டமிடாத நிதிச்சுமைகள், தொலைநோக்கோடு மக்கள்நலத் திட்டங்களை அமல்படுத்தாத அலட்சியப் போக்கு ஆகியவை ஆகும்.

மேலும் தமிழகத்தின் இயற்கை வளங்களைப் பாதுகாப்பதிலும் பொறுப்பற்ற தன்மை நிலவுகிறது; குறிப்பாக பல்லாண்டுகளாக நீர்நிலைகளைச் சீரமைக்காமல் விட்டதால் தண்ணீர்ப் பஞ்சத்தை சந்திக்கவேண்டியுள்ளது. நீர்நிலைகளைத் தூர் வாரி தண்ணீரைச்  சேமித்தாலே நமது தேவைகள் பூர்த்தியாக வாய்ப்புண்டு.

கல்வி, மக்கள்நலன் காத்தல், வேலைவாய்ப்பை உருவாக்குதல், அநீதி இழைக்கப்பட்டோருக்கு நீதி கிடைத்தல் என்பது உள்ளிட்ட அம்சங்களில் தமிழகம் தன் கடமையைச் சரியாகச் செய்ததா என்பது கேள்விக்குறியே.

இத்தகைய சூழலில் எனது தாயகம் குறித்த எனது கனவை நனவாக்கும் முயற்சியைத் தொடங்கவிருக்கிறேன். இது புதிய பாதையல்ல; மூத்தோர் பலரும் முயற்சி செய்ததை புதிய தலைமுறையோடு இணைந்து வடிவம் கொடுக்கத் தயாராகி வரும் சூழலில் இங்கு உங்களை சந்திப்பதில் மகிழ்ச்சியடைகிறேன்.

"கிராமங்கள் புதுவடிவமெடுத்தால் அது நாட்டையே மாற்றும் ; ஒரு நாட்டின் மறுமலர்ச்சி கிராமங்கள் சீரமைப்பையே மையமாகக் கொண்டதாகும். இதன் மூலம் தன்னிறைவு பெற்ற கிராமங்கள் உருவாகும். அது தேசத்தையே மறுகட்டமைப்பு செய்வதாகவும்" என எனது வழிகாட்டியும் நாடே போற்றக் கூடிய மாமனிதருமான அண்ணல் காந்தியடிகள் சுட்டிக் காட்டியுள்ளார்.

இதை மனதில் ஏந்தி பிப்ரவரி 21 - ம் தேதி எனது அரசியல் பயணத்தை 'நாளை  நமதே' என்ற இலக்கோடு தொடங்கவிருக்கிறேன். இதற்கு முன்னோடித்  திட்டமாக ஒவ்வொரு மாவட்டத்திலும் ஒரு கிராமத்தை ஒட்டுமொத்த வளர்ச்சிகொண்டதாக மாற்ற தத்தெடுக்க இருக்கிறோம்.

இவ்வாறு தமிழகத்தில் முன்மாதிரி கிராமங்களை உருவாக்குவது இந்தியாவிற்கே வழிகாட்டுவதாக அமைய வாய்ப்புள்ளது. வளமிகுந்த சமூகக் கட்டமைப்பு உருவாக அனைத்து வசதிகளும் அவசியம். இதற்கான செயல்பாடு 'மாற்றத்தை நோக்கியே என்ற அணுகுமுறையோடு இருக்கும்.

ஒவ்வொரு பயணத்திலும் எடுத்து வைக்கும் முதலடி மாற்றத்திற்குத் தூண்டுகோளாக அமையும் என்பது அனுபவம். கிராமம் தொடங்கி மாநிலத்தை எட்டி, பின்னர் காலப்போக்கில் இந்தியாவிற்கு இத்தகைய முன்னேற்றத்தை கொண்டுவர முடியும் என்பது இதன் நோக்கமாகும்.

இத்தகைய மகத்தான செயல்பாட்டிற்கு உலக நிலையில் பரவியுள்ள தமிழர்கள் தங்கள் ஆதரவை திட்டங்கள்,வழிகாட்டுதல்களை தெரிவிக்க வேண்டுமென்பதே எனது எதிர்பார்ப்பாகும்.

இவ்வாறு நான் கூறுவதால் ஏதோ உங்களிடம் நிதி கேட்பதாக கருதிவிடாதீர்கள்; அதைக் காட்டிலும் மேலான மதிப்புமிகுந்த யோசனைகள், தனித்தன்மை கொண்ட உங்களின் கற்பனைகள் எங்களுக்கு வழிகாட்டுவதாக அமைய வேண்டும். இதையே நான் எதிர்பார்க்கிறேன் என்னுடைய அரசியல் பயணம் ஹார்வர்டு பல்கலைகழக மாணவ மாணவியர் வாழ்த்துகளோடு அவர்கள் அறிவாற்றல் ஆதரவோடு தொடங்கவிருப்பதில் மகிழ்கிறேன்.

உடனடிச்  செயல்பாடே உரிய பயனைத் தரும் என்பது எனது உறுதியான நம்பிக்கை. நாற்காலியில் அமர்ந்து அரசியல் பேசுவது அலங்காரமாக இருக்கலாம். அது ஆக்கபூர்வமான செயல்பாட்டுக்கு உதவாது.                           

தேர்தல் அரசியல் எங்களை எதிர் நோக்கியுள்ளது. அதன்முலம்தான் இந்தச் சமுகத்திற்கான கடமையைச் செய்ய முடியும். செயல்படாத அரசை நம்புவதைக்  காட்டிலும் நல்ல அரசை உருவாக்குவது எனது உரிமை என்பதே இன்றைய காலகட்டத்தின் அவசியமாகும்.

இது எனது அரசியல் பயணத்தின் முன்னோட்டப்  பேச்சாகும் ; அடுத்தகட்டமாக எனது மக்களைச் சந்தித்து உரையாடவிருக்கிறேன். என்னை ஒரு செயல்படக்கூடிய நபராகவே கருதி நீங்களெல்லாம் கூர் தீட்ட வேண்டும். தமிழக கிராமங்களுக்கு மறுவடிவம் கொடுக்க உங்கள் அனைவரின் உதவி அவசியம்.

என்னை அரசியல்வாதியாகப்  பதிவு செய்யத் தொடங்கியிருக்கிறேன். புதிய மாறுதலுக்குச் செயல்வடிவம் கொடுக்கும் சீர்திருத்தவாதியாகவும் செயல்படுவேன்.

பழம்பெருமை மிக்க எங்கள் தாயகத்தை ஆட்சி செய்த அன்றைய சேர, சோழ, பாண்டிய மன்னர்கள் நிர்வாகம், மொழி காத்தலில் முன்னோடியாகத் திகழ்ந்ததை இப்போதும் நினைத்து நாம் பெருமைப்படலாம். அவர்கள் விட்டுச் சென்ற உயர்ந்த யோசனைகள் வழிகாட்டுதல்கள் நெறிமுறைகள் இப்பொழுதும் நமக்குப் பயன்படக் கூடியவை. ஆனால் தற்போதைய தலைவர்கள் இதிலிருந்து கற்றுக் கொள்வார்களா என்பது விடையில்லா வினா.                  

 வெற்றி தோல்விகள் வரலாம்; சமூக அரசியல் காலஓட்ட மாற்றத்தில் இவையெல்லாம் நமது செயல்பாட்டிற்கான குறியீடுகளாகும்.

தொலைநோக்கோடு நான் தொடங்கவிருக்கும் இந்தப் பயணத்தில் நிறைய கற்றுக் கொள்ளவிருக்கிறேன் . என் பயணத்தில் இணைந்து தமிழகத்துக்குப் புது வடிவம் கொடுக்க உதவுவீர்கள் என்ற நம்பிக்கையுடன் விடைபெறுகிறேன். நாளை நமதே என்ற பயணத்தின் முடிவு எதிர் காலத்தில் மாறுபட்ட, உயர்ந்த தமிழகத்தை  நமக்குக் காட்டும்" இவ்வாறு கமல் கூறினார்.   

அதே மேடையில் தனது 'நாளை நமதே' வலைதளத்தையும் கமல் தொடங்கியது குறிப்பிடத்தக்கது.

முதலில் 'எந்திரன் -2' என்று வர்ணிக்கப்பட்ட  '2.0' படத்தின் பூஜை போடப்பட்டு கால்வாசி படப்பிடிப்பு முடிந்துவிட்டது என்று எல்லோரும் நினைத்துக் கொண்டிருந்தனர். அப்போது, திடீரென 2015-ஆம் ஆண்டு விநாயகர் சதுர்த்தி அன்று 'கபாலி' படத்துக்கு  பூஜை போடப்பட்டு, சென்னையில் படப்பிடிப்பும் துவங்கியது. அதன்பின் '2.0' படத்தின் ஷூட்டிங் நைல்நதியாய் நீ...ண்டு கொண்டே இருந்தது. 'கபாலி' படத்தைப் பொசுக்கென முடித்து விசுக்கென வெளியிட்டார்,  பா.ரஞ்சித். 'எங்கள் தயாரிப்பில் எத்தனையோ இயக்குநர்கள் எத்தனையோ படங்களை இயக்கி இருக்கின்றனர். எஸ்.பி.முத்துராமனுக்குப் பிறகு என் இதயம் கவர்ந்தவர், தம்பி ரஞ்சித்' என்று பாராட்டுமழை பொழிந்து உச்சிமுகர்ந்தார், 'கலைப்புலி' எஸ்.தாணு. ஒரே நேரத்தில் ஒரே இயக்குநருக்கு இரண்டு படங்களுக்குக் கால்ஷீட் கொடுப்பதை தவிர்த்துவந்த ரஜினி, 'கபாலி'க்கு பிறகு 'காலா'வை கொடுத்து ரஞ்சித்துக்கு ஆனந்த அதிர்ச்சி கொடுத்தார். மும்பை பின்புலத்தில் அமைந்த கதை என்பதால், அங்கே தாராவியில்  'காலா' படப்பிடிப்பு துவங்கியது  ரஜினி ஷூட்டிங்கை வேடிக்கை பார்க்கவந்த  மக்கள் கூட்டத்தின் நெருக்கம் அதிகமாகவே போக்குவரத்து  நெரிசல் ஏற்பட்டது. 'கபாலி' படத்தை மலேசியாவில் படமாக்கியபோது இதேமாதிரி மக்கள் அலைஅலையாய் வந்தனர். அந்த நிலையை மாற்றுவதற்காக சென்னை மோகன் ஸ்டுடியோவில் மலேசியாவைப் போலவே செட்போட்டுப் படமாக்கினார்கள். அதுபோலவே, 'காலா'வில் இடம்பெறும் முக்கியமான காட்சிகளை மும்பையில் படமாக்கும்போது ஜனநெரிசல் இடையூறாக இருந்ததைத் தவிர்க்கும் பொருட்டு சென்னையில் ஈவிபி ஸ்டுடியோவில் தாராவியைப் போலவே செட்போட்டுப் படமாக்கினார், ரஞ்சித். இப்போது 'காலா' படத்தின் படப்பிடிப்பு முழுவதும் முடிந்துவிட்டது. இன்னும் '2.0' படத்தின்  கிராஃபிக்ஸ் வேலைகள் சீனப்பெருஞ்சுவர் ரேஞ்சுக்கு உயர்ந்துகொண்டே செல்வதாகச் சொல்கிறார்கள்.

தனுஷ் தயாரிப்பாளராக இருக்கும் 'காலா' படத்தை '2.0' படத்துக்கு முன்னதாகவே ரிலீஸ் செய்தால் '2.0' படத்தின் தயாரிப்பாளர் 'லைக்கா' சுபாஷ்கரன் கோபித்துக் கொள்வாரே... என்று யாராவது வருத்தப்பட்டால் அவர்களின் அறியாமைக்கு 'வெரி ஸாரி' பதிலைத்தான் தரமுடியும். ஏனென்றால் 'சிவாஜி' படத்தில் 'சிவாஜியும் நான் தான்... MGRம் நான் தான்...' என்று  ரஜினி ஸ்டைலாக  சொல்வது போல் இப்போது 'காலா'  தயாரிப்பாளரும் நானே... '2.0' தயாரிப்பாளரும் நானே...' என்று கூலாக கூவிக்கொண்டு இருக்கிறார், 'லைக்கா' சுபாஷ்கரன். '2.0' படத்திற்கு முன்பாக, 'காலா' ரிலீஸ் ஆகவிருக்கிறது. ஆனால், இதை முன்கூட்டியே திட்டமிட்டது, 'லைக்கா' நிறுவனம்தான். கடந்த இரண்டு மாதங்களுக்கு முன்பே  'காலா' படத்துக்கு முன்கூட்டியே அட்வான்ஸ் பணம் கொடுத்து உலகம் முழுக்க வெளியிடும் விநியோக உரிமையைப் பெற்றுவிட்டது லைக்கா. அதுசரி '2.0'  ப்ளஸ் 'காலா' படங்களின் உண்மை நிலை என்ன?

'2.0' திரைப்படம் 2015-ஆம் ஆண்டு ஆரம்பிக்கப்பட்டு படப்பிடிப்பு 2017-ஆம் ஆண்டோடு முடிந்தது. சென்னை பிரசாத் ஸ்டுடியோவில்  இரண்டே நாளில் டப்பிங்கைப் பேசி முடித்தார், ரஜினி. அதன்பிறகு ஆரம்பிக்கப்பட்ட '2.0' படத்தின் கிராஃபிக்ஸ் வேலைகள் வெளிநாட்டில் அமெரிக்கா, லண்டன் இடங்களிலும், சென்னையில் பிரசாத் ஸ்டுடியோ, நேக் ஸ்டுடியோவிலும் நடந்து வருகிறது. முதலில் ஜனவரி 26-ஆம்தேதி உறுதியாக ரிலீஸ் செய்வதாக முடிவுசெய்யப்பட்டது. புகழ்பெற்ற ஹாலிவுட் படங்களில் பணியாற்றிய டெக்னீஷியன்களைக் கொண்டு ஒவ்வொரு காட்சியையும் செதுக்கி உருவாக்கினார், ஷங்கர். இங்கே கோடம்பாக்கம் கதை டிஸ்கஷனில் கலந்து கொள்பவர்கள் அந்தப்பட கதையை வேறு சினிமா கம்பெனியில் உளறுகிற மாதிரி வெளிநாட்டு டெக்‌னீஷியன்களும் டங் ஸ்லிப்பாகி அங்கே சொல்லிவிட, '2.0' படத்தில் இடம்பெற்ற முக்கியமான கிராஃபிக்ஸ் காட்சிகள் போலவே  டிசம்பர் மாதம் வெளியான ஹாலிவுட் படத்தில் வெளிவந்துவிட்டதால் படுடென்ஷன் ஆகிவிட்டதாம் ஷங்கர் டீம். இதனால், கிராஃபிக்ஸ் காட்சிகளுக்கான நேரம் இன்னும் அதிகம் தேவை என்பதல், ஏப்ரல் 14-ஆம் தேதி ரிலீஸ் ஆகும் என்ற நிலையில் இருந்த படத்தின் வெளியீட்டு தேதி, இப்போது தள்ளிப்போயிருக்கிறது. எனவேதான், தற்போது 'காலா' படத்தை வெளியிடலாம் என்று முடிவில், 'ஏப்ரல் 27' என்ற தேதியையும் அறிவித்திருக்கிறார், நடிகர் தனுஷ்.

'2.0' படத்துக்கு ரஜினி டப்பிங் பேசியதே சினிமாவில் பலருக்கு தெரியாது. நேக் ஸ்டுடியோவுக்கு 'காலா'பட டப்பிங் பேசுவதற்காக வந்தபோது  உலகம் முழுக்க அந்த செய்தியும், போட்டோவும் பரவிவிட்டது. முதல்நாள் காலை 9 மணிக்கு வந்தவர் 'காலா' படத்துக்கான டப்பிங்கை பேசினார், மதியம் ஒரு மணிக்கு சாப்பிட்டுவிட்டு சிறிதுநேரம் ஒய்வெடுத்தார் அதன்பின் சரியாக  2.30 மணிக்குப் பேச ஆரம்பித்தவர் 5 மணிக்கு முடித்துவிட்டார். தன் வேலை முடிந்துவிட்டது என்று உடனே வீட்டுக்குச் செல்லவில்லை அதன்பிறகு அன்று காலையில் இருந்து தான் பேசிய டயலாக்குகள் சரியாக வந்து இருக்கிறதா? என்று சரி பார்த்த பின்னரே வீட்டுக்கு புறப்பட்டுச் சென்றார். இதுவரை மொத்தம் இரண்டரை நாட்களில் முழுப்படத்துக்கான டப்பிங்கையும் பேசி முடித்து விட்டார், ரஜினி. 'காலா' படத்தில் நடித்து இருக்கும் நடிகர், நடிகைகளில் பெரும்பாலானவர்கள் தங்களில் சொந்தக் குரலிலேயே டப்பிங் பேசிவிட்டனர். குறிப்பாக சமுத்திரக்கனி, தாஸ்பாண்டியன் பேசினார்கள். 'காலா' படத்தின் முக்கியமான வில்லனான நானா படேகர் இந்தி பதிப்பில் மட்டும் சொந்தகுரலில் பேசுகிறார். தமிழ், தெலுங்குக்கு வேறு ஒருவர் டப்பிங் பேசியிருக்கிறார். தற்போது 'காலா' படத்தின் 'ட்ரிம்மிங்' வேலைகள் விறுவிறுப்பாக நடந்துவருகிறது. ரஜினியின் '2.0' படத்தின் தெலுங்கு உரிமையை ஆசியன் பிலிம்ஸ்  61 கோடிக்கு விநியோக உரிமையை பெறுவதற்கு முன்கூட்டியே விலைபேசி இருக்கிறது. அதுபோல கேரளாவில் 15 கோடிக்கும், கர்நாடகாவில் 12 கோடிக்கும் விலைபேசி வருகின்றனர். குறித்த நேரத்தில் '2.0' ரிலீஸ் ஆகாமல் போனால் ரசிகர்கள் மற்றும்  திரையரங்க விநியோகஸ்தர்கள் மத்தியில் குழப்பம் ஏற்படும் என்பதைத் தவிர்க்கத்தான், '2.0' படத்திற்குக் குறித்து வைத்திருந்த தேதியில் 'காலா' படத்தை ரிலீஸ் செய்யத் திட்டமிட்டிருக்கிறார்கள். அதை நடிகர் தனுஷ் தனது ட்விட்டர் கணக்கில் அதிகாரப்பூர்வமாக அறிவிக்க, தமிழ்நாட்டில் இருக்கும் முக்கியமான தியேட்டர்களை இப்போதே  பரபரப்பாக ஒப்பந்தம் செய்ய ஆரம்பித்து இருக்கிறது, லைக்கா நிறுவனம்.     

படங்கள் பல தியேட்டர்களில் வந்து குவிகிறது. இந்த வாரம் வந்துள்ள மூன்று படங்களில் ஒன்று சொல்லிவிடவா. அர்ஜூன் இயக்கத்தில் வெளியான இப்படம் என்ன சொல்ல விரும்புகிறது என பார்க்கலாம்.

கதைக்களம்

படத்தின் ஹீரோ சந்தன் குமார் தமிழுக்கு புதுமுகம். இதில் இவரின் பெயர் சஞ்சய். பெரிய தொழிலதிபராக இருக்கும் இவர் விமானத்திற்காக காத்திருக்கிறார். அப்போது திடீரென பழைய நினைவுகள் அவருக்கு வருகிறது.

இவரின் அப்பாவாக மொட்டை ராஜேந்திரன். நண்பர்களாக பிளாக் பாண்டி மற்றும் சதீஷ். ஆரம்பத்தில் பத்திரிக்கை துறையில் இருக்கும் இவர் ஒரு கொலை தொடர்பான உண்மை சம்பவத்தை அம்பலமாக்கி பாராட்டை பெறுகிறார்.

இதே போல ஹீரோயின் ஐஸ்வர்யா (மது) ஒரு ஊடகத்தில் நிகழ்ச்சி தொகுப்பாளராக பணியாற்றுகிறார். இவருக்கு அப்பா, அம்மா இல்லை. சுஹாசினியின் பார்வையிலும், தாத்தாவின் வளர்ப்பிலும் இருக்கிறார். இவருக்கு தோழர்களாக போண்டா மணி மற்றும் யோகி பாபு.

சஞ்சய், மது ஒரு சின்ன விபத்தால் சந்திக்கிறார்கள். இருவருக்கும் தங்கள் வேலை சார்பாக கார்கில் செல்ல வேண்டிய சூழ்நிலை வருகிறது. இருவரும் தங்கள் நண்பர்களோடு வழிப்பயணத்தை தொடர ஹீரோ, ஹீரோயின் இருவரும் மீண்டும் இங்கே சந்திக்கிறார்கள்.

ஆனால் எங்கே செல்கிறோம் என விசயம் தெரிந்ததும் இருவரது நண்பர்களும் ஒரு விலகிச்செல்கிறார்கள். பின் தனியாக சஞ்சய், மது தங்கள் பயணத்தை தொடர்கிறார்கள்.

கார்கில் பகுதியில் ராணுவத்துறையில் நடக்கும் விசயங்களை பதிவு செய்கிறார்கள். நடந்து போகும் சில விசயங்கள் சொல்லாத காதல் ஒருபக்கம் இருவரின் மனதுக்குள்ளும். இந்நிலையில் ஒரு பெரும் ஆபத்து வர இருவரும் என்ன ஆனார்கள், காதலை சொன்னார்களா என்பது தான் கதை.

படத்தை பற்றிய அலசல்

படத்தின் ஹீரோ சந்தனுக்கு நல்ல தோற்றம். நடிப்பும், நடனமும் ஓகே ரகம் தான். ஆரம்பத்திலேயே சண்டை காட்சிகள். நல்ல முயற்சி. ஆனாலும் சில லாஜிக்கை மீறிய சண்டைகள்.

இருந்தாலும் ஹீரோ தமிழ் படத்துக்கு செட்டாவார் என்று சொல்கிறது. முன்பே கன்னடப்படங்களில் நடித்துள்ளார். அந்த அனுபவம் இப்போது அவருக்கு கைகொடுத்திருக்கிறது.

ஹீரோயின் ஐஸ்வர்யா, நடிகர் அர்ஜூனின் மகள். முன்பே பட்டத்து யானை படம் மூலம் வந்தார். அதன் பிறகு ஐந்து வருடங்கள் கழித்து இப்போது மீண்டும் வந்திருக்கிறார். அதுவும் தன் அப்பா இயக்கிய படத்தில். நன்றாக நடித்திருக்கிறார். ஆனால் சில இடங்களில் அதீதமான வசனங்கள் கொஞ்சம் சலிப்பு தட்டுகிறது.

படத்தின் இயக்குனரும் நடிகருமான அர்ஜுன் ஒரு கேமியோ ரோலில் வருகிறார். விமானத்துறை அதிகாரியாக. அதிலும் ஒரு பாடல் இவருக்காகவே படத்தின் இடையில். பொருந்தும் படியாக அமைந்ததா என்றால் படக்குழுவை தான் கேட்கவேண்டும்.

மேலும் காமெடியன்கள் சதீஷ் சில இடங்களில் வந்தாலும் ஒரு பெரியளவில் காமெடிகள் இல்லை. ஆனாலும் யோகி பாபு இருந்தும் படத்தில் அவரை பயன்படுத்தாமல் விட்டார்களா இல்லை இவர் எடுத்துக்கொள்ளவில்லையா என சந்தேகம்.

மொட்டை ராஜேந்திரன் ஒரு அப்பாவாக நடித்திருக்கிறார். ஆனாலும் அபார்ட்மெண்ட் ஆண்ட்டிகளுடன் சேர்ந்து செய்யும் ரகளை கொஞ்சம் தூக்கல். அப்போது உள்ளே நுழைகிறார் மனோபாலா.

படத்தில் சில பதிவு செய்யப்பட்ட போர் காட்சிகள் மீண்டும் மீண்டும் வந்தது போல ஒரு ஃபீல்.

கிளாப்ஸ்

ராணுவ வீரர்களுக்காக இப்படம் எடுக்கப்பட்ட முயற்சியை பாராட்டலாம்.

இருக்கும் பாடல்களில் உயிரே உயிரே பாடல் மீண்டும் மீண்டும் நம்மை கேட்க தூண்டும்.

பல்பஸ்

வந்த ஜோரிலேயே அடுத்தடுத்து பாடல்கள் கொஞ்சம் ஆர்வத்தை குறைக்கிறது.

பட காட்சிகள் அமைப்பு, தொழில் நுட்ப விசயங்கள் என கவனம் செலுத்தியிருக்கலாம்.

ஹீரோயின் டையலாக்கில் கொஞ்சம் செண்டிமெண்ட்களை தவிர்த்திருக்கலாம்.

மொத்தத்தில் சொல்லிவிடவா ஓகே தான். இன்னும் பிளான் செய்து பக்காவாக சொல்லியிருக்கலாம் அர்ஜுன் சார்.

 நம்ம ஊர் ஹோட்டல்களில் எப்படி எல்லாம் டுபாக்கூர் வேலை நடக்குது என்று அந்தக் கடைக்காரர்களிடமே போட்டு வாங்கிய தகவல்கள்..

.
இட்லி: பொதுவா இட்லி மெத்துனு இருக்கணும்னா, ஒரு டம்ளர் இட்லி அரிசிக்கு கால் டம்ளர் உளுந்து தேவை. இரண்டையும் தனித்தனியா ஊறவெச்சு, தனித்தனியாதான் அரைக்கணும். அஞ்சு மணி நேரம் புளிக்கவெச்சு, சுட்டீங்கன்னா பஞ்சு மாதிரி இட்லி தயார். ஆனா, என்ன நடக்குது இங்க? கடை இட்லி அரிசி கால் பங்கு, ரேசன் அரிசி முக்கால் பங்கு, உளுந்து கால் பங்கு, ஜவ்வரிசி முக்கால் பங்கு, நைட்டு ஊறவெச்ச பழைய சாதம் கொஞ்சம், சோடா உப்பு எக்கச்சக்கமா... எல்லாத்தையும் அரைச்சு, மூணு மணி நேரம் வெயில்ல வெச்சுட்டு எடுத்து சுட்டால், கும்முன்னு குஷ்பு இட்லி தயார். அந்த இட்லியும் மீந்துருச்சின்னா, அப்பவும் பிரச்னை இல்லை. அடுத்த நாள் அரைக்கிற மாவுல மீந்துபோன இட்லியைப் போட்டு அரைச்சிடுவாங்க!


சோறு: தரமான சோறுன்னா, சோத்துப் பருக்கையை விரலில் வெச்சு மசிச்சா மை மாதிரி மசியணும். அப்பதான் அது வயித்துக்கு ஒண்ணும் செய்யாது. அப்படி இருந்தா கஸ்டமர்ஸ் நிறைய சாப்பிடுவாங்களே... அதுக்காகத்தான் பெரும்பாலான ஹோட்டல்ல முக்காப் பதத்துல சாதத்தை எடுத்துடுவாங்க. சாதம் பளிச்சுனு வெண்மையா இருக்கவும், லேட் ஆனாலும் காய்ஞ்சு போகாமல் இருக்கவும் சாதம் வேகும்போதே சுண்ணாம்புக் கல்லைத் துணியில் கட்டி சாதத்தில் போட்டுடுவாங்க. அன்லிமிட்டட்னு அகலமா போர்டுல எழுதி இருந்தாலும், இந்தச் சோற்றைக் குறிப்பிட்ட அளவுக்கு மேல நீங்க சாப்பிடவே முடியாது!


புரோட்டா: பல ரோட்டுக் கடை ஹோட்டல்கள்ல மைதா மாவோட சோடா உப்பு கலந்து, அதுல கழிவு டால்டாவை ஒரு பங்கு மாவுக்குக் கால் பங்கு டால்டா கணக்குல (ஹோட்டலுக்குன்னே விக்கிற மலிவு விலை டால்டா!) கலந்து அடிச்சு அரை மணி நேரத்துல புரோட்டா சுடுவாங்க. புரோட்டா சும்மா பூ கணக்கா பொலபொலன்னு உதிரும். ஆனா, அத்தனையும் போங்கு புரோட்டா!


சால்னா : சிக்கன் கடையில் பொதுவா நாம கொழுப்பு, ஈரல், குடல், தலை, தோல், இதெல்லாம் வாங்க மாட்டோம். அதேபோல மட்டன் கடையில குடலோட சேர்ந்து இருக்கிற ஒட்டுக்கொழுப்பு, ஒட்டுக்குடல் வாங்க மாட்டோம். இதை எல்லாம் தூக்கிப்போடாம ஓரமாக் குவிச்சுவெச்சிருப்பாங்க. பழக்கமான கடைக்காரரா இருந்தா விசாரிச்சுப் பாருங்க. 'ஹோட்டல்காரங்க மொத்தமா வாங்கிட்டுப் போயிடுவாங்க’னு அவரும் யதார்த்தமா சொல்லிடுவார். அரைக் கிலோ கறியோட இதை எல்லாத்தையும் ஒட்டு மொத்தமாப் போட்டு தூக்கலா கறி மசாலா, மிளகாய்த் தூள், கொத்தமல்லித்தூள், கொஞ்சம் மரத்தூள் அல்லது குதிரை சாணத்தூள் கலந்து, அஞ்சு ஸ்பூன் அஜினாமோட்டா கலந்து கொதிக்கவெச்சா அரை அண்டா நிறைய திக்கான சால்னா ரெடி!


ஒரு முக்கியமான எச்சரிக்கைங்க... தலையே போனாலும் சரி, (ரோட்டுக்)கடைகள்ல தலைக்கறி மட்டும் சாப்பிடாதீங்க. பொதுவாகவே செம்மறி ஆட்டோட தலையில புழுக்கள் இருக்கும். இது இயற்கையான விஷயம்தான். வீடுகளுக்கு வாங்குறப்ப பெரும்பாலும் வெள்ளாட்டுத் தலை தான் வாங்குவோம். செம்மறி ஆட்டுத் தலை வாங்கினாலும் கடைக்காரரு நம்ம கண்ணுல படாம தலையைக் கொதிக்கிற தண்ணில போட்டுட்டு, அப்புறம் அதை எடுத்து தரையில தட்டோ தட்டுன்னு தட்டி புழுவை எல்லாத்தையும் கொட்டிட்டுதான் மேலேயே எடுத்து வைப்பாங்க. அதை வீட்டுக்கு வாங்கிட்டுப்போய் நல்லா சுத்தம் பண்ணி சாப்பிடுவோம். ஆனா, மொத்தமா ஹோட்டலுக்கு விக்கிறப்ப எல்லாம் செம்மறி ஆட்டுத் தலையை இப்படி சுத்தம் பண்ண மாட்டாங்க. அப்படியே கைமாதான்.


எல்லாத்தையும்விட முக்கியம், ஹோட்டல்களுக்கு சப்ளை செய்யறதுக்குனே பஜாரில் மளிகைப் பொருட்கள் குறைஞ்ச விலைக்கு கிடைக்குது. எல்லாமே கலப் படம். பாலீஷ் செய்யப்பட்ட இலவச ரேசன் அரிசியோட பொன்னி அரிசி கலந்து விக்கிறாங்க. உடைஞ்ச கழிவுப் பருப்பு, கேசரிப் பருப்பைத் துவரம் பருப்புடன் கலக்கிறாங்க. மிளகாய்த் தூள், கொத்தமல்லித் தூள், டீத்தூளோட மரத் தூள், குதிரை சாணத்தையும் கலக் கிறது எல்லாம் சகஜமப்பா. நெய், எண்ணெய் வகைகளோட பன்றி, மாட்டுக் கொழுப்பு, வனஸ்பதி மற்றும் நாள்பட்ட கழிவு எண்ணெயையும் கலப்பாங்க.



சாதாரண ஹோட்டல் களிலும் கையேந்தி பவன் களிலேயுமே இப்படின்னா டாஸ்மாக் பார் பத்திச் சொல்லவே வேணாம். அதிலும் குறிப்பா, சென்னை பேச்சுலர் பாய்ஸ் ரொம்பக் கவனமா இருக்கணும்.

படுக்கைகள் பலவிதம். எத்தகைய படுக்கையில் படுத்து உறங்கினால் என்ன பலன் ஏற்படும் என்பதை "மருத்துவ திறவுகோல்' என்னும் சித்த மருத்துவ நூல் விளக்கியுள்ளது.

கம்பளிப் படுக்கை- குளிருக்கு இதம். குளிர் சுரம் நீங்கும்.

கோரைப்பாய்- உடல் சூடு, மந்தம், காய்ச்சல் போக்கும், உடலுக்குக் குளிர்ச்சியும், உறக்கமும் ஏற்படும்.

பிரம்பு பாய்- சீதபேதி, சீதளத்தால் வரும் காய்ச்சல் நீங்கும்.

ஈச்சம்பாய்- வாதநோய் குணமாகும். உடல் சூடு, கபம் இவை அதிகரிக்கும்.

மூங்கில் பாய்- உடல் சூடும், பித்தமும் அதிகரிக்கும்.

தாழம்பாய்- வாந்தி, தலை சுற்றல், பித்தம் நீங்கும்.

பேரீச்சம்பாய்- வாதகுன்மநோய், சோகை நீங்கும்.
ஆனால் உடலுக்கு அதிக உஷ்ணம் தரும்.

இலவம்பஞ்சு படுக்கை- உடலில் ரத்தம், தாது பலம் பெறும். தலை முதல் பாதம் வரையிலான அனைத்து நோய்களும் நிவாரணம் பெறும்.

மலர்ப்படுக்கை- ஆண்மை அதிகரிக்கும். நன்றாகப் பசியெடுக்கும்.

இரத்தினக் கம்பளம்- நஞ்சுகளின் பாதிப்பால் ஏற்படும் நோய்களை நீக்கும்.