!...Payanam...!

டிவியில் நடக்கும் 'குடும்பப் பஞ்சாயத்து' ஷோக்கள் குறித்து நடிகையும் இயக்குநருமான ஸ்ரீப்ரியாவின் கருத்துகள்
இணையத்தை பரபரப்பாக்கியுள்ளது.  சன் டிவியில் குஷ்பு நடத்தும் 'நிஜங்கள்' என்கிற டாக் ஷோவில் கலந்து கொண்ட கணவன் - மனைவி இருவரும் திடீரென்று ஒருவருக்கொருவர் தாக்கிக்கொள்ள முயற்சி செய்தனர். இதைத் தடுக்கப் போன குஷ்பு, நடந்த களோபரத்தில் அந்த ஆணின் சட்டையை கொத்தாக பிடித்து விலக்கி விட்டார். இந்த வீடியோ காட்சிகள் சமூக ஊடகங்களில் வைரலாகி உள்ளன.

இந்நிலையில் இது போன்ற ஷோக்கள் தொடர்பாக  நடிகை ஸ்ரீப்ரியா தனது முகநூலில் இன்று ஒரு கருத்தை எழுதினார் அது இன்னும் பரபரப்பை கிளப்பியுள்ளது. அந்த பேஸ்புக் ஸ்டேட்டஸில் " கணவன் மனைவிக்கும் இடையில் பிரச்னை என்றால் அதை தீர்த்து வைக்க சட்டம் இருக்கிறது. கோர்ட் இருக்கிறது. அதில் கிரிமினல் குற்றங்கள் நடந்தால் தண்டிக்க பலவகையான சட்டங்கள் நடைமுறையில் உள்ளன. அதையெல்லாம் விட்டு விட்டு கலைஞர்கள் தொலைக்காட்சியில் பஞ்சாயத்து செய்வதை பார்க்க சகிக்கவில்லை. நாம் இது போன்றவற்றை விடுத்து நமக்குத் தெரிந்த கலை தொடர்பான விஷயங்களில் கவனம் செலுத்தலாம்" என்று எழுதியிருந்தார். இதை அவரின் நட்புப்பட்டியலில் இருக்கும் நபர்களுக்கு மட்டும் தெரியும் வண்ணம் எழுதிய ஸ்ரீப்ரியா பின்னர் அதன் திரைச்சொட்டை (ஸ்கீரின் ஷாட்) ட்விட்டரில் பகிர்ந்தார்.

இதனைத் தொடர்ந்து தனது ட்விட்டர் அக்கௌண்டிலும் இதே பிரச்னை குறித்து கருத்து தெரிவித்த ஸ்ரீப்ரியா "அப்படி இது போன்ற ஆதரவற்ற மக்கள் மீது உங்களுக்கு அக்கறை இருக்குமானால் அதை கேமரா இல்லாமல் செய்யலாமே. அவர்களின் பிரச்னை தீர சரியான ஆலோசகரிடமோ அல்லது குடும்பநல ஆலோசகரிடமோ அனுப்பலாமே" என்றும் ட்விட் எழுதினார்.

இதற்கும் பலத்த ஆதரவு இருந்தது. சிலர் எதிர் கருத்தும் எழுதினார்கள். ஆனால் அவர்களுக்கு பொறுமையாய் பதிலும் சொல்லிக்கொண்டுதான் இருந்தார். இது குறித்து அவரை தொடர்பு கொண்டு கேட்ட போது

"எப்ப டீவியை போட்டாலும் எதோ குடும்பத்தின் பிரச்னையும் கண்ணீரும் அடிதடியும்தான் டிவியில் ஓடிக்கொண்டிருக்கிறது. நான் தமிழ் சேனல்களை மட்டும் சொல்ல வில்லை. தென்னிந்திய சேனல்கள் அனைத்திலும் இதுதான் இருக்கிறது. இன்னும் சொல்வதானால் இந்த நிகழ்ச்சியை நடத்தும் அனைவரும் எனக்கு மிக நெருக்கம். இருந்தாலும் என் கருத்தினையும் என் உணர்வினையும் பகிர்ந்துதானே ஆக வேண்டும். திரைத்துறையில் அடிமட்ட தொழிலாளிகளான புரொடக்‌ஷன் உதவியாளரில் தொடங்கி தயாரிப்பாளர், கலைஞர்கள், இயக்குநர்கள் வரை மிகமிக உணர்வு பூர்வமானவர்கள். கண்ணீர் சுரப்பி என்பது நடிகர்களுக்கு மட்டுமல்ல ஆசையுடன் திரைத்துறைக்குள் வந்த அனைவருக்கும் கொஞ்சம் அதிகமாகவே வேலை செய்யும். நிகழ்ச்சியை நடத்தும் முன்னணி நடிகைகளுக்கு அங்கு பங்கேற்கும் நபர்களின் பின்னணியோ, பிரச்னைகளின் ஆழமோ 100 சதவிகிதம் முழுதாக தெரியப்போவதில்லை.

அப்படியான சூழலில் அவர்களுக்கு நல்லது செய்ய வேண்டுமானால் அதை கேமரா இல்லாமலே செய்யலாமே.இன்றைக்கும் சினிமாவில் எவ்வளவோ பேர் சத்தமில்லாமல் உதவி வருகின்றனர். அதே போல தனிப்பட்ட மனிதர்களின் துயரங்களையோ, கஷ்டங்களையோ வெளிப்படுத்துவதில் தவறில்லை. ஆனால் இது போன்ற குடும்பப் பிரச்னைகளில் ஈடுபடுவதை என்னைப் பொறுத்தவரை ஏற்றுக்கொள்ளமுடியவில்லை. நான் 8-வது வரைதான் படித்துள்ளேன்.

ஒருவர் அவரின் வாழ்க்கை பிரச்னை குறித்து என்னிடம் யோசனை கேட்டாலோ அல்லது அந்த பிரச்னையை சொன்னாலோ என் அனுபவத்தின் அடிப்படையில்தான் என்னால் யோசனை சொல்லமுடியும். அதற்கு என படித்த சட்ட அறிஞர்களோ, குடும்ப நல ஆலோசகர்ளோதான் சரியான ஆலோசனையோ, வழிகாட்டுதலோ செய்ய முடியும். யாரையும் புண்படுத்துவதற்காக இதைச் சொல்லவில்லை. தெலுங்கு தமிழ் என தென்னிந்திய மொழிகளில் நிகழ்ச்சி நடத்தும் அனைவரும் என் நெருங்கிய தோழிகள்தான். இருந்தாலும் சொல்லாமல் இருக்கமுடியவில்லை"என்று தெரிவித்தார். 

வள்ளுவர் குடும்பம் என்னும் சமூக ஊடகக் குழுமம் சார்பில் சென்னை நாரத கான சபாவில் நாட்டுக்குறள் இசைவிழா நடைபெற்றது. ஒடிசா மாநிலத்தில் கூடுதல் தலைமைச்
செயலாளராக இருக்கும் ஐ.ஏ.எஸ் அதிகாரியும் தமிழ்க்கவிஞருமான ஆர்.பாலகிருஷ்ணன் திருக்குறள் இன்பத்துப் பாலை அடிப்படையாகக் கொண்டு எழுதிய நாட்டுப்புறப் பாடல்களுக்கு தாஜ்நூர் இசையமைத்த ஒலிப்பேழை வெளியீட்டு நிகழ்ச்சி மற்றும் இசைஅரங்கேற்றம் நடைபெற்றது. நாட்டுக்குறள் ஒலிப்பேழையை கவிஞர் வைரமுத்து வெளியிட திருச்சியை சேர்ந்த தங்கமணி தவமணி என்னும் அடிப்படைத் தொழிலாளி பெற்றோர்களின் குழந்தைகளான சூரியா, உமா, காவ்யா ஆகியோர் பெற்றுக்கொண்டனர்.

இந்த விழாவில் நாட்டுக்குறள் ஒவியப் பாடல் நூலும் வெளியிடப்பட்டது. ஒடிசா மாநிலத்தில் உள்ள பூரி கடற்கரையில் வள்ளுவருக்கு மணற்சிற்பம் அமைத்து மரியாதை செலுத்திய உலகப் புகழ்பெற்ற இந்திய மணற்சிற்ப கலைஞர் சுதர்சன் பட்நாயக் நடிகர் சிவக்குமாரால் கௌரவிக்கப்பட்டார். சுதர்சன் பட்நாயக் உருவாக்கிய திருக்குறள் பற்றிய மணல் ஓவிய அசைவூட்டுப்படம் திரையிடப்பட்டது.

கவிஞர் வைரமுத்து, இயக்குநர் பாரதிராஜா, சிவக்குமார், இந்த விழாவில் நாட்டுப்புறப் பாடல்களுக்கு ஓவியங்கள் தீட்டிய டிராஸ்கி மருது, பரதநாட்டிய கலைஞர் பத்மாசுப்பிரமணியம், நீதியரசர் மகாதேவன் ஆகியோர் கலந்து கொண்டனர்.

விழாவில் பேசிய கவிஞர் வைரமுத்து வள்ளுவர் விழாவிற்கு இவ்வளவு பெரிய கூட்டம் திரண்டது மகிழ்ச்சி அளிக்கிறது என்று குறிப்பிட்டார்.தமிழர்கள் ஒவ்வொருவரும் திருக்குறளை மனப்பாடம் செய்து நடமாடும் திருக்குறள் பிரதிகளாகத் திகழவேண்டும் என வைரமுத்து வேண்டுகோள் விடுத்தார். பாலகிருஷ்ணன் இ. ஆ. ப. என்பது இந்திய ஆட்சிப்பணி மட்டுமல்ல அதை இந்திய ஆராய்ச்சிப் பணி என்றும் குறிப்பிடத்தக்க வகையில் பாலகிருஷ்ணன் சிறந்த சிந்துவெளி ஆராய்ச்சியாளராகத் திகழ்வதாகக் கூறினார்.

திரண்ட கூட்டமெல்லாம் ஐ. ஏ. எஸ். அதிகாரத்திற்காகத் திரண்ட கூட்டமல்ல, வள்ளுவரின் 133 அதிகாரத்துக்குத் திரண்ட கூட்டம் என்று குறிப்பிட்ட வைரமுத்து பாலகிருஷ்ணன் கவிதையில் இடம்பெற்ற ‘ஆண்கொத்தி மோகினி’ என்ற சொல்லாட்சியையும் பாராட்டினார். விழாவில் இயக்குநர் பாரதிராஜா, நடிகர் சிவக்குமார், நீதியரசர் மகாதேவன் ஆகியோரும் வாழ்த்திப் பேசினர்.

விழாவை கவிஞர் தமிழச்சி தங்கபாண்டியன் மற்றும் சங்கர சரவணன் ஆகியோர் தொகுத்து வழங்க வள்ளுவர் குடும்பம் என்னும் சமூக ஊடகக்குழுவின் நிறுவனர் சி. ராஜேந்திரன் நன்றி தெரிவித்தார்.

வாசல் தோறும் வள்ளுவம் என்ற இந்த இசை அரங்கேற்றத்தில் சின்னப் பொண்ணு, வேல்முருகன், நின்சி வின்சென்ட், பிரபு, மீனாட்சி இளையராஜா, அந்தோணிதாஸ், கவிதா கோபி ஆகியோர் பாடினர். 5th Element குழுவின் நடன நிகழ்ச்சியும் நடைபெற்றது. ரோஜா முத்தையா நூலகத்தின் சார்பில் 1812ல் பதிப்பிக்கப்பட்ட திருக்குறள் முதல் அச்சுப்பிரதியின் மீள் பதிப்பும் வெளியிடப்பட்டது. நிகழ்ச்சியில் நாட்டுக்குறள் குறித்து முகப்புரை வழங்கிய பாலகிருஷ்ணன் ஆண்டுதோறும் நவம்பரில் நாட்டுக்குறள் விழா இனி கொண்டாடப்படும் என்றார். வள்ளுவர் ஓர் உலக மனிதர் என்றும் காமத்துப்பாலில் தலைசிறந்த கவிஞராகிறார் என்றும் கூறினார்.

விழாவில் பேசிய எழுத்தாளர் தமிழ்ச் செல்வன் முற்போக்கு எழுத்தாளர் சங்கத்தின் மூலம் கலைஞர்கள் மற்றும் தெரு பாடகர்கள் மூலம் தமிழகத்தில் புழுதி வீதிகளுக்கு நாட்டுக்குறளை மக்களிடம் கொண்டு சேர்ப்போம் என்று உறுதி கூறினார்.

இயற்கை விவசாயத்தில் கியூபா நாட்டை உலகிற்கே
முன்னுதாரணமாக மாற்றியவர் மறைந்த தலைவர் ஃபிடல் காஸ்ட்ரோ. உலகின் சிறியதொரு நாட்டில் அவர் நடத்திய மாபெரும் இயற்கை புரட்சி பற்றிய அந்த வரலாறை பசுமை விகடனில் பகிர்ந்திருந்தார் இயற்கை வேளாண் விஞ்ஞானி நம்மாழ்வார். நாம் அனைவருமே அறிந்து கொள்ள வேண்டிய, அந்த வரலாறு இதுதான்.

அமெரிக்காவிலிருந்து 150 கிலோ மீட்டர் தொலைவில் உள்ள சின்னஞ்சிறு நாடு கியூபா. அந்த குட்டி நாடு வேளாண்மையில் கடந்து வந்துள்ள பாதையை கொஞ்சம் உற்று நோக்கினால், அது நமக்கு ஒரு பாடமாக அமைய முடியும்.

1959-ம் ஆண்டு ஃபிடல் காஸ்ட்ரோ தலைமையிலான அரசு, கியூபா நாட்டில் பதவி ஏற்றது. கம்யூனிஸ சோவியத் ரஷ்யாவின் கூட்டுக்கார நாடான கியூபா மீது, அமெரிக்காவுக்கு ஏக எரிச்சல். 'நமக்கு அருகாமையில் ஒரு குட்டித் தீவு கியூபா. ஆனால், நமக்கு அடிபணியாமல் கம்யூனிஸம் பேசிக் கொண்டிருக்கிறதே?' என்று பொருமிய அமெரிக்கா, கடும் பொருளாதாரத் தடைகளை ஏற்படுத்தியது.

'உலகின் சர்க்கரைக் கிண்ணம்' என்று அழைக்கப்பட்ட கியூபாவின் ஏற்றுமதி வணிகம் அடிவாங்கியது. அப்போது ரஷ்யா உதவிக்கரம் நீட்டியது. கியூபாவின் சர்க்கரையை வாங்கிக்கொண்டு, உணவு தானியத்தை வழங்கியது சோவியத் ரஷ்யா. அந்த நாட்டின் உணவுத் தேவையில் 60% சோவியத் ரஷ்யாவிலிருந்து இறக்குமதி ஆனது. வேளாண் உற்பத்தியைப் பெருக்குவதற்கு என்று ரசாயன உரங்கள், பூச்சிக் கொல்லிகள், டீசல் எண்ணெய், எந்திரங்கள் எல்லாமும் கூட சோவியத்திலிருந்தே வந்தன. தொழில்மயமாகிய நாடுகளின் கருத்து (நவீன விவசாயம்) கியூபாவையும் பாதித்தது.

ஆண்டொன்றுக்கு 13 லட்சம் டன் ரசாயன உரம் மற்றும் எட்டு கோடி டாலர் விலை மதிப்புள்ள பூச்சிக் கொல்லிகள் பயன்படுத்தப்பட்டன. 90,000 டிராக்டர்கள் ஓடின. விளைவு... விபரீதமானது. சமூக- பொருளாதார-சுற்று சூழல் சிக்கல்களை கியூபா சந்திக்க வேண்டிய கட்டாயம் ஏற்பட்டது.

ஒற்றைப் பயிர் சாகுபடி என்கிற கொள்கையால் உற்பத்தித் திறன் குறைந்தது; ரசாயன உரங்கள், பூச்சிக் கொல்லிகள், கால்நடைத் தீவனம், எந்திரங்கள், நீர்ப்பாசனக் கருவிகளுக்கு அந்நிய நாடுகளைச் சார்ந்திருக்க நேர்ந்தது; காடுகள் பெருமளவு அழிந்தன; நிலம் களர் நிலமாகி வளமிழந்தது; பறவை, பன்றி, கால்நடை வளர்ப்பு முடங்கிப் போனது; கிராமப்புறங்களிலிருந்து நகரங்களுக்கு மக்கள் இடம் பெயர்ந்தார்கள். 1956-ம் ஆண்டில் கிராமங்களில் வாழ்ந்தவர்கள் 56%. 1989-ல் கிராமங்களில் வாழ்ந்தவர்கள் 28%. தீமைகள் இதோடு நிற்கவில்லை.

ஒட்டு வித்துகளும் ரசாயன உரங்களும் களைக்கொல்லிகளும் பூச்சிக் கொல்லிகளும் மண்ணின் உயிரோட்டத்தைச் சிதைத்து மலடாக்கின. பயிர் விளைச்சல் குன்றியது. அது மட்டுமல்ல பசுமைப் புரட்சி வேறு மோசமான விளைவுகளையும் உண்டாக்கியது. புற்றுநோய், ரத்த சோகை போன்ற தீராத நோய்களை ஏற்படுத்தியது. பிறவிக் குறைபாடுகள் உள்ளோர் எண்ணிக்கை அதிகரித்தது. மூளை வளர்ச்சி குன்றிய குழந்தைகள் பிறப்பது அதிகரித்தது.

இத்தகைய மோசமானச் சூழலில் 1989-ம் ஆண்டு சோவியத் ரஷ்யா சிதறுண்டது. அதைத் தொடர்ந்து ஐரோப்பிய சோசலிச முகாமும் சிதறியது. இதனால் கியூபாவுக்கு நெருக்கடி. 'அது நொறுங்கிப் போகும்' என்று அமெரிக்கா எதிர்பார்த்தது. ஆனால், கணக்குப் பிழையாகிப் போனது. கியூபா தனது பாதையை மாற்றியமைத்துக் கொண்டது.

உள்கட்டுமானத்திலும் வேளாண்மை உத்திகளிலும் பல மாற்றங்கள் அதிரடியாகப் புகுத்தபட்டன. நாட்டின் பல்வேறு வட்டாரங்களில் வெவ்வேறு பயிர்களை உற்பத்தி செய்வதற்கு ஏற்றபடி நிலம் பகிர்ந்தளிக்கப்பட்டது; ஒற்றைப் பயிர் சாகுபடி முறை கைவிடப்பட்டது; உயிர் உரங்கள் தயாரிக்கப்பட்டன; உயிரியல் பூச்சிக் கட்டுப்பாடு மேற்கொள்ளப்பட்டது; மாடுகளை ஏரில் பூட்டினார்கள்; குடும்பத் தோட்டங்கள் ஏற்படுத்தப்பட்டன; நகர்ப்புறத் தோட்டங்கள் உருவாக்கப்பட்டன; உழவர்கள் நேரடியாகப் பண்டங்களை விற்க உழவர் சந்தைகள் திறக்கப்பட்டன இத்தகைய சீர்திருத்தங்கள் செலவு குறைந்த, நிலைத்த, நீடித்த வேளாண்மைக்கு வழிகோலின.

அரிசி.. கியூபா மக்களின் முக்கிய உணவு 1990-ம் ஆண்டு தனது அரிசி தேவையில் 50% அளவுக்கு தானே உற்பத்தி செய்தது. இன்று அரிசி உற்பத்தி மும்மடங்கானது. கிழங்கு உற்பத்தியில் தென்அமெரிக்காவில் கியூபா இரண்டாவது இடத்தில் உள்ளது. மாட்டிறைச்சி உற்பத்திதான் பாதிக்கப் பட்டது. 1989-ம் ஆண்டில் 2,89,000 டன் என்று இருந்தது... 1998-ம் ஆண்டில் 1,37,300 டன் என்று குறைந்தது. காரணம், காளைகள் உழவு வேலைகளுக்காக மறுபடியும் கலப்பையில் பூட்டப்பட்டுவிட்டன.

'மனிதனின் சரசாரி காய்கறித் தேவை ஒரு நாளைக்கு 300 கிராம்' என்கிறது சுகாதார அமைப்பு. அதேசமயம், கியூபாவைப் பொறுத்தவரை 469 கிராம். அந்த மக்கள் மற்றவர்களைக் காட்டிலும் கூடுதலாக உண்கிறார்கள்.

உற்பத்தியைப் பெருக்கத் திட்டம் தயாரித்தார்கள். நிலம் இல்லாதவர்களுக்கு 50 சென்ட் நிலம் கொடுத்தார்கள். வீட்டுத் தேவை போக எஞ்சியதை விற்க உரிமையும் கொடுத்தார்கள்.

பல்வேறு நிறுவனங்கள், தொழிற் சாலைகள், கூட்டுறவு சங்கங்கள் ஆகியவற்றுக்குச் சொந்தமான காலி இடங்கள் பயிர் சாகுபடி நிலங்களாயின. 2000-ம் ஆண்டில் நகர்ப்புற வேளாண்மை மூலம் உற்பத்தி செய்யப்பட்ட உணவு 12 லட்சம் டன். இது ஏதோ பட்டிக்காட்டான்கள் செய்த உற்பத்தியல்ல. கியூபா மக்களில் கல்வி கற்றவர்கள் 95%. சராசரி கல்வித்தரம் 9-ம் வகுப்பு. மக்கள் தொகை 1.1 கோடி கொண்ட சின்னஞ்சிறு கியூபா, தலை உயர்த்தி நடைபோடுவதற்கு அடிப்படையாக அமைந்தது எது?

‘‘சூழலியலுக்கு உங்கள் கடனைச் செலுத்துங்கள்.

மத்திய நிதியமைச்சர் அருண் ஜெட்லி வரிமான வரி சட்டத்திருத்த மசோதாவை, மக்களவையில் நேற்று தாக்கல் செய்தார். இதையடுத்து வருமான வரி சட்டத்திருத்த மசோதா மக்களவையில் இன்று நிறைவேற்றப்பட்டுள்ளது. அதன்படி, கணக்கில் வராத வருமானத்துக்கு 30% வரி, 33% கூடுதல் வரி, 10% அபராதம் விதிக்கப்படும். வங்கிகளில் ரூ.2.5 லட்சம் ரூபாய்க்கு மேல் டெபாசிட் செய்து, டிசம்பர் 30-ம் தேதிக்கு முன் தாமாக வந்து தகவல் தருபவர்களுக்கு இந்த வரி விதிக்கப்படும். டிசம்பர் 30-ம் தேதிக்கு பிறகு கறுப்புப் பணம்  குறித்து வருமான வரித்துறை கண்டுபிடித்தால் அவர்களுக்கு 75% வரி, 10% அபராதம் விதிக்கப்படும். மேலும் கணக்கில் வராமல் டெபாசிட் செய்த தொகையில் 25% பணத்தை நான்கு ஆண்டுகளுக்கு வெளியில் எடுக்க முடியாது. எதிர்கட்சிகளின் கடும் அமளிக்கிடையே இந்த மசோதா நிறைவேற்றப்பட்டுள்ளது என்பது குறிப்பிடத்தக்கது.   

கடந்த நவம்பர் 25-ம் தேதி இரவில். கியூபா அதிபர் ரவுல் காஸ்ட்ரோ தொலைக்காட்சியில் தோன்றினார். ஏதோ முக்கியமான செய்திதான் என்று  மக்கள் எதிர்பார்க்கின்றனர்.  ‘கியூபா
புரட்சியின் காமென்டர் இன் சீஃப் மறைந்து விட்டார். தொடர்ந்து வெற்றியை நோக்கி செல்லுங்கள் 'என்ற ஃபிடலின் புகழ்பெற்ற பொன்மொழியுடன் ரவுல் காஸ்ட்ரோ அறிவித்த போது, கியூபா மக்கள் மட்டுமல்ல, அர்ஜென்டினாவில் இருந்த மரடோனாவும் குலுங்கி அழத் தொடங்கி விட்டார். சர்ச்சைகளுக்குப் பெயர் போன ஒரு புகழ்பெற்ற கால்பந்து வீரர், ஒரு நாட்டின் தலைவர் ஒருவர் மறைவுக்கு கண்ணீர் வீடுகிறார் என்றால், அதன் பின்னணி பலமானது.

கடந்த 1959-ம் ஆம் ஆண்டு சேகுவராவுடன் சேர்ந்து கியூபா புரட்சியில் ஈடுபட்டு, படிஸ்டாவை ஆட்சியில் இருந்து அகற்றிய ஃபிடல் கியூபா மக்களின் வாழ்க்கையில் மட்டுமல்ல மரடோனாவின் வாழ்விலும் மலர்ச்சியை ஏற்படுத்தியுள்ளார்.. மரடோனா இன்று உயிருடன் இருக்கிறார் என்றால் அதற்கு  ஃபிடலும் ஒரு காரணம்.

கடந்த 1986-ம் ஆண்டு அர்ஜென்டினா 2-வது முறையாக உலகக் கோப்பையை வென்றது. இந்த உலகக் கோப்பைத் தொடரில் அர்ஜென்டினா அணிக்கு மரடோனாதான்கேப்டன். இந்தத் தொடரில், இங்கிலாந்துக்கு எதிரான அரையிறுதி ஆட்டத்தில்,  7 வீரர்களை கடந்து சென்று மரடோனாவால் அடிக்கப்பட்ட மாயகோல் உலக மக்களை கட்டிப் போட்டிருந்தது, ஃபிடலையும் அந்த கோல் மயக்கியிருந்தது. உலகக் கோப்பையை வென்ற கையோடு மரடோனாவைத் தங்கள் நட்டுக்கு வருமாறு ஃபிடல் அழைப்பு விடுத்தார். ஆனாலும் தொடர்ச்சியான ஆட்டங்களால் மரடோனாவால் உடனடியாக கியூபா செல்ல முடியவில்லை.  கடந்த 1987-ம் ஆண்டு மரடோனா முதன்முறையாக கியூபாவுக்கு சென்றார். கியூபா தலைவர் கால்பந்து கிங்கை கட்டியணைத்து வரவேற்று மகிழ்ந்தார். மரடோனா, பாப்புலரான அர்ஜென்டினா 10-ம் எண் ஜெர்சியில் தனது கையொப்பமிட்டு ஃபிடலுக்கு பரிசாக வழங்கினார்.

அந்தக் காலக்கட்டத்தில் புகழ்பெற்று விளங்கிய ஒரு கால்பந்து வீரனை தனது விருந்தினராக வைத்து பராமரிக்கும் பாக்கியம் தனக்கு கிடைத்ததாக கூறி ஃபிடல் மகிழ்ந்தார்.  அப்போது தொடங்கிய நட்பு ஃபிடல் மரணம் அடையும் வரைத் தொடர்ந்தது. மரடோனாவுக்கு நேரம் கிடைக்கும் போதெல்லாம், கியூபாவுக்கு சென்று ஃபிடலை சந்திப்பது வழக்கம். ஃபிடலுக்கு பிடித்த கூடைப்பந்து , கால்பந்து, உலக அரசியல் குறித்து இருவரும் விவாதிப்பார்கள்.

ஃபிடலை பொறுத்த வரை, எந்த நேரமும் விழிப்பாகத்தான் இருப்பார். கவனம் சிதறினால் மரணம் என்பது ஃபிடலுக்குத் தெரியும். கியூபாவை, தனது மாகாணங்களில் ஒன்றாக இணைத்து விட வேண்டுமென்பது அமெரிக்காவின் நோக்கம். அதற்கு பெருந்தடையாக இருந்தது ஃபிடல். எனவே சிஐஏ, ஃபிடலை கொல்வதற்கு 50 ஆண்டுகளாக முயன்று கொண்டிருந்தது. கிட்டத்தட்ட 634 முறை கொலை முயற்சியில் ஈடுபட்டும்  தோல்வியைத் தழுவியது.

ஃபிடலின் காதலி மரிடா உள்ளிட்டவர்களை வைத்து கூட அவரை கொலை செய்ய முயற்சிக்கப்பட்டது. அதனால், ஃபிடல் எந்த நேரமும் விழிப்புடன்தான் இருப்பார். எந்த அமெரிக்க அதிபரிடம் கேட்டாலும் ''ஃபிடலை நாங்கள் கொல்லவில்லை என்றால், என்ன கடவுள் அவரை ஒருநாள் எடுத்துக்  கொள்வார்' என்பார்கள். உலகிலேயே அதிக முறை கொலை முயற்சிக்குள்ளான நபர் ஃபிடலாகத்தான் இருக்கும். அப்படி உயிருக்கு விலை நிர்ணயிக்கப்பட்ட ஃபிடல் எந்த சந்தேகமும் இல்லாமல் ஒரு வெளிநாட்டு விளையாட்டு வீரர் ஒருவரை சந்திக்கிறார் என்றால் அது மரடோனோவாகத்தான் இருக்கும். இருவருக்கும் அந்தளவுக்கு நெருக்கம்.

இந்த நெருக்கம் அதிகரிக்க இன்னொரு காரணமும் இருந்தது. கடந்த 1983-ம் ஆண்டு மரடோனா இத்தாலியின் நேபோலி அணிக்காக விளையாடி வந்தார். அப்போதிருந்தே அவருக்கு 'கோகைன்' என்ற போதை மருந்து பயன்படுத்தும் பழக்கம் இருந்தது. இதனால், கடந்த 2004-ம் ஆண்டு வாக்கில் மரடோனாவின் உடல்நலம் பெரிதும் பாதிக்கப்பட்டது. அவரது உடல் எடை 127 கிலோவாக இருந்தது. உயிருக்கு ஆபத்தான நிலையில், பியூனஸ் அயர்ஸ் நகரில் உள்ள மருத்துவமனையில் சிகிச்சைக்காக அனுமதிக்கப்பட்டார். டாக்டர்கள் அவரை பிழைக்க வைக்க கடுமையாகப் போராடினர். உலகம் முழுக்கவுள்ள அவரது ரசிகர்கள் மரடோனா உயிர்பிழைக்க பிரார்த்தனை நடத்தினர். தமிழகத்தில் உள்ள பல கிறிஸ்தவ ஆலயங்களில் கூட மரடோனா உயிர் பிழைக்க சிறப்பு பிரார்த்தனைகள் நடத்தப்பட்டது. இறுதியில் மரடோனா உயிர் பிழைத்துக் கொண்டார். ஆனால், உயிர் பிழைத்தாலும் போதை மருந்து பழக்கத்தில் இருந்து முழுமையாக விடுவித்துக் கொண்டால்தான் உயிர் வாழ முடியும் என மருத்துவர்கள் உறுதிபடக் கூறினர்.

இதையடுத்து, கியூபா அதிபர் ஃபிடல் காஸ்ட்ரோ மரடோனாவை உடனடியாக தனது நாட்டுக்கு அழைத்துக் கொண்டார். ஹவானாவில் உள்ள லாபெராடா கிளீனிக் போதைக்கு அடிமையானவர்களை மீட்பதில் புகழ்பெற்றது. அந்த மருத்துவமனையில் மரடோனாவை ஃபிடல் அனுமதித்து சிகிச்சை அளித்தார். பல மாதங்கள் இந்த மருத்துவமனையில் சிகிச்சை பெற்று வந்த மரடோனா, போதை பழக்கத்தில் இருந்து விடுபட்டார். அவரது உடல் எடை சாதாரண நிலைக்கு வந்தது. பின்னர் மீண்டும் கால்பந்து பயிற்சியில் ஈடுபட்டு, கடந்த 2010-ம் ஆண்டு அர்ஜென்டினா கால்பந்து அணிக்கு பயிற்சியாளராகவும் பொறுப்பேற்றார். அந்த வகையில் மரடோனாவின் உயிரை மீட்டு, தந்தவர் ஃபிடல். உடல் நலக்குறைவு காரணமாக பதவியில் இருந்து விலகிய ஃபிடலை அடிக்கடி சென்று  மரடோனா சந்திப்பதை வழக்கமாகக் கொண்டிருந்தார்.

மரடோனாவும் ஃபிடலை தனது சிறிய தந்தை எனக் குறிப்பிடுவது வழக்கம். மரடோனாவின் உடலில் இரு உருவங்கள்தான் பச்சைக் குத்தப்பட்டிருக்கும். அதில் ஒன்று சே... மற்றொன்று ஃபிடலுடையது!

சில வாரங்களுக்கு முன்பு வரை ரூ.225 வரை விற்ற துவரம் பருப்பு முதல் அனைத்து பருப்பு வகைகளின் விலைகள் தற்போது இறங்கு முகத்தில் உள்ளன. கடந்த 8-ம் தேதி முதல் 500 மற்றும் 1000 ரூபாய் தாள்கள் செல்லாது என பிரதமர் நரேந்திர மோடி அறிவித்தார்.
இந்தியாவில் புழங்கிய பணத்தில் 85 சதவிகித பணத்தை செல்லாது என அறிவித்ததால் பெரும் பணத்தட்டுப்பாடு ஏற்பட்டது. அதன் பின்னர் இந்திய ரிசர்வ் வங்கி புதிய 2000 ரூபாய் தாளை வெளியிட்டாலும் மக்களிடையே பணத்தட்டுப்பாடும் தீர்ந்தபாடில்லாமல்தான் இருக்கிறது. பழைய ரூபாய்களை மாற்றி புதிய 2000 ரூபாய் பெற்றவர்களுக்கு சில்லறை கிடைக்காமல் மற்றொரு பெரும் சிக்கல் ஏற்பட்டது. கடந்த வாரத்தில் அறிமுகப்படுத்தப்பட்ட புதிய 500 ரூபாய் தாளும் இன்னும் சரிவர விநியோகிப்படவில்லை. பணத்தட்டுப்பாடு நிலவுவதால் கடைகளில் நடைபெறும் அன்றாட வியாபாரம் பெருமளவு சரிந்து விட்டன.

இந்நிலையில் பருப்பு உள்ளிட்ட அத்தியாவசிய பொருட்களின் விலைவாசி குறைந்து வருவது குறித்து சில்லறை வியாபரிகள் சங்க தலைவர் எஸ்.பி.சொரூபன் அவர்களிடம் கேட்டபோது

" வழக்கமாக இந்த மாதத்தில்தான் பருப்பு விலை ஏறும். ஆனால் எப்போதும் இல்லாத வகையில் இந்த மாதத்தில் விலை வீழ்ச்சியாகிக்கொண்டிருக்கிறது. தென் மேற்கு பருவ மழை அதிகம் பெய்து பருப்பின் விளைச்சல் அதிகரித்துவிட்ட காரணத்தால் உள்நாட்டு உற்பத்தி பெருகி உள்ளது. கள்ளப்பண ஒழிப்பு நடவடிக்கை காரணமாக பதுக்கல் அதிகம் நடக்கும். எனவே பருப்பின் விலை அதிகரிக்கும் என்றும் சிறுவியாபாரிகள் அஞ்சிக்கொண்டிருக்கும்போது இப்படி குறைந்துள்ளது. இதற்கு பிரதமர் மோடி போட்டுள்ள பருப்பு இறக்குமதி  ஒப்பந்தமே முதல் காரணம். கடந்த காங்கிரஸ் அரசுக்கு முந்தைய பாரதிய ஜனதா அரசில் கூட பருப்பு விலையை கட்டுக்குள் வைக்க ஏற்றுமதி இறக்குமதிக்கு தடைவிதிக்கப்பட்டிருந்தது. ஆனால் தற்போது பிரதமர் செய்துள்ள ஒப்பந்தத்தினால் தான்சானியா, கென்யா, மாளாவியா,கனடா ஆகிய நாடுகளில் இருந்து துவரம்பருப்பு இறக்குமதியாக உள்ளது. அவை வந்தால் இன்னும் விலை குறையும் என்கிற காரணத்தால் சிறிய அளவில் இருப்பு வைத்திருந்த மொத்த வியாபாரிகளும் தங்களின் இருப்பை சந்தையில் வந்த விலைக்கு விற்கத் தொடங்கிவிட்டனர். இவை ஒரு பக்கம் இருந்தாலும் ரூபாய் பிரச்னைதான் பெரிய சிக்கலாக இருக்கிறது. லாரி வாடகையை நூறு ரூபாய்களாக கேட்கின்றனர். 500 ரூபாய்தான் போதிய அளவில் புழக்கத்துக்கு கிடைக்கவில்லை என்றால் நூறு ரூபாய்க்கு பெரும் தட்டுப்படாக உள்ளது. 50 சதவிகிதம் வியாபாரம் சுத்தமாக படுத்துவிட்டது. அனைத்து வகை பருப்புகளின் விலையும் வீழ்ந்துவிட்டது. இந்நிலையில் பர்மாவிலிருந்து உளுந்தம்பருப்பும் வர இருக்கிறது. இந்தியாவில் இம்முறை உளுந்து விளைச்சல் அதிகமாக உள்ளது.இந்த சூழலில் இறக்குமதி செய்யப்படும்போது இன்னும் அதிகமாக விலை வீழ்ச்சியடையவே அதிக வாய்ப்புள்ளது. வரும் ஜனவரியில் 100 கிலோ மூட்டை ஒன்றுக்கு ரூ.1000 முதல் ரூ.2000 வரை உளுந்தின் விலை குறைய வாய்ப்புள்ளது.சிறு வியாபாரிகளின் சந்தையில் இந்த ஏற்ற இறக்கம் உடனுகுடன் நடை முறைக்கு வந்து விடுகிறது. ஆனால் பேரங்காடிகளில் "கேஷ் லெஸ்" என்கிற அட்டை வர்த்தகம் செய்யும் இடங்களில் விலை குறைந்தாலும் உடனடியாக குறைக்க மாட்டார்கள்.பொதுமக்கள் பாக்கெட்டுகளில் அச்சிடப்பட்டுள்ள விலையை மட்டுமே நம்பி கொடுக்கிறார்கள், மாத சாமான் வாங்கும் மத்திய வர்க்கத்தினர் நாளைந்து கடையில் விசாரித்து வாங்கினால் பயன் அடையலாம் " என்று தெரிவித்த சொரூபன் வடமாநிலத்தில் கள்ளப்பதுக்கல் பருப்புகள் வெளியே வந்ததும் ஒரு காரணம் என்கிறார். அது பற்றி அவர் மேலும் தெரிவிக்கையில்..

" வடமாநிலங்களான மத்தியப்பிரதேசம், குஜராத் போன்றவற்றில் இந்த பணப்பிரச்னையில் விலை ஏறும் என எதிர்பார்த்து பழைய தாள்களைக் கொண்டு பருப்புகளை வாங்கி ஸ்டாக் வைத்தவர்கள் தற்போது விலை இறங்கும் என தெரியவந்ததும் பதுக்கல் பருப்புகளை சந்தைக்கு கொண்டு வந்ததும் கிடைத்த விலைக்கு விற்று காசாக்கியதும் விலை இறங்கியதற்கு முக்கிய காரணம்." என்று தெரிவித்தார்.

பருப்பு வகைகளை தொடர்ந்து அரிசி, கோதுமை மற்றும் எண்ணை வித்துக்களின் விலையும் குறைய வாய்ப்புகள் உள்ளதாக தெரிகின்றன.  

'புரட்சிக்காரர், போராளி, கம்யூனிச நாயகன் வல்லாதிக்கத்துக்கு எதிராக நின்றவர், அமெரிக்காவின் 638 கொலை முயற்சிகளை முறியடித்த வீரன், இவைதான் மறைந்த ஃபிடல் காஸ்ட்ரோ பற்றி
நமக்கு பரிச்சயமாகத் தெரிந்தவை. ராணுவ உடையில் மிடுக்கென இருக்கும் ஃபிடல் காஸ்ட்ரோவைப் பார்த்தால் அமெரிக்காவுக்கு மட்டுமல்ல. நமக்கும் பயம் கலந்த மரியாதையே இருக்கும். காஸ்ட்ரோவின் கம்பீரமான ராணுவ உடைக்குள் அன்பும், அக்கறையும், இந்தியர்கள் மீது பாசமும் கொண்ட இதயமும் இருந்தது. இதனை தன் செயலின் மூலமே உலக மக்களுக்கு வெளிக்காட்டியவர் காஸ்ட்ரோ. கடல் கடந்து எங்கோ இருக்கும் இரண்டு தமிழகச் சிறுமிகளுக்கு காஸ்ட்ரோ அனுப்பியிருக்கும் கடிதங்களே, அவரின் அன்புக்கும், பாசத்துக்கும் உதாரணங்களாக இருக்கின்றன.

காந்தி, நேரு, இந்திரா, ராஜீவ் என தங்களது மகளுக்கும், மகனுக்கும் இந்திய தலைவர்களின் பெயரை மக்கள் சூட்டிவரும் நிலையில், தமிழகத்தில் இருவர் தனித்து சிந்தித்தனர். கியூபா விடுதலை வீரர் ஃபிடல் காஸ்ட்ரோ மீதான ஈர்ப்பில், தமிழகத்தைச் சேர்ந்த வில்வம் மற்றும் பழபிரபு ஆகியோர் தங்களின் மகள்களுக்கு 'கியூபா' என்ற புரட்சிப் பெயரைச் சூட்டியுள்ளனர். இச்சிறுமிகளை வாழ்த்திதான் 15,000 கிலோ மீட்டர் தொலைவில் இருந்து கடிதம் அனுப்பியிருக்கிறார் காஸ்ட்ரோ.

'' எனது முதல் மகளுக்கு சார்லஸ் டார்வின் நினைவாக 'டார்வினா' என பெயர் வைத்தோம். எனக்கு இளமைக்காலம் முதலே சேகுவேரா மீதும், காஸ்ட்ரோ மீதும் அளவு கடந்த ஈர்ப்பு இருந்தது. அதுமட்டுமல்லாமல், கியூபா புரட்சிநாளான ஜூலை 26-ம் தேதி எனது மகள் பிறந்தாள். வருடா வருடம்  ஜூலை 26-ம் தேதி புரட்சிநாளாக கியூபா மக்கள் கொண்டாடுகிறார்கள். அதன் நினைவாக, எனது இரண்டாவது மகளுக்கு 'கியூபா' என பெயர் வைத்தோம். எங்களது குழந்தையின் பெயர் வைக்கும் நிகழ்வை 'கியூபா அறிமுக நாள்' என பத்திரிகை அடித்து அழைத்தோம். அந்த பத்திரிகையை ஃபிடல் காஸ்ட்ரோவுக்கும் அனுப்பி வைத்தோம். பிறகு அதைப்பற்றி நாங்கள் மறந்து விட்ட நிலையில், ஒரு மாதம் கழித்து ஃபிடல் காஸ்ட்ரோவின் கையெழுத்துடன் கூடிய வாழ்த்து அட்டை எங்களுக்கு வந்தது. வாழ்த்து அட்டை ஸ்பானிஷ் மொழியில் இருந்ததால் எங்களுக்குப் புரியவில்லை, இருந்தாலும் எங்களின் மகிழ்ச்சிக்கு அளவே இல்லை'' என தனது நினைவுகளைப் பகிர்ந்துக் கொண்டார், ஊத்தங்கரையை சேர்ந்த பழபிரபு.

திருச்சியைச் சேர்ந்த வில்வம்,'' கியூபா புரட்சி நூல்களை படித்த எனக்கு இயல்பாகவே ஃபிடல் காஸ்ட்ரோ மீது மரியாதை வந்தது. அதனால், எனது மகளுக்கு 'கியூபா' என பெயர் வைத்தேன். இதனை காஸ்ட்ரோவுக்கு கடிதம் மூலம் தெரியப்படுத்தலாம் என்று நினைத்தேன். ஆனால் சரியான முகவரி தெரியாததால், 'பிடல் காஸ்ட்ரோ, அதிபர், கியூபா' என்று முகவரியை எழுதி கடிதத்தை அனுப்பிவைத்தேன். காஸ்ட்ரோவின் உயிருக்கு பெரும் அச்சுறுத்தல் இருப்பதால், ஒரு பொருள் அவரின் கைகளுக்கு செல்வதற்கு முன்பு 100 சோதனைகளை தாண்டி செல்லும் என படித்திருக்கிறேன். ஆக, நமக்கு எல்லாம் எங்கு பதில் வரப்போகிறது என நினைத்துக்கொண்டேன். ஆனால், ஒரு மாதத்திலே எங்களுக்கு பதில் கடிதம் வந்தது. எங்களது மகள்
'கியூபா'-வை வாழ்த்தி அனுப்பியிருந்த வாழ்த்து அட்டையில் பிடல் காஸ்ட்ரோ கையெழுத்திட்டிருந்தார். அந்த கடிதத்தை நாங்கள் பொக்கிஷம் போல பாதுகாத்து வருகிறோம்'' என்றார்.

அன்பு நிறைந்த புரட்சிக்காரர் இன்று இல்லையே!