!...Payanam...!

பேய் கதைகள் தமிழ் சினிமா பாத்து பழகிய விஷயம். இங்கேயும் நாங்களும் வித்தியாசமான பேய் கதையை எடுப்போம் என கூறி ஐஸ்வர்யா ராஜேஷ் நடிப்பில் மோ என்ற பெயரில் இயக்கியிருக்கிறார் புவன் R நுல்லன்.

சரி இது நிஜமாகவே பேய் கதையா, இல்லை எப்படிபட்ட கதை என பார்ப்போம்.

கதைக்களம்

துணை நடிகையான ஐஸ்வர்யா ராஜேஷ், மேக்கப் மேன் முனிஸ்காந்த் இருவரையும் வைத்து அடுக்குமாடி குடியிருப்பில் பேய் இருப்பதாக கூறி ரியல் எஸ்டேட் அதிபர் மற்றும் அந்த அடுக்குமாடி குடியிருப்பின் செயலாளர் செல்வாவை ஏமாற்றுகிறார்கள் சுரேஷ் ரவி மற்றும் அவரது கூட்டாளிகள்.

ஒரு கட்டத்தில் செல்வாவிடம் சுரேஷ் மாட்டிக்கொள்கிறார். பின் செல்வா, சுரேஷை வைத்தே பாலடைந்த ஒரு ஸ்கூலை விலைக்கு வாங்க முயற்சிக்கிறார். அதே ஸ்கூலை முன்னாள் எம்.எல்.ஏ. மைம் கோபியும் வாங்க நினைக்கிறார்.

கெட்ட சக்திகள் இருக்கும் கட்டிடத்தை மைம் கோபி வாங்க மாட்டார் என்பதை தெரிந்துக் கொண்ட செல்வா, சுரேஷ் ரவி மற்றும் அவரது நண்பர்களை அந்த பாலடைந்த ஸ்கூலில் பேய் இருப்பதாக நாடகம் நடத்தி மைம் கோபியை பயமுறுத்த சொல்கிறார். இல்லையென்றால், போலீசிடம் சுரேஷ் ரவியை சிக்க வைத்துவிடுவேன் என்று மிரட்டுகிறார். போலீசுக்கு பயந்து அந்த பாலடைந்த ஸ்கூலுக்கு நண்பர்களுடன் செல்கிறார் சுரேஷ் ரவி.

இறுதியில் மைம் கோபி அந்த ஸ்கூலை வாங்கினாரா இல்லை செல்வா வாங்கினாரா? சுரேஷ் மற்றும் நண்பர்கள் நிலைமை என்ன ஆனது என்பதே படத்தின் மீதிக்கதை.

படத்தை பற்றிய அலசல்

முன்பே சொன்னது போல் பேய் கதைகள் தமிழ் சினிமாவுக்கு ஒன்றும் புதிது அல்ல. ஆனால் இந்த கதை கொஞ்சம் வித்தியாசமான பேய் கதைதான். இதில் முக்கியமாக இருப்பது காமெடி. திகில் படத்திற்கு தேவையான காட்சிகளை வைத்து சுவாரஸ்யமாகவும், காமெடியாகவும் திரைக்கதை அமைத்து இயக்கி இருக்கிறார் இயக்குனர் புவன் நல்லான். சொல்ல வந்த விஷயத்தை தெளிவாக சொல்லியிருக்கிறார்.

படத்தில் காமெடி காட்சிகள் பெரிய ப்ளஸ். ஜெப கூட்ட காட்சிகள், யோகி பாபு ஆங்கிலம் பேசுவது, முனிஸ்காந்த் பேய் வேஷம் போடும் காட்சிகளிலெல்லாம் திரையரங்கில் சிரிப்பு சரவெடி தான்.

க்ளாப்ஸ்

காமெடி சரவெடி தான். பக்காவான கதைக்களம்.

பல்ப்ஸ்

சிரிப்புக்கு புல் கேரண்டி என்பதால் குறை தெரியவில்லை.

மொத்தத்தில் மோ தியேட்டர் போய் பாருங்க புல் கேரண்டி காமெடிய Enjoy பண்ணுங்க.

தமிழ் சினிமாவில் எப்போதாவது தான் மாற்று சினிமா வரும். ரசிகர்கள் ஒரே மாதிரியான மசாலா படங்களை பார்த்து எப்போது வித்தியாசமான படங்களை கோலிவுட்டில் கொடுப்பார்கள் என காத்திருக்க, அவர்களுக்காகவே வந்துள்ளது இந்த துருவங்கள் பதினாறு.

கதைக்களம்

படத்தின் ஆரம்பத்திலேயே ஒரு கொலை, ஒரு விபத்து நடக்கின்றது, இதை கண்டுப்பிடிக்க தீவிர முயற்சியில் இறங்குகிறார் ரகுமான்.

அதை தொடர்ந்து இந்த கொலைகளை யார் செய்தது, அந்த விபத்து எப்படி நடந்தது, இந்த கொலைக்கும், அந்த விபத்திற்கும் என்ன சம்மந்தம் என அடுத்தடுத்து பல டுவிஸ்டுகளுடன் படம் நகர்கின்றது.

படத்தின் கதை இனி சொன்னால் சுவாரசியம் குறைந்துவிடும் என்பதற்காக இதோடு நிறுத்தியுள்ளோம்.

படத்தை பற்றிய அலசல்

கிரைம் த்ரில்லர் வகை படங்கள் தமிழ் சினிமாவில் ஏன், இந்திய சினிமாவிலேயே வருவது அரிது, பெரிதும் ஹாலிவுட், கொரீயன் படங்களில் தான் இதுப்போன்ற புலானய்வு கிரைம் படங்கள் வரும். கொரீயன் பட பாணியில் எந்த ஒரு படத்தின் தழுவலும் இல்லாமல் இருக்கின்றது இந்த துருவங்கள் பதினாறு.

மேலும், படத்தில் ரகுமானை தவிர வேறு எந்த முகங்களும் நமக்கு பரிச்சயம் இல்லை, ஆனால், கதையே ரகுமானின் பார்வையில் தான் சொல்லப்படுகின்றது.

இந்த மாதிரியான கிரைம் த்ரில்லர் படங்களில் நாம் யாரை சந்தேகப்படுகின்றோமோ, அவர்கள் கொலையாளிகளாக இருக்க மாட்டார்கள், அதே கான்செப்ட் தான் என்றாலும், 21 வயதான கார்த்திக் நரேன் அதை திறம்பட கொண்டு சென்றுள்ளார்.

இதில் குறிப்பாக ரகுமான் முதலில் போலிஸ் ஸ்டேஷனில் நுழைந்து அவர் சீட்டில் உட்காரும் வரை காட்டிய காட்சிகள், ஏதோ 10, 15 படம் எடுத்த இயக்குனரின் அனுபவம், படத்தில் விபத்தும், கொலையும் திரும்ப, திரும்ப வருகின்றது.

அப்படி வருவது எந்த ஒரு இடத்திலும் அலுப்பை ஏற்படுத்தாமல், சுவாரசியமாக கொண்டு சென்றுள்ளார்கள், ரகுமானுடன் உதவி போலிஸாக வரும் கௌதம் கவனிக்க வைக்கின்றார், ரகுமான் நினைப்பதற்கு முன்பே அவர் கூறுவது, ரகுமானை இம்ப்ரஸ் செய்ய முயற்சி செய்வது என நன்றாக நடித்துள்ளார்.

ஆனால், படத்தின் ஆரம்பத்தில் ஒரு கொலை நடக்கும் சம்பவத்தை காட்டுகிறார்கள், அது யாருடைய யூகம் இல்லை ஆடியன்ஸை குழப்புவதற்காக காட்டுகிறார்களா? என்பதே மட்டுமே குழப்பம்.

க்ளாப்ஸ்

படத்தில் நடித்த அனைத்து நடிகர்களும் யதார்த்தமாக நடித்துள்ளனர், அதிலும் ரகுமான், ராம் படத்தில் பார்த்ததை விட, இதில் போலிஸாக ஒரு படி மேலே சென்று மிரட்டியுள்ளார், எந்த ஒரு விஷயத்தையும் டேக் இட் டீசி என இவர் டீல் செய்வது ரசிக்க வைக்கின்றது.

படத்தின் மேக்கிங், பிஜாய்யின் பின்னணி இசை அபாரம், தேவையில்லாத பயமுறுத்தும் சத்தங்கள் இல்லாமல் கதைக்கு தேவையான இசையை கொடுத்துள்ளார், அதை விட சுஜித்தின் ஒளிப்பதிவு அந்த இருளிலும் தெளிவாக படம்பிடித்து காட்டுகின்றது. அதிலும் ஒரு காட்சியில் 360 டிகிரியில் ரகுமானை சுற்றி வருகின்றது கேமரா, ஒரு அனுபவமான இயக்குனரால் தான் இப்படியெல்லாம் காட்சிகளை எடுக்க முடியும்.

யூகிக்க முடியாத கிளைமேக்ஸ்.

பல்ப்ஸ்

என்ன தான் நடிகர்கள் நன்றாக நடித்திருந்தாலும், ரகுமானை தவிர படத்தில் நமக்கு யாரையுமே தெரியாதது படம் பார்ப்பவர்களுக்கு கொஞ்சம் அந்நியமாகவே உள்ளது.

மொத்தத்தில் படம் தொடங்கியதிலிருந்து முடியும் வரை எந்த துருவத்திலும் ஆடியன்ஸை திரும்ப விடாமல் சீட்டின் நுனியில் கட்டிப்போடுகின்றது இந்த துருவங்கள் பதினாறு.

பொதுவாக தமிழ் சினிமாவில் ஒரு முறை ஹிட் கொடுத்துவிட்டால் மீண்டும் அதே கூட்டணியோடு சேர்வது கொஞ்சம் குறைவுதான். அதேபோல் இல்லாமல் தன்னுடைய முந்தைய படத்தை எடுத்த இயக்குனர் ராஜ பாண்டியுடன் இணைந்து விஜய் வசந்த், சமுத்திரக்கனி, ஸ்ருஷ்டி டாங்கே, கருணாஸ் என பல நட்சத்திரங்கள் இணைந்து நடித்து வெளிவந்திருக்கும் படம்தான் அச்சமின்றி.

கதைக்களம்

படத்தின் தொடக்கத்தில் ஒரு நேர்மையான கலெக்டராக வரும் தலைவாசல் விஜய், பள்ளிகளுக்கு அனுப்பப்படும் பொது தேர்வின் கேள்வித்தாள்களை, தனியார் பள்ளிகளுக்கு விற்கும் ஒரு மோசடி கும்பலை பிடிக்க, பின் அந்த மோசடி கும்பலால் கொல்லப்படுகிறார்.

அதன்பின் பேருந்துகளில் Purseகளை திருடும் இளைஞனாக வரும் விஜய் வசந்த், ஸ்ருஷ்டி டாங்கேவை சந்திக்க இருவரும் பழக ஆரம்பிக்கிறார்கள். பின் அதே ஏரியாவில் போலீசாக இருக்கும் சமுத்திரக்கனியின் தோழியான வித்யா திருமணம் செய்து கொள்ளும் முன் இறந்துபோகிறார்.

ஒரு கட்டத்தில் விஜய் வசந்த்தையும், சமுத்திர கனியையும், ஸ்ருஷ்டி டாங்கேயையும் அந்த கும்பல் துரத்துகிறது. இவர்களை எதற்காக அந்த கும்பல் துரத்துகிறது, இவர்கள் மூவருக்கும் அந்த கும்பலுக்கும் என்ன பிரச்சனை என்கின்ற முடிச்சுகள் இரண்டாம் பாதியில் அவிழ்க்கப்படுவதுதான் மீதிக்கதை.

படத்தை பற்றிய அலசல்

இப்போதுள்ள சூழ்நிலையில் தனியார் பள்ளிகளில் நடக்கும் தவறுகளையும் அதனால் மாணவர்களுக்கு ஏற்படும் பிரச்சனைகளையும் கமர்ஷியலாக சொல்லியிருக்கிறார் இயக்குனர் ராஜபாண்டி. சொல்லவரும் கருத்தை கதையில் இருந்து நகர்த்தாமல் கதையோடு திரைக்கதையை கொண்டு சென்றுள்ளதால் இவரை பாராட்டியே ஆக வேண்டும்.

விஜய் வசந்த் தன்னுடைய முந்தைய படத்தில் எப்படி இருந்தாரோ அதேபோலதான் தோற்றத்திலும் சரி நடிப்பிலும் சரி ஒரே மாதிரி தான் உள்ளார். ஸ்ருஷ்டி டாங்கேவிற்கு கதையில் கொஞ்சம் இடம் இருப்பதால் அவரும் தன்னுடைய நடிப்பினை சிறப்பாக செய்துள்ளார். சரண்யா பொன்வண்ணனை ஒரு அம்மாவாக பார்த்து சலித்து போனவர்களுக்கு இதில் வேறு மாதிரி பார்க்கலாம், வில்லியாக வந்து மிரட்டி உள்ளார்.

இதுதவிர சமுத்திரக்கனியும், ராதா ரவியும் சொல்லவே தேவை இல்லை, இருவரும் அவர்களுடைய காட்சிகளில் சிக்ஸர் அடித்துள்ளனர். குறிப்பாக நாட்டில் அரசியல்வாதிகள் திருந்த வேண்டும் என்பதை விட அவர்களை தேர்ந்தெடுக்கும் மக்கள் தான் திருந்த வேண்டும் என்பதை சொல்லும் போது க்ளாப்ஸ் அள்ளுகிறது.

பிரேம்ஜி பின்னணி இசையில் செலுத்தியிருக்கிற கவனத்தை சற்று பாடல்களிலும் செலுத்தி இருக்கலாம்.

இதை தவிர ஒளிப்பதிவும், படத்தொகுப்பும், சண்டை காட்சிகளும் ரசிக்கும் விதமாக இருப்பது கொஞ்சம் நிறைவு தருகிறது.

க்ளாப்ஸ்

எதார்த்தமான சண்டை காட்சிகள். முக்கியமாக படத்தின் கதையையும், திரைக் கதையையும் தெளிவாக அமைத்திருப்பது.

சரண்யா பொன்வண்ணனின் மாறுபட்ட நடிப்பு.

சமுத்திரகனி, ராதா ரவி அவர்களின் எதார்த்தமான நடிப்பும், வசனங்களும் கை தட்டல்களை வாங்குகிறது.

பல்ப்ஸ்

படத்தின் பாடல்கள் மனதில் ஒட்டாமல் இருப்பது.

நிறைய காமெடி நடிகர்கள் இருந்தும் அவர்களை இன்னும் கொஞ்சம் நன்றாக உபயோகித்திருக்கலாம் என்று தோன்றுகிறது.

படத்தின் தொடக்கத்தில் தேவையற்ற காமெடிகளால் கொஞ்சம் கதை மெதுவாக செல்கிறது.

மொத்தத்தில் அச்சமின்றி சென்று பார்க்கலாம்.

துலா என்ற கைத்தறி ஆடைகளை விற்பனை செய்யும் அமைப்பு, சென்னை சவேரா ஓட்டலில் மஸ்லின் துணிகளால் ஆன கைத்தறி ஆடை கண்காட்சியை நடத்தி வருகிறது. அதில் சிறப்பு விருந்தினர்களாக திரைப்பட இயக்குநர் வெற்றிமாறன், நடிகைகள் ரேவதி, ரோகிணி உள்ளிட்டோர்கள் கலந்துக் கொண்டனர்

இந்நிகழ்ச்சியில் பேசிய வெற்றி மாறன், "சிறிது நாட்களாக எனக்கு என்னுடைய வாழ்க்கை முறை மீது சில கேள்விகள் எழுகின்றன. எந்த மாதிரியான வாழ்க்கை முறையை நாம் கற்றுக் கொள்கிறோம், எகோ- ஃப்ரண்ட்லியான சூழ்நிலையில் நாம் இருக்கிறோமா, இருபது வருடங்களுக்கு முந்தைய மாதிரி இப்போது இருக்க முடியவில்லை, உடல் பருமன் உள்ளிட்ட உடல் நலன் சாராத பிரச்னைகள் கூட இன்று உடல் நலன் சார்ந்த பிரச்னைகளாக காண்பிக்கப்படுவது என்று நிறைய விஷயங்களை கற்றுக் கொண்டேன். நாம் எந்த மாதிரியான சூழ்நிலையில் வாழ்கிறோம் என்று என்னால் உணர முடியவில்லை. அன்று ஆரோக்கியமான உணவை எனது பெற்றோர் எனக்கு ஊட்டினர். அதனால் உடல் நலம் சார்ந்த பிரச்னைகள் இல்லாமல் இருந்தது.

வெற்றிமாறன் ரேவதி ரோகிணி

அன்றைய கால கட்டத்தில் விளையாடும்போது மண்ணில் மண்புழு அதிகமாக இருக்கும். மண்புழு ஒன்றே விவசாயத்துக்கு போதுமான உரமாக இருக்கும். ஆனால், இன்று மண்புழுவை விலை கொடுத்து வாங்கி விவசாயத்தில் பயன்படுத்தும் நிலைதான் உள்ளது. குழந்தைகளுக்கு நல்லது செய்கிறோம் என்று கண்டதையும் குழந்தைகள் மீது திணித்து, குழந்தைகளுக்கு நம்மை அறியாமல் விஷத்தை ஊட்டிக் கொண்டு இருக்கிறோம். இரவில் மிச்சமான பழைய சாதத்தை நாம் குப்பையில் கொட்டுகிறோம். ஆனால், அமெரிக்க மருத்துவர்கள் பழைய சாதம், இட்லி என்று நம் உணவு வகைகளை மருத்துவ காரணங்களுக்காக நோயாளிகளுக்கு  பரிந்துரைக்கிறார்கள். ஆனால், நாம் ஓட்ஸ் எந்த கடையில் கிடைக்கும் என்று தேடிக் கொண்டு இருக்கிறோம். நம்மால் நல்லது செய்ய முடியவில்லை என்றாலும் நல்லது செய்பவர்களை ஊக்குவிக்கலாமே என்று தான் நமது பாரம்பரியத்தை மீட்டெடுக்கும் கைத்தறி ஆடை நெசவாளர்களின் நிகழ்ச்சிகளில் தொடர்ச்சியாக பங்கெடுக்கிறேன்” என்றார்.

நடிகை ரோகிணி பேசும்போது, "துலா இந்த மாதிரியான முயற்சிகள் எங்கு செய்தாலும் எங்களின் பங்கு நிச்சயம் இருக்கும். சினிமாவில் நாங்கள் இருப்பதால் மக்கள் நாங்கள் சொன்னால் கொஞ்சம் கேட்பார்கள் என்று வருகிறோம். பாரம்பர்யத்தை மீட்க வேண்டும் பாரம்பர்ய விதைகளை மீட்க வேண்டும் என்கிற ஒரு பகுதி தான் இந்த கைத்தறி ஆடை கண்காட்சி. இந்த ஆடைகளை எப்படி நெய்து இருக்கிறார்கள், இதற்கு பின்பு இருக்கும் உழைப்பு என்று நாம் தான் மக்களிடம் கைத்தறி ஆடையின் அருமைகளை கொண்டு செல்ல வேண்டும். இது போன்ற நல்ல முயற்சிகளை இப்போது எல்லோரும் வரவேற்கிறார்கள். குறிப்பாக இளைஞர்கள், இது போன்ற முயற்சிகளை மிகவும் ஆர்வத்தோடு வரவேற்கிறார்கள், நிறைய நபர்கள் பாரம்பரிய விதைகள் உள்ளிட்டவற்றை மீட்டெடுக்கும் விஷயத்தில் ஈடுபடுகிறார்கள். மனசுக்கு திருப்தி தரக்கூடிய ஒரு விஷயம், ஆயிரம் மடங்கு இது போன்ற மகிழ்ச்சி தரக் கூடிய செயல்கள் தொடர வேண்டும்" என்றார்.

மஸ்லின் துணிகள் கண்காட்சியில் நடிகை ரேவதி

நடிகை ரேவதி பேசும்போது, "எனக்கு பருத்தி ஆடைகள் என்றால் சிறு வயதில் இருந்தே பிடிக்கும். குழந்தைகளுக்கு ஆடம்பரமானவற்றை தருவதை விட நல்ல மண், நல்ல உணவு, சுவாசிக்க நல்ல காற்று தரமுடியுமா என்று தான் நாம் சிந்திக்க வேண்டும். பூமி மீது பகுதி நேரமாக உழைப்பை செலுத்தினால் பயனில்லை. முழு உழைப்பையும் அதன் மீது செலுத்தினால்தான் பயன் கிடைக்கும். அதனால் பாரம்பரியமான கைத்தறி ஆடைகள் அணிவதால் மனதுக்கும், உடலுக்கும் நன்மை. நாமும் இது போன்ற பாரம்பரியங்ககளை மீட்கும் செயல்களில் தொடர்ச்சியாக ஈடுபட வேண்டும்" என்று பேசினார்.'

மஸ்லின் துணிகள்

இயற்கை விவசாயிகள் கூட்டமைப்பின் ஒருங்கிணைப்பாளரான ஆனந்து பேசும்போது, "அணுகுண்டு வீசும் நாட்டுக்கு ஆடைகளை தயாரிக்க தெரியாமல் இல்லை. கைத்தறி ஆடைகள் மிகவும் எளிமையானவை மற்றும் தூய பருத்திகளால் கையால் நெய்யப்படுபவை. ஆண்கள், பெண்கள் என்று அனைவருக்குமான ஆடைகளும் உள்ளன. இதற்கு செயற்கை முறையில் வர்ணம் பூசுவதில்லை கருங்காலி, மாதுளை, கடுக்காய், செம்பருத்தி, சங்கு புஷ்பம் என்று இயற்கை சாயங்களை தான் பயன்படுத்துகிறோம். இது நம்மிடம் இருந்த முறை தான் அஜந்தா, எல்லோரா குகை ஓவியங்கள் பழ நூற்றாண்டுகளை கடந்தும் நிலைக்கிறது என்றால் அது தான் நமது சிறப்பு. பழைய முறைகளை காலப்போக்கில் மறந்து விட்டோம், மல்கா, மஸ்லின், நேச்சர் ஹாலி உள்ளிட்ட பல வகையான கைத்தறி ஆடைகள் இங்கு உள்ளன" என்றார்.

விழாவில் மஸ்லின் ஆடைகள், கைத்தறி ஆடைகள் மற்றும் பாரம்பர்ய ஆடைகள் ஆகியவை பார்வைக்கு வைக்கப்பட்டிருந்தன.

- அ.பா.சரவண குமார்,

சசிகலா-நடராஜன் திருமணமான சமயத்தில்..

சென்னையில், வீடியோ கடை நடத்திக் கொண்டிருந்த சசிகலாவுக்கு, போயஸ் தோட்டத்துக்குள் கால்வைக்க, கலெக்டர் சந்திரலேகா ‘ரூட்’ போட்டுக் கொடுத்தார்; அவ்வளவுதான். ஆனால், அந்த ‘ரூட்’டில் சசிகலாவை, கச்சிதமாக, கவனமாக, பத்திரமாக 34 ஆண்டுகள் பயணம் செய்ய வைத்தவர் அவருடைய கணவர் நடராஜன்தான்.

நடராஜனை வைத்து ஜெயலலிதா போட்ட கணக்கு

சசிகலா-ஜெயலலிதா நட்பை வளர்த்தெடுத்ததிலும் நடராஜனின் பங்கு அளவிட முடியாதது. அதற்கு குறுக்கே, எம்.ஜி.ஆர் போட்ட தடைகளையே சமார்த்தியமாக தகர்த்து எறிந்தார் நடராஜன். எப்படி என்றால், கேசட் பரிமாற்றத்துக்காக ஏற்பட்ட, சசிகலா ஜெயலலிதா அறிமுகம் கொஞ்சம் நட்பாக துளிர்விடத் தொடங்கி இருந்தது. சசிகலாவின் குடும்ப விபரங்களை ஜெயலலிதா கேட்டுத் தெரிந்துகொண்டார். “ராமநாதபுரத்தில் இருந்து ஒருங்கிணைந்த தஞ்சைக்கு தன் முன்னோர்கள் குடிபெயர்ந்த கதை; திருத்துறைப்பூண்டியில் ‘இங்கிலீஷ்’ மருந்துக் கடைக்காரர் குடும்பம் என்று தன் குடும்பத்துக்கு பெயர் வந்த கதை; தனது அண்ணன் விநோதகன் டாக்டரான கதை” என்று சசிகலா சொன்னதில், ஜெயலலிதாவுக்கு பெரிதாக ஆர்வம் ஏற்படவில்லை. ஆனால், சசிகலா அவருடைய கணவரைப் பற்றிச் சொன்னபோது, ஜெயலலிதாவுக்கு கண்கள் ஆச்சரியத்தில் மலர்ந்தன. “தன் கணவர் நடராஜன், மொழிப்போராட்ட வீரர்; தி.மு.க மாணவர் இயக்கங்களில் பங்கெடுத்தவர்; அண்ணா, கருணாநிதியோடு நல்ல அறிமுகம் உள்ளவர்; பி.ஆர்.ஓ-வாகப் பணியாற்றுகிறார்; கலெக்டர் சந்திரலேகாவை தமிழகம் முழுவதும் பிரபலமாக கொண்டு சேர்த்ததில் தன் கணவரின் பங்கு அதிகம்'' என்றெல்லாம், சசிகலா சொல்லச் சொல்ல, ஜெயலலிதா மனதில் மின்னல் வெளிச்சம் பரவியது.

ஜெயலலிதாவுக்கு நடராஜனைப் பார்க்க வேண்டும் என்ற ஆர்வம் ஏற்பட்டது. ஒரு சுபயோக சுபதினத்தில், சசிகலா புண்ணியத்தில், நடராஜனும் போயஸ் கார்டன் வீட்டுக்குள் அடியெடுத்து வைத்தார். ‘நடராஜன் தான் நினைத்ததுபோல், மிக சாதூர்யமான ஆள்’ என்பதை ஜெயலலிதா உணர்ந்து கொண்டார். ஆனால், அப்போது ஜெயலலிதா தன்னுடைய எதிர்காலத் திட்டங்கள் எதையும் நடராஜனிடம் பகிர்ந்துகொள்ளவில்லை. அது ஒரு சாதரண அறிமுகமாகத்தான் இருந்தது. ஆனால், எப்படியும் இந்த நபர், தனது அரசியல் வாழ்வில், மிகப்பெரிய  அஸ்திரமாக இருக்கப்போகிறார் என்பது ஜெயலலிதாவுக்கு மனதாரப் புரிந்தே இருந்தது.

இந்த காட்சிகள், போயஸ் கார்டனில் நடந்து கொண்டிருந்தபோதே, எம்.ஜி.ஆருக்கு விஷயம் போனது. அதற்காகவே, ஜெயலலிதாவின் வீட்டைச் சுற்றி எப்போதும் ஒற்றர்களை நியமித்து இருந்தார் எம்.ஜி.ஆர். போயஸ் கார்டனுக்குள் வந்துபோகும், புதிய பெண் யார் என்று விசாரிக்கச் சொன்னார். அவர்களை நேரில் வந்து சந்திக்கச் சொன்னார்.

சசிகலாவுக்கு எம்.ஜி.ஆர் கொடுத்த ‘அசைன்மென்ட்’

எம்.ஜி.ஆரின் உத்தரவு, சசிகலாவுக்கும் நடராஜனுக்கும் தெரிவிக்கப்பட்டது. ஜெயலலிதாவைச் சந்திக்க, போயஸ் கார்டனுக்குப் போனதுபோல், நடராஜனும், சசிகலாவும் எம்.ஜி.ஆரைச் சந்திக்க ராமவரம் தோட்டத்துக்கும் போனார்கள். நடராஜனை நேரில் பார்த்தபோது, எம்.ஜி.ஆருக்கு நன்றாக அவரைத் தெரிந்திருந்தது. தி.மு.க சகவாச நினைவுகள், நடராஜனை எம்.ஜி.ஆரின் நினைவடுக்குகளில் மேலே கொண்டு வந்தன. எம்.ஜி.ஆருக்கு மகிழ்ச்சி. காரணம், “நடராஜனுக்கு ஒரளவுக்கு நிலவரம் தெரியும். எனவே, தான் நினைத்த வேலை எளிமையானது” என்று எம்.ஜி.ஆர் நினைத்தார். “போயஸ் கார்டன் வீட்டில் என்ன செய்கிறீர்கள்” என்று ஒப்புக்கு கேட்டு வைத்தார். “ கேசட் கொடுப்பதற்காக என் மனைவி அங்கு போகிறார்” என்று நடராஜனும்  ஒப்புக்கு சொல்லி வைத்தார். சிரித்த முகத்தோடு கேட்டுக் கொண்ட எம்.ஜி.ஆர், சசிகலாவுக்கு கூடுதலாக ஒரு வேலையைக் கொடுத்தார். “போயஸ் கார்டனுக்கு வருகிறவர்கள் யார், ஜெயலலிதா யாரோடு பேசுகிறார், மொத்தமாக அங்கு என்ன நடக்கிறது?” என்பது பற்றி தெளிவாகத் தனக்குத் தெரிவிக்க வேண்டும் என்றும் கட்டளையிட்டார். “இந்தத் தகவல்களை கொடுக்க, எந்த நேரம் வேண்டுமானாலும் சசிகலா, ராமாவரம் தோட்டத்துக்கு வரலாம்... ஜானகி அம்மாள் உள்பட யாரும் தடுக்கமாட்டார்கள்” என்ற உத்தரவாதத்தையும்  எம்.ஜி.ஆர் சசிகலா-நடராஜன் தம்பதிக்கு அளித்திருந்தார். இதை ராமாவரம் தோட்டத்து ஊழியர்களும், பத்திரிகையாளர் வலம்புரிஜானும் பல்வேறு தருணங்களில் உறுதி செய்துள்ளனர்.

ஜெயலலிதாவை வைத்து நடராஜன் போட்ட கணக்கு

எம்.ஜி.ஆர் கொடுத்த அசைன்ட்மெண்டுக்கு சரியென்று தலையாட்டிவிட்டு வந்த நடராஜன்-சசிகலா தம்பதி, அந்த திட்டத்தை மாற்றிக் கொண்டதற்கு காரணம் இருந்தது. அப்போது, சசிகலாவின் வீடியோ கடை மூலம், ஜெயலலிதா பங்கேற்ற ஈரோடு, சென்னை நிகழ்ச்சிகள் படம் பிடிக்கப்பட்டன. ஜெயலலிதா அந்த வாய்ப்பை சசிகலா-நடராஜனுக்கு வாங்கிக் கொடுத்திருந்தார். அப்போது, ஜெயலலிதாவுக்குக் கூடிய கூட்டம் நடராஜனை பிரமிப்பில் ஆழ்த்தியது. ஏனென்றால், மாணவர் போராட்டங்களுக்கு கூட்டம் திரட்டிய அனுபவம் நடராஜனுக்கு இருந்தது. பத்துப்பேரை ஒரு நிகழ்ச்சிக்கு திரட்டுவதற்குள் நாக்குத் தள்ளிவிடும். ஆனால், ஜெயலலிதாவுக்கு தன்னிச்சையாக சாரை சாரையாக கூட்டம் திரண்டது. சாதரண விஷயமில்லை இது. இதைப் புரிந்து கொண்ட நடராஜன், இப்போது ஜெயலலிதாவை வைத்து ஒரு கணக்குப்போட்டார். “இப்போதைக்கு எம்.ஜி.ஆர்தான் கட்சி; எம்.ஜி.ஆர்தான் ஆட்சி என்ற நிலை இருக்கலாம்; எம்.ஜி.ஆரைச் சுற்றி இருக்கும் அதிகாரமையங்களில் ஜெயலலிதா கடைசி இடத்தில் இருக்கலாம்; ஆனால், எம்.ஜி.ஆருக்குப் பிறகு, ஜெயலலிதாவால் மட்டும்தான் கட்சியாக முடியும்; அதன்மூலம் ஜெயலலிதாவால் மட்டும்தான் ஆட்சியைப் பிடிக்க முடியும். அந்த ஆட்சியில் அதிகாரம் செலுத்த வேண்டுமானால், ஜெயலலிதாவுக்கு நெருக்கமாக வேண்டும்; ஜெயலலிதாவுக்கு நெருக்கமாக வேண்டுமானால், அது சசிகலாவின் வழியாகத்தான் தனக்குச் சாத்தியம்” என்று தீர்வுகளை அடுக்கியது நடராஜன் போட்ட கணக்கு.  அதனால், ஜெயலலிதாவை வேவு பார்க்கச் சொன்ன, எம்.ஜி.ஆரை எல்லாவழிகளிலும் சமாளிக்க முடிவு செய்தார் நடராஜன். சசிகலாவுக்கும் அதில் சில திட்டங்களைச் சொல்லிக் கொடுத்தார். “எம்.ஜி.ஆருக்கு விசுவாசமாக இருப்பதைவிட, ஜெயலலிதாவுக்கே விசுவாசமாக இருக்க வேண்டும்” என்று சசிகலாவுக்கு அறிவுறுத்தினார். ஆனால் நடராஜன் சொல்லாமலேயே, சசிகலாவுக்கு இயல்பாக அதுதான் கைவந்தது. “ஜெயலலிதாவும் பெண்; சசிகலாவும் பெண்” என்ற விதி வகுத்த நியதி அது. அதுபோல, தன் மனைவியைத் தவிர, வேறு யாரும் ஜெயலலிதாவை புதிதாக நெருங்காமல் பார்த்துக் கொண்டார் நடராஜன். சசிகலாவுக்கு முன்பே, ஜெயலலிதாவை நெருங்கி நட்பாக இருந்தவர்களை, எதிர்பாராத நேரங்களில் எல்லாம், அடித்துக் காலி செய்தார் நடராஜன். சசிகலா-ஜெயலலிதாவுக்கு இடையில் இருந்த, சசிகலா-ஜெயலலிதாவுக்கு இடையில் முளைத்த, அத்தனை தலைகளையும் நடராஜன் வெட்டித் தள்ளினார். அன்றும் சரி... இன்றும் சரி... இந்திரஜித்தைப்போல, மறைந்து இருந்தே அம்புகளைத் தொடுத்துப் பழக்கப்பட்டவர் நடராஜன். அவர் எப்போது தாக்குவார்? எப்படித் தாக்குவார்? எங்கிருந்து தாக்குவார் என்று அவர் எதிரிகள் திணறிக் கொண்டிருக்கும்போது, அவர்களை வீழ்த்திவிட்டு, அடுத்த களத்துக்குத் தயாராகிவிடுவார் நடராஜன். ஜெயலலிதாவுக்கு சசிகலாவைத் தவிர வேறு யாருமே இல்லாத நிலையை கச்சிதமாக உ ருவாக்கிய பிறகே ஒய்ந்தார் நடராஜன்.

ஜெயலலிதாவுக்குப் பின்னால் சசிகலா இருந்ததுபோல், சசிகலாவுக்குப் பின்னால் நடராஜன் இருந்தார்.

மொபைல் போன்களுக்கு சிப்-செட்கள் தயாரிப்பதில் முன்னணியில் இருக்கும் க்வால்காம் (Qualcomm) நிறுவனம், 'இந்தியாவில் பயன்படுத்தப்படும் மொபைல் பணப் பரிமாற்றங்களுக்கான பெரும்பாலான ஆப்-கள் பாதுகாப்பானவை இல்லை' என்று கூறியுள்ளது.

'பணப் பரிமாற்றம் செய்வதற்கு பிரத்யேகமாக மொபைல் போன்களில் வன்பொருள் (hardware) அமைப்பு பொருத்தப்பட்டிருக்க வேண்டும். ஆனால், இந்தியாவில் பயன்படுத்தப்படும் ஆன்டிராய்ட் இயங்குதளத்திலான பணப் பரிமாற்ற மொபைல் ஆப்-களில் இந்த மாதிரி வசதிகள் இல்லை' என்று தெரிவித்துள்ளது.  

இசைப்புயல் ஏ.ஆர். ரஹ்மான் பெயர் மீண்டும் ஆஸ்கர் விருதுக்கு பரிந்துரை செய்யப்பட்டுள்ளது. கால்பந்து வீரர் பீலேவின் பயோபிக் படமான "Pele: Birth of a Legend " என்ற படத்துக்காக ஏ.ஆர். ரஹ்மானின் பெயர் பரிந்துரைக்கப்பட்டுள்ளது.

89-வது ஆஸ்கர் விருதுக்காக பரிந்துரைக்கப்பட்ட, இந்த பட்டியலில் 145 பேர்களின் பெயர்கள் இடம்பெற்றுள்ளன. இதிலும் பின்னணி இசை மற்றும் அதே படத்தின் "Ginga" பாடலுக்காக என இரண்டு பிரிவுகளில் ரஹ்மானின் பெயர் பரிந்துரைக்கப்பட்டுள்ளது.

ஜனவரி 26-ம் தேதி பரிந்துரைக்கப்பட்டவர்களின் இறுதிப் பட்டியல் வெளியிடப்படும். இதையடுத்து பிப்வரி 26-ம் தேதி ஆஸ்கர் விருது வழங்கும் நிகழ்ச்சியும் நடைபெறவுள்ளது.