!...Payanam...!

அபூர்வ விண்கல் ஒன்றை தேடிச் செல்லும் தொல்பொருள் ஆராய்ச்சியாளர்களின் இடைவிடாத பயணமே 'இந்திரஜித்'!

மத்திய தொல்லியல் ஆராய்ச்சித் துறை இயக்குநராக இருந்த சச்சின் கடேகர் அதற்குப் பிறகு பேராசிரியராகத் தன் பணியைத் தொடங்குகிறார். சில மாணவர்கள் உதவியுடன் அபூர்வமும், அதிசயமும் உள்ள விண்கல் ஒன்றைத் தேடும் முயற்சியில் ஈடுபடுகிறார். இதை அறிந்துகொள்ளும் தொல்லியல் துறை இயக்குநர் சுதான்ஷு பாண்டே அதற்குத் தடையாக இருக்கிறார். இந்நிலையில் சச்சினின் மாணவர் குழுவில் கவுதம் கார்த்திக் இணைகிறார். விண்கல் இருக்கும் இடத்தை எப்படி கண்டறிகிறார்கள், விண்கல்லை தேடிச் செல்வதற்கான இலக்கு என்ன, அந்தப் பயணத்தில் யாருக்கு என்ன நேர்கிறது, அதற்குப் பிறகான விளைவுகள் என்ன என்பது மீதிக் கதை.

'சக்கரகட்டி' தந்த இயக்குநர் கலாபிரபு நீண்ட இடைவெளிக்குப் பிறகு 'இந்திரஜித்' மூலம் களம் இறங்கியிருக்கிறார். விண்கல் தொடர்பான அந்த கதையின் முடிச்சு சுவாரசியம் மிகுந்தது. ஆனால், அதை முழுமையாக ரசிகர்களுக்குக் கடத்துவதில் இயக்குநர் தவறியிருக்கிறார்.

கவுதம் கார்த்திக் நடிப்பில் இந்த ஆண்டு வெளிவந்திருக்கும் ஐந்தாவது படம் 'இந்திரஜித்'. துறுதுறுப்பு, குறும்பு, சேட்டைகள் செய்யும் புத்திசாலி கதாநாயகனாக தன்னை வெளிப்படுத்திக்கொள்ள கவுதம் கார்த்திக் முயற்சித்திருக்கிறார். ஆனால், அந்த முயற்சி முழுமையடையவில்லை. புன்சிரிப்புடன் ஹாய் சொல்லி அறிமுகமாவது, தத்துவம் என்ற பெயரில் வளவளவென பேசுவது, சீரியஸ் தருணங்களில் ஜாலியாக இருப்பது, பின் அதற்கொரு காரணம் பகிர்ந்து நியாயப்படுத்துவது, அப்பா கார்த்திக்கைப் போல பேச நினைப்பது என கவுதம் கார்த்திக் தான்தோன்றித்தனமாக நடித்திருக்கிறார். பள்ளத்தைத் தோண்டி, தலையில தொப்பி, வாயில சுருட்டு, கையில சவுக்கு என அவர் அதிஉற்சாகத்துடன் பேசும் வசனங்கள் சிரிப்பையே வரவழைக்கின்றன. விழுவதும், புரள்வதும், தொங்குவதுமாக எடுக்கும் கவுதம் எடுக்கும் சாகச ரிஸ்க்குகள் மட்டும் ஓரளவு பலன் அளிக்கின்றன.

சோனாரிகாவும், அஷ்ரிதா ஷெட்டியும் பெயரளவில் நாயகிகளாக படத்தில் வந்து போகிறார்கள். சோனாரிகா சில காட்சிகளில் கவுரவத் தோற்றதுடன் விடை பெறுகிறார். அஷ்ரிதாவுக்கு எந்த முக்கியத்துவமும் படத்தில் இல்லை. இறுதியில்தான் அஷ்ரிதா - கவுதம் கார்த்தி காதல் புலப்படுகிறது.

பேராசிரியராக நடித்திருக்கும் சச்சின் கடேகர் விண்கல் குறித்தான மீட்புப் பயணத்தில் தன் தவிப்பையும், இருப்பையும் பதிவு செய்கிறார். தொல்லியல் இயக்குநர் சுதான்ஷு பாண்டே பக்குவமாக நடித்திருக்கிறார். அவரின் மீதான பிம்பம் சண்டைக் காட்சியில் உடைந்து நொறுங்குகிறது. எம்.எஸ்.பாஸ்கர் சில இடங்களில் மட்டும் டெம்ப்ளேட் கலகலப்புக்கு பயன்பட்டிருக்கிறார். நாகேந்திர பாபு, அமித், ராஜ்வீர் சிங், ரஞ்சன் உள்ளிட்டோர் அரங்க உடைமைப் பொருள் போல இருக்கிறார்கள்.

கோவாவின் விசாலப் பரப்பையும், காங்கோ காடுகளின் அழகையும் ராசாமதி தன் கேமராவுக்குள் படம் பிடித்திருக்கிறார். கே.பி.யின் இசையில் பாடல்கள் சம்பந்தம் இல்லாத இடங்களில் இம்சை தருகின்றன. பின்னணி இசையில் பாஸ்மார்க் வாங்குகிறார். வி.டி.விஜயன், எஸ்.ஆர்.கணேஷ்பாபு களம் உணர்ந்து சரியாக கத்தரி போட்டிருக்கிறார்கள்.

விண்கல் என்ற ஒற்றை வரியை வைத்துக்கொண்டு விறுவிறு ஆக்‌ஷன் சினிமா கொடுத்திருக்க வேண்டிய இயக்குநர் வெறுமனே வேடிக்கை பார்த்ததுதான் பெருங்குறை. தொல்பொருள் ஆராய்ச்சியில் கரை கண்டவர்களே கண்டுபிடிக்காத அம்சங்களை, குறியீடுகளை, எல்லைகளை நாயகன் மட்டும் கண்டறிவதும், அடுத்தடுத்து நடக்கும் எல்லா காட்சிகளும் தற்செயல் நிகழ்வாக சித்தரிக்கப்படுவதும் நம்பும்படியாக இல்லை. படத்தில் எந்த அசம்பாவிதம் நடந்தாலும் யாரும் அதற்காக வருந்துவதோ, கவலைப்படுவதோ இல்லை. அலட்டிக்கொள்ளாமல் அடுத்த வேலையைப் பார்க்கச் சென்றுவிடுகிறார்கள். பயமும், பதற்றமும் இல்லாமல் ஆபத்தை எதிர்கொள்கிறார்கள். எந்த பாதிப்பையும் உணராமல் பயணிக்கும் இந்தத் தன்மையே இலக்கணம் மீறியதாக இருக்கிறது.

கிராபிக்ஸ் காட்சிகளிலும், கலை இயக்கத்திலும் கவனம் செலுத்திய இயக்குநர் திரைக்கதையில் சொதப்பி இருப்பது அப்பட்டமாகத் தெரிகிறது. விண்கல்லுக்கான பயணத்தை பின்புலத்தோடு சொல்வது தற்போதைய கதைக்குள் இணையாமல் தனித்து துருத்தி நிற்கிறது. சண்டைக் காட்சிகள், சேஸிங் என எதிலும் லாஜிக் இல்லை. இதில் எதற்கு மாவோயிஸ்ட்களை வம்புக்கு இழுக்கிறார்கள்?, விமான விபத்தில் யாருக்கும் எந்தக் காயமும் இல்லாமல் தப்பிப்பது எப்படி, விண்கல் எப்படி காங்கோ காடுகளில் இருக்கிறது என்பதெல்லாம் மிகைத்தன்மையுடன் காட்சிப்படுத்தப்பட்டுள்ளது. இப்படி லேசுபாசாக அணுகிய விதத்தில் 'இந்திரஜித்' இலக்கணப் பிழையாகவே இருக்கிறது.

“அய்யோ! அவர் அப்படித்தான்…

நீங்கள் அவருடையதைப் பிடுங்கிக்கொண்டு ஆர்ப்பரிக்கலாம்;

ஆனால், அடுத்த ஆராய்ச்சிக்குச் செல்ல அவர் தயங்கியதேயில்லை...

கலகக்கார கலைஞனிடம் பஞ்சம் ஏது..?” - தமிழ்த் திரைக்களத்தில் ‘அறம்’ விதைத்திருக்கிற இயக்குநர் கோபி நயினார் பற்றி அவர் மகன் எழுதியிருந்த வரிகள் இவை. நம்மிடம் அந்தக் ‘கலகக்கார கலைஞன்’ பேசியபின்புதான் தெரிந்தது அவர் மனதில் அடக்கிவைத்துள்ளவற்றில் ஒரு துளிதான் ‘அறம்’ திரைப்படமாக வெளிவந்திருக்கிறது. தற்கால அரசியல் முதல் தண்ணீர் அரசியல் வரை அலசுகிறார்...

தாக்கத்தை ஏற்படுத்திய ‘நண்டு’!

“என்னுடைய சிறுவயது மாலை நேரங்கள் முழுவதும் இடதுசாரிகள் வகுப்புகளில்தான் கழிந்தன. எட்டாவது படிக்கும்போது என் கைகளில் கொடுக்கப்பட்ட ‘சிலந்தியும் - ஈயும்’, ‘தாய்’, ‘உலகைக் குலுக்கிய பத்து நாள்கள்’ போன்ற இடதுசாரி இலக்கியங்கள் ஏற்படுத்தியத் தாக்கங்கள்தான் இன்றளவும் என்னுள் எரிந்துகொண்டிருக்கிறது. ஒரு சிறந்த ஜனநாயகத்தைக் கலைகள்தான் பேசும் என்பதைப் புரிந்துகொண்ட வயது அது. கிராமங்களில் அரசு வைத்திருக்கும் டி.வி-யில் நிகழ்ச்சிகளைப் பார்ப்பதற்காகப் பக்கத்து ஊர்களுக்குப் பறப்போம். அப்படி நான் ஓடிஓடி பார்த்த படங்களில் ‘நண்டு’ எனக்குள் பெரிய தாக்கத்தை ஏற்படுத்திவிட்டது. சாதிய ஒடுக்குமுறைகள் நான் படித்த பள்ளிகளிலேயே எனக்கு நன்கு அறிமுகம். ஒடுக்கப்பட்ட சமூகத்தைச் சேர்ந்த நான், ஸ்கூலுக்கு ஷூ போட்டுக்கொண்டு போனால், அடுத்த வாரமே மற்ற சமூகத்தைச் சேர்ந்த மாணவர்கள் கால்களிலும் ஷூக்களைப் பார்ப்பேன். நான் அலுமினியப் பெட்டியில் புத்தகங்கள் எடுத்துக்கொண்டு போவதைப் பார்த்ததும் மற்ற மாணவர்களும் அலுமினியப் பெட்டிகளைக் கையில் எடுத்துக்கொண்டு வருவார்கள். ‘இந்தச் சாதிய சேர்ந்த இவனே இதெல்லாம் பண்ணும்போது, நாங்க என்ன குறைச்சலா’ என்ற தொணிதான் அவர்களின் பெற்றோரிடம் தெரிந்தது. இதுமாதிரி ஏகப்பட்ட அனுபங்களை வளரவளர பார்க்கத் தொடங்கினேன்.

அலுமினிய டம்ளரில் டீ!

சினிமாதான் எல்லாம் என, திரைத்துறைக்குள் வரும்போது எனக்கு வயது 19. சொந்த ஊரைவிட்டுத் தயாரிப்பாளரைப் பார்ப்பதற்காக வாணியம்பாடி அருகே ஒரு கிராமத்துக்கு வந்திருந்தேன். அங்கிருந்த என் நண்பன் சொன்னான், ‘டேய் காலைல எங்கயாவது போகணும்னா என்கிட்ட சொல்லு... நீ தனியா போகாத’ என்று. காலையில் 4.30 மணிக்கு எழுந்து அருகில் இருந்த டீக்கடைக்குப் போனேன். அங்கு சில விசித்திர காட்சிகள். தண்ணீர் நிரம்பிய ஒரு சிமென்ட் தொட்டி முழுக்க இருக்கும் அலுமினிய டம்ளர்களில் ஒன்றை எடுத்துக்கொண்டு மூங்கில் தட்டிக்குள் கை நீட்டினால் அதில் டீ ஊற்றினார்கள். அதற்கான காசை அவர்களின் கைகளில் இருந்து வாங்க மாட்டார்கள். சில்லறையாக இருந்தால், அருகில் இருக்கும் தண்ணீர் டப்பாவுக்குள் போட்டுவிட வேண்டும். ரூபாய் நோட்டாக இருந்தால் நீரில் நனைத்துப் பாய்லரில் ஒட்டிவிட வேண்டும். எனக்குக் கடும் அதிர்ச்சி. மேலும், ‘டீ கொடுங்க’ எனத் தொடர்ச்சியாகக் கேட்டுக்கொண்டே இருந்த என்னை, அடிக்க வந்துவிட்டார்கள். ‘யார கேட்டு பெஞ்சுல உட்காந்த நீ’ என ஒரே பிரச்னை. ‘பெரியவர் வீட்டுக்கு வந்தவருப்பா’ என அங்கிருந்த சிலர் சொன்னவுடனே அமைதியானார்கள். பெரும் மன உளைச்சலைக் கொடுத்த இந்தச் சம்பவத்துக்குப் பிறகுதான் சினிமாவுக்குக் ‘குட்பை’ சொல்லிவிட்டு, சமூகம் சார்ந்து இயங்க ஆரம்பித்தேன். தலித் இயக்கங்கள், கம்யூனிஸ்ட் கட்சிகள், இலக்கியக் கூட்டங்கள் என தொடர் பயணங்கள் செய்தேன். மக்களைப் படிக்க இதைவிட வேறென்ன வாய்ப்பு இருந்துவிடப் போகிறது.

‘அறம்’ படத்துக்கான அடிப்படை!

கிட்டத்தட்ட 15 வருடம் கிடைத்த வேலைகளையெல்லாம் செய்துவிட்டு, என்னுடைய 35 வயதுக்கு மேல் மீண்டும் சினிமாவுக்குள் வந்தேன். அப்போதே என் ஐடியா மாற்றுச் சினிமாதான். ஒருநாள் நான், டி.வி-யில் பார்த்த செய்திதான் இந்த ‘அறம்’ படத்துக்கான அடிப்படை. தொடர்ந்து குழந்தைகள் ஆழ்துளைக் கிணறுகளில் விழுவது தொடர்பாக புருஷோத்தமன் என்ற நண்பர் செய்த உதவியில் ஆரணி பகுதியில் சுற்றி ஆய்வு செய்தேன். குழந்தைகளை மீட்க நம்மிடம் ஒரு கருவிகூட இல்லை என்பது பெரும் அதிர்ச்சி. தீயணைப்பு வீரர்கள் செய்வதை நேரில் இருந்து பார்த்தபடியே இருப்பேன். படத்தில் காட்டிய அந்தக் ‘கயிறு டெக்னிக்’ அங்கு பார்த்ததுதான். சினிமா எடுப்பதற்காக அதைச் செய்யவில்லை. ஆனால், அந்தப் பாதிப்பு என்னை ‘அறம்’ படத்தை நோக்கித் தள்ளியது.

அரசியல் பேசிய புத்தகம்!

அடுத்து, சமூகத்தில் நிலவும் இந்தத் ‘தண்ணீர் அரசியல்’. நாம் குடிப்பது தண்ணீரே கிடையாது. எங்கள் கிணற்றில் இருந்து நீர் எடுத்தால், அதைத் தண்ணீர் என்று சொல்லலாம். இவர்கள் பிளாஸ்டிக் கேனில் அடைத்து விற்பதைத் தண்ணீர் என எப்படிச் சொல்வீர்கள்? உலகில் நமக்குக் கிடைக்க வேண்டிய அத்தியாவசிய பொருள்களைக் காசுக்கு விற்கும் கொடுமையைவிட வேறு இருந்துவிட முடியுமா என்ன? இந்த நொடிவரை கெட்டுப்போகாத நம் தண்ணீரை வியாபாரமாக்கியதை எதிர்த்துக் கேட்பதற்கு வக்கற்று வாங்கிக் குடிக்கிறோம். நான் உள்பட இதற்கு விதிவிலக்கு இல்லையே. நான் எழுதிய, ‘நத்தைகளைக் கொன்ற பீரங்கிகள்’ புத்தகம் மூலம் சூழலியல் அரசியலைப் பேசினேன். இங்கு எல்லாமே சீரழிக்கப்பட்டுவிட்டது. இந்தியாவில் அரசியல் கட்சி என்ற ஒன்றே கிடையாது. கல்வி, சுகாதாரம் என எல்லாவற்றையும் கூறு போட்ட அரசியல்தான் இங்கு நடந்திருக்கிறது. இங்கு நம்மை ஆண்ட யார் ஆட்சியும் பொற்காலம் கிடையாது.

இந்த அவல அரசியலை என் படங்கள் குறிவைக்கும். மேலும், இந்தியாவில் இருட்டடிப்பு செய்யப்படும் இஸ்லாமியர்கள் பற்றி படம் எடுக்க வேண்டும் என ஆசைப்படுகிறேன். பெண்களைப் பற்றி நிறைய பேச வேண்டும். என் படங்களின் மூலம் இனி நிறைய ‘மதிவதனிகள்’ வெளிப்படுவார்கள். என் கோபத்தை நான் கலையாக மாற்றியிருக்கிறேன். நான் வாங்கிய அடிகளைத்தான் என் படத்தில் பிரதிபலித்திருக்கிறேன். அது, மக்களுக்கு வலித்ததனால்தான் இன்று ‘அறம்’ திரைப்படம் அவர்கள் மனதில் நின்றிருக்கிறது” என பேசிமுடித்த கோபி நயினாரிடம் அத்தனை அரசியல் வாசம்.

எளியவர்கள் தங்களுக்குள் நீண்டநாள்களாக அடக்கி வைத்திருக்கும் கோபங்கள் நிச்சயம் பரியேறும் என்பது ‘அறம்’ மூலம் நிரூபிக்கப்பட்டிருக்கிறது.

சர்க்கரை நோய் பரம்பரை வியாதியா?

ஆம். பெற்றோர் இருவருக்கும் சர்க்கரை நோய் இருந்தால், குழந்தைகளுக்கு வரும் வாய்ப்பு 80 சதவீதம் உண்டு. பெற்றோரில் ஒருவருக்கு இருந்தால் 50 சதவீத வாய்ப்பு உண்டு. பெற்றோருக்கு சர்க்கரை நோய் ஏற்பட்ட வயதில் இருந்து 5 முதல் 10 ஆண்டுகள் முன்பாகவே குழந்தைகளுக்கு வந்து விடுகிறது.

சர்க்கரை நோயின் அறிகுறிகள் என்ன?

அதிக சிறுநீர்ப் போக்கு. அதிக தாகம் மற்றும் பசி. மூன்று மாதங்களில் முன்பு இருந்த எடையில் இருந்து 10 சதவீதம் வரை, உடல் எடை இழப்பு. ஆறாத புண், அதிக தூக்கம், பாத எரிச்சல். அத்துடன் கை, கால் குடைச்சல், இடுப்பு வலி, நெஞ்சுவலி, பல்வலி, பல்வேர் வீக்கம், பல்லில் ரத்தக்கசிவு, தலைவலி, வலிப்பு நோய், தோள்பட்டை வலி, ஆண் உறுப்பில் தோல் வெடிப்பு, வெள்ளைப்படுதல், படர்தாமரை, அதிக வியர்வை, குதிங்காலில் வலி, முழங்கை வலி, காது நரம்பு பாதிப்பு ஆகியவை ஏற்படும்.


சர்க்கரை நோயை கண்டறிவது எப்படி?

எட்டு மணி நேரம், சாப்பிடாமல் வெறும் வயிற்றில் எடுக்கப்படும் போது, ரத்தத்தில் சர்க்கரையின் அளவு 126 மி.கி., க்கு குறைவாக இருக்க வேண்டும். 82.5 கிராம் "குளுக்கோன் டி’ யை, 300 மி.லி., அளவு தண்ணீரில் கலந்து குடித்து, 2 மணி நேரத்திற்குப்பின் எடுக்கப்படும் சர்க்கரையின் அளவு, 200 மி.கி.,க்கு குறைவாக இருக்க வேண்டும்.

சாதாரணமான நேரத்தில் பரிசோதிக்கும்போது, சர்க்கரையின் அளவு 180 மி.கி.,க்கு கீழ் இருக்க வேண்டும். "ஏ 1 சி’ எனப்படும் பரிசோதனையின் அளவு, 6.5 சதவீதத்திற்கு மேல் இருக்க வேண்டும். இவற்றில், ஏதாவது 2 மட்டும் அல்லது இவற்றில் ஏதாவது ஒன்றுடன், அதிக சிறுநீர் போக்கு, தாகம், பசி, 10 சதவீதத்திற்கும் மேலான எடை இழப்பு ஏற்படுவதன் மூலம் அறியலாம்.

சர்க்கரை நோயாளிகளுக்கு மைதா மாவு கூடாது என்கிறார்களே, ஏன்?

மைதா மாவு, கோதுமையில் இருந்து பெறப்படுகிறது. கோதுமையில் உள்ள நார்ச்சத்து முழுவதும், இயந்திரத்தால் நீக்கப்பட்டு, மாவுச் சத்து மட்டுமே உள்ளது. இதனால், மைதா உணவு வகைகளை சாப்பிட்ட உடன், மிகவேகமாக, ரத்தத்தில் சர்க்கரையின் அளவு உயர்கிறது. இந்த வேகத்திற்கு, "இன்சுலின்’ ஊசியோ அல்லது மாத்திரையோ ஈடுகொடுக்க முடிவதில்லை. மைதா வகைகளை தவிர்ப்பது நல்லது. மைதாவில் உள்ள "மைக்ரோகிராம்’ அளவு, கெமிக்கல் சர்க்கரை வரும் வாய்ப்பை அதிகரிக்கிறது.

சர்க்கரை நோயாளிகள் எந்த வகை பழங்களை சாப்பிடலாம்?

ஆப்பிள், மாதுளை, பப்பாளி, கொய்யா, ஆரஞ்சு, தர்ப்பூசணி, பேரிக்காய், நாவல்பழம், அத்திப்பழம் போன்றவைகளை சாப்பிடலாம். அதேசமயம் பழச்சாறு குடித்தால், அது உடனே உடலில் சர்க்கரை அளவை அதிகப்படுத்துவதால், தவிர்க்க வேண்டும்.

சர்க்கரை நோயாளிகள் நிலக்கடலை, முந்திரி வகைகளை (நட்ஸ்) பயன்படுத்தலாமா?

செரிமானத்தை தாமதப்படுத்துவதன் மூலம், சாப்பிட்ட உடனேயே அதிகரிக்கும் சர்க்கரையின் அளவை (30-50 சதவீதம்), அவை குறைக்கின்றன. மேலும், இதில் உள்ள ஆர்ஜினின், இருதயத்திற்கு ஊறு விளைவிக்கும் சி.ஆர்.பி., அளவை குறைக்கிறது. எனவே, அவற்றை பயன்படுத்தலாம். வாரத்தில் 3 நாட்கள், ஒரு கைப்பிடி அளவு வேகவைத்த வேர்க்கடலை, முந்திரி, பாதாம் பருப்பு பயன்படுத்தலாம்.

காபி, டீ- இவற்றில் எது சிறந்தது?

காபி சிறந்தது. டீ விரும்புவோர் எலுமிச்சை டீ அல்லது கிரீன் டி குடிக்கலாம். காலையில் ஒரு கப் காபி, மாலையில் ஒரு கப் டீ, பால் அளவை குறைத்து, எலுமிச்சை சேர்த்து குடிக்கலாம். இவை மாரடைப்பு வருவதை தவிர்க்கிறது.

 "ஓட்ஸ்’ சாப்பிடுவது எந்தளவு பலனை தரும்?

 "ஓட்ஸ்’ என்பது அரிசியைப் போல ஒரு தானியமே. ஆனால், அரிசியைப் போல இல்லாமல் கஞ்சி, களி மட்டும் தயாரிக்க முடியும். இவை விரைவில் செரிமானம் ஆகிவிடுவதால் சீக்கிரமே பசியெடுக்கும். எனவே மறுபடியும் சாப்பிட வேண்டியிருப்பதால் சர்க்கரையின் அளவு மேலும் அதிகரிக்கும். ஆனால், "ஓட்ஸை’ சிறிது கெட்டியாக செய்து காலை உணவாக சாப்பிடலாம்.

சமையலை எளிதாக்க இல்லத்தரசிகளுக்கு சில டிப்ஸ்.

* அரிசியை நன்கு ஊறவைத்து பின் வேகவைத்தால் சீக்கிரமாக வேகும்.

* இட்லி, இடியாப்பம், புட்டு எண்ணையில்லாச் சப்பாத்தி ஆகியவற்றிற்கு முதலிடம் கொடுப்பது உடலுக்கு நல்லது.

* ஒரு நேரத்திற்கு ஒரே வகைக் காய் நல்லது.

* கீரை வகைகளை, அரை வேக்காட்டில் இறக்க வேண்டும்.

* எண்ணெய்விட்டு தாளித்து பின் காய்களை வேக வைத்து பொரியல் செய்வது வழக்கம். அதற்குப் பதிலாக தேவையான அளவு தண்ணீர் மட்டுமே விட்டு காய்களையும் மசாலாச் சாமான்களையும் சேர்த்து வேகவேகக் கிளற வேண்டும். பச்சை நிறம் மாறும் முன்பே தேங்காய்த்துருவலை வேண்டிய அளவு சேர்த்து கிளறி இறக்கிவிட வேண்டும், தேங்காயை வேகவிடக் கூடாது.

* குழம்புச் சாதத்தை குறைத்து மோர்சாதத்தைக் கூட்ட வேண்டும்.

* காரம், புளி, உப்பு மிகக் கெடுதல் குறைத்து கொள்வது நல்லது.

* தேங்காய் வெந்தால் கொழுப்புக் கூடும். பச்சையாக உபயோகித்தால் கூடுதலாக இருக்கிற கொழுப்பு வெளியேறி சமநிலைக்கு வந்துவிடும்.

* பொரித்த பண்டங்களைத் தவிர்ப்பது நல்லது.

* வெள்ளைச் சர்க்கரை கெடுதல் தரும். வெல்லம், கருப்பட்டி, பனங்கற்கண்டு ஆகியவற்றை சேர்ப்பது நல்லது.

* அரிசியோடு சோளம், கேழ்வரகையும் சேர்த்து இட்லி தயாரித்தால் சத்து கூடுதலாக கிடைக்கும்.

• காய்கறிகள், கீரை வகைகளை கூடுதலாக எடுத்துக் கொண்டு உணவை குறைத்தால் உடல் ஆரோக்கியமாக இருக்கும்.

கோடம்பாக்கத்தின் குபேர வங்கிதான் பைனான்சியர் அன்புச்செழியன். அவர் கதவை மூடிவிட்டால் அவ்வளவுதான்… தமிழ் திரையுலகமே காலி. இந்த நிஜத்தை வேறு வேறு வார்த்தைகளால் ஒலிக்க ஆரம்பித்திருக்கிறார்கள் தமிழ்சினிமாவின் முன்னணி தயாரிப்பாளர்கள் பலர். ‘நான் வாங்குனேன். நல்லாயிருக்கேன். அப்ப நீங்க?’ என்று விளம்பரத்தில் வரும் அப்பாஸ்கள் போல இவர்கள் வரிசை கட்டி பேசுவது வேடிக்கையாக இருந்தாலும், அவரவர்கள் வாயால் வருகிற கமென்ட்டுகள் எதுவும் புறக்கணிக்க தகுந்ததல்ல. விஜய் ஆன்ட்டனி, சுந்தர்சி, தேவயானி, சீனு ராமசாமி, லிங்கா புகழ் சிங்காரவேலன், இன்னும் நாளைக்கும் அதற்கு மறுநாளும் ஆடியோவை வெளியிடப் போகிற அன்பு உள்ளங்கள் என அத்தனை பேரும் சொல்லி வைத்தார் போல, ‘அன்பண்ணன் போல வருமா?’ என்றே பேசுகிறார்கள். பேசப்போகிறார்கள்.

இதெல்லாம் எதற்கு? அன்புச்செழியனை அரக்கன் என்று வர்ணிக்கும் இன்னொரு கோஷ்டியால் அவரது இமேஜ் இறங்கிவிடக் கூடாதே என்பதற்காக. அதைவிட முக்கியம் காவல்துறை அவர் மீது நடவடிக்கை எடுப்பதற்கு முன் இத்தகைய ஆடியோக்கள் அந்த நடவடிக்கையை இன்னும் நமத்துப் போக வைக்குமல்லவா?

அன்புச்செழியனை உத்தமர் என்று வர்ணித்திருந்த சீனு ராமசாமியின் ட்விட்டுக்கு கடும் ரீயாக்ஷன் காட்டியிருந்தார் கரு.பழனியப்பன். அதற்கப்புறம் விஜய் ஆன்ட்டனிக்கும் அவர் பதில் சொல்லியிருந்தார். இன்னும் சில இயக்குனர்கள் அன்புச்செழியனுக்கு ஆதரவாக கருத்து சொல்கிற தயாரிப்பாளர்களை கடுமையாக விமர்சித்து வருகிறார்கள். இந்த மாறி மாறி அடித்துக் கொள்ளும் யுக்தியால், ஒரு தற்கொலை வெகு சீக்கிரம் மறக்கடிப்பட்டுவிட்டது.

கடைசி தகவல்- ‘கொடிவீரன்’ படம் இனி ஜென்மத்துக்கும் வராது என்பதாகவே இருக்கிறது. கல்குவாரி மணல்குவாரி மாதிரி, சினிமாவையும் அரசே ஏற்று நடத்த வேண்டும் என்ற ஒரு பொன்னான கருத்தை வெளியிட்டு அமைச்சர் செல்லூர் ராஜுவுக்கே பீதியூட்டி இருக்கிறார் அண்ணன் கருணாஸ் எம்.எல்.ஏ.

நடிகை அமலா பால் சமீபத்தில் சொகுசு கார் வாங்கியதில் கேரள அரசுக்கு முறையாக வரி செலுத்தவில்லை என குற்றச்சாட்டு எழுந்தது. குறைவான வரிக்காக பாண்டிச்சேரியில் உள்ள ஒரு முகவரி கொடுத்து கார் வாங்கியது அம்பலமானது. இது குறித்து அவரும் அதை மறுத்து கருத்து வெளியிட்டிருந்தார்.

ஆனால் தற்போது போலிஸ் விசாரணையில் துப்பு துலங்கியுள்ளது. இதில் பாண்டிச்சேரி முகவரியில் அவர் வீடு எடுத்தது உண்மை தானாம். வீட்டின் மூன்றாம் மாடியில் வெறும் ஒரே ஒரு அறை மட்டுமே கொண்டதாம்.

இதற்கு அக்ரிமென்ட் போடப்பட்டுள்ளது என கூறிய அந்த வீட்டின் உரிமையாளர் போலிஸாரிடம் அதற்கான ஆவணங்கள் எதையும் கொடுக்கவில்லையாம்.

சினிமாவில் கவர்ச்சிக்கும் இடம் கொடுக்கப்படும். இது படத்திற்கு ஒரு மசாலா போல கொடுக்கப்பட்டாலும் சில நேரங்களில் அது படத்தில் பெரிய தாக்கத்தை ஏற்படுத்தும்.

ஆனால் கவர்ச்சியை கதையாக வைத்து ராய் லட்சுமி நடிப்பில் ஜூலி 2 ஹிந்தியில் எடுக்கப்பட்டு தமிழில் டப்பாகி வந்துள்ளது. வந்துள்ளது. சரி இந்த ஜூலி எப்படிப்பட்டவள் என்பதை பார்ப்போம்.

கதைக்களம்

நடிகை ராய் லட்சுமி தான் இப்படத்தின் ஹீரோவும், ஹீரோயினியும். ஒரு ஹீரோயினை மையப்படுத்திய படம் வந்துள்ளது ஜூலி 2. இவர் பிறப்பிலேயே சந்தேகம் எழுகிறது.

அம்மா இரண்டாவது திருமணம் செய்து வாழ அந்த சித்தப்பாவால் இன்னல்களுக்கு ஆளாகிறார் அவர். வீட்டை விட்டு விரட்டப்படும் நிலைக்கு தள்ளப்படும் ஜூலி ஒரு பெண்ணிடம் அடைக்கலம் புகுந்து விடுகிறார்.

சினிமாவில் நடிக்க வேண்டும் என ஏகப்பட்ட கனவு. ஆசை அதற்கான பல முயற்சிகளை எடுக்க வைத்துள்ளது. ஆனால் வாய்ப்பு கிடைக்கும் வேளையில் சினிமாவில் இருக்கும் சில காமுகர்களிடம் சிக்குகிறார்.

தன்னை தர மறுக்கும் ஜூலி ஒதுக்கப்படுவது, படுக்கையை பகிர்ந்து கொண்டால் பிரபலமாகலாம் என்பதை கட்டத்திற்குள் அடைத்துவைக்கபடுவதுமாக கதை நகர்கிறது.

ஒரு நேரத்தில் சுமித்திரா தேவி என்பவரின் பயோகிராஃபியில் நடிக்க போகிறார். அத்தோடு இவருக்கு எதிராபாராத திருப்பங்கள் ஒரு இக்கட்டான சூழ்நிலையில் ஆபத்தை நெருங்குகிறார்.

ஜூலி அதிலிருந்து தப்பித்தாரா, படுக்கையை பகிர்ந்துகொண்டாரா, அவரின் கனவு பலித்ததா என்பதே மீதிக்கதை.

படத்தை பற்றிய அலசல்

ராய் லட்சுமி ஒரு அனுபவமான நடிகை தான். கிளாமராக நடிப்பதென்றால் உள்ளே குதித்துவிடுவார். ஐட்டம் பாடல்களுக்காக மட்டும் அவ்வப்போது தமிழ் சினிமாவில் எட்டிப்பார்க்கும் இந்த ராய் ஒரு முழு ஜூலியாக இப்போது வந்துள்ளார்.

சினிமாவில் இப்போது நடிகைகளுக்கு பல பிரச்சனைகள் இருப்பதாக சொல்லப்படுகிறது. சில விசயங்கள் வெளிவருகிறது. பல விசயங்கள் வெளிவருவதில்லை.

ஆனால் அத்திபூத்தாற் போல் அவ்வப்போது ஓரிரு குற்றங்கள் அம்பலமாகிறது. இப்படத்தில் ஒரு நடிகை சினிமாவில் உச்சத்தை அடைய என்னவெல்லாம் சந்திக்க வேண்டியிருக்கிறது.

காசு சம்பாதிக்கும் ஆசையில்லாவிட்டாலும் காம வலையில் சிக்காமல் பார்த்துக்கொள்ள நினைத்தாலும் சந்தர்ப்ப சூழ்நிலைகள் ஒரு மனிதரை தவறு செய்ய வைக்கிறது என காட்டியிருக்கிறார்கள்.

சினிமாவில் மட்டுமல்ல அரசியிலில் உச்சத்தை அடைய நினைத்தாலும் கடைசியில் அவர்கள் உயிருக்கே ஆபத்து இருப்பதை எப்படி சமாளிக்கிறார்கள் என்பதை நடிப்பில் காட்டிருக்கிறார்.

கிளாப்ஸ்

ராய் லட்சுமி ஜூலியாகவே மாறியுள்ளார். நடிப்பை பாராட்டலாம்.

ஓரிரு பாடல்கள் கேட்கும் படியாக இருக்கிறார். ஜூலி ஜூலி என தீம் செட்டாகிவிட்டது.

படத்திற்கேற்ற லைட் மீயூசிக் பிஜிஎம். அவ்வளவு தான்.

பல்பஸ்

ஒரு சிறு கதையை முழு நீள படமாக இழுத்து கொடுத்திருக்கிறார்களோ என தோன்றுகிறது.

படம் முழுக்க சீரியஸ் தான். நோ காமெடி. நோ ரிலாக்ஸ்.

வந்த வேகத்தில் அடுத்தடுத்து ஐட்டம் பாடல்களால் நிரப்பியது போல் உள்ளது.

டப்பிங் படம் எனாற் ஃபீல் கடைசி வரை நம்மை விட்டு விலகவில்லை.

மொத்ததில் ஜூலி 2 ஓகே. ராய் ஜூலியாக மாறியிருக்கிறாள். ஆனால் நிஜத்தில் சாத்தியமா என்றால் கேள்விக்குறி தான்.